طلب تسعير برودوا كانشيل اوتوماتيك 99

**egawady** · 16-07-2011 05:20 PM

انا معايا عربية برودوا كانشيل اوتوماتيك بجميع الكماليات الأصلية ( تكييف شغال و 2 زجاج كهرباء وسنتر لوك وراديو كاسيت الأصلى ) موديل 1999 .. جهاز انذار بـ 2 ريموت .. العداد عامل 89000 كم لغاية دلوقتى وبحالة ممتازة .. لونها نبيتى .. الدواخل فابريكة انما رشيت بعض أجزاء من الخارج للخرابيش ... العربية بحالة ممتازة ومش محتاجة مصاريف ... الرخصة تنتهى ابريل 2012 ...

عربيتى دى لو فكرت ابيعها .. أطلب فيها كام ؟

وشكراً جزيلاً

**hanyelrakhawy** · 16-07-2011 08:19 PM

هى كام cc
و لو ممكن ترفع صورتها
و هل كل شئ فيها يعمل بكفاءه؟؟؟

**egawady** · 16-07-2011 09:08 PM

المشاركة الأصلية كتبت بواسطة hanyelrakhawy

هى كام cc
و لو ممكن ترفع صورتها
و هل كل شئ فيها يعمل بكفاءه؟؟؟

- الكانشيل 850 سى سى
- حابقى اصورها وارفع الصورة ان شاء الله
- والحمد لله كل حاجة فى العربية شغالة تمام .. ومفيش مشاكل

بس انا لسه مقررتش البيع .. انا بس عاوز اعرف تجيب كام دلوقتى .. عشان بفكر فى زيرو .. بس لسه مخدتش القرار النهائى ... وربنا يوفق ان شاء الله

وشكرا جزيلا لحضرتك ...

**a_khamis** · 17-07-2011 05:28 PM

السعر في كونتكت في منتصف العشرينيات لو عايز تبيع قولي
انا ممكن اخدها منك بي ٢٥ لو موافق

**egawady** · 19-07-2011 12:20 AM

المشاركة الأصلية كتبت بواسطة a_khamis

السعر في كونتكت في منتصف العشرينيات لو عايز تبيع قولي
انا ممكن اخدها منك بي ٢٥ لو موافق

السعر على ContactCars فى منتصف العشرينات ده بالنسبة للمانيوال وأحياناً بدون كماليات والله أعلم بحالة العربية شكلها اية ...
انما الاوتوماتيك بجميع الكماليات وبحالة ممتازة .. يبقى أكيد السعر مختلف ....

على العموم شكراً لحضرتك ....

**a_khamis** · 19-07-2011 01:35 AM

المشاركة الأصلية كتبت بواسطة egawady

السعر على contactcars فى منتصف العشرينات ده بالنسبة للمانيوال وأحياناً بدون كماليات والله أعلم بحالة العربية شكلها اية ...
انما الاوتوماتيك بجميع الكماليات وبحالة ممتازة .. يبقى أكيد السعر مختلف ....

على العموم شكراً لحضرتك ....

ده بالنسبة للموجود دلوقتي و انت عارف كل واحد بيطلب سعر عالي علشان لما حد يفاصل معاه كعادة المصريين
و كمان لاحظ انها 800 سي سي و مش عربية كبيرة و واسعة و الشاريد الاوتوماتيك بتعمل 20 او 22 برضه
علي العموم ده عربيتك و انت حر بس لو انت عايز تبيع علي 25 ممكن تقولي
و ارجو ان كلامي مش يضايق بس ده وجهات نظر

**egawady** · 19-07-2011 08:29 PM

المشاركة الأصلية كتبت بواسطة a_khamis

ده بالنسبة للموجود دلوقتي و انت عارف كل واحد بيطلب سعر عالي علشان لما حد يفاصل معاه كعادة المصريين
و كمان لاحظ انها 800 سي سي و مش عربية كبيرة و واسعة و الشاريد الاوتوماتيك بتعمل 20 او 22 برضه
علي العموم ده عربيتك و انت حر بس لو انت عايز تبيع علي 25 ممكن تقولي
و ارجو ان كلامي مش يضايق بس ده وجهات نظر

وأكيد برضو المشترى عاوز يبخس بثمن العربية الارض ويقول منتصف العشرينات ( خصوصاً لو كان تاجر )
وبعدين اما ييجى يبيع يطلع بيها السما .. يبقى ساعتها مفيش عربية زيها فى مصر .... !!!!

وبعدين الشاريد لو مثلاً 2007 اوتوماتيك ( 1000 سى سى ) بتبدأ من 42000

مفيش كانشيل اوتوماتيك بحالة نضيفة بمنتصف العشرينات أبداً ... إلا لو كانت شقيانة

وطبعاً انت حر فى رأيك .....

الاختلاف فى الرأى ... لا يفسد للود قضية .....

**hanyelrakhawy** · 23-07-2011 12:33 AM

لو ناوى على البيع .... إن شاء الله هشتريها منك ... بعد فحص العربيه ....و إذا كانت حالتها فعلاً حلوه ..... السعر اللى يرضى ربنا مش هنختلف عليه ... بس بعد إسبوع من النهارده ... علشان أكون رجعت مصر (بإذن الله) ... بس للأمانه أخبار قطع غيارها إيه (من حيث الوفره و الأسعار) .... و هل الميكانيكيه العاديين بيشتغلو فيها و الا لازم حد متخصص؟؟؟

**egawady** · 24-07-2011 01:08 AM

المشاركة الأصلية كتبت بواسطة hanyelrakhawy

لو ناوى على البيع .... إن شاء الله هشتريها منك ... بعد فحص العربيه ....و إذا كانت حالتها فعلاً حلوه ..... السعر اللى يرضى ربنا مش هنختلف عليه ... بس بعد إسبوع من النهارده ... علشان أكون رجعت مصر (بإذن الله) ... بس للأمانه أخبار قطع غيارها إيه (من حيث الوفره و الأسعار) .... و هل الميكانيكيه العاديين بيشتغلو فيها و الا لازم حد متخصص؟؟؟

لو نويت على البيع حاكلم حضرتك ان شاء الله ..... وترجع بالسلامة بإذن الله ...

بالنسبة لموضوع قطع الغيار والميكانيكية ... انا قريت كتير عن الموضوع ده فى هذا المنتدى ... وبصراحة انا والله باستغرب جدا من الناس اللى بتشتكى من عدم توافر قطع الغيار .. او بتشتكى من الميكانيكية .... مش عارف ليه يعنى .. هى كيميا .... العربية عادية جداً وأى ميكانيكى بتاع يابانى يشتغل فيها عادى جدا جدا .. مفيش أى مشاكل ... العربية بسيطة التركيب .. يعنى مفهاش سنسورز ولا كومبيوتر ولا رشاشات ... دى كربراتير عادى .. والموتور 3 سلندر ... وكل الميكانيكية بتوع اليابانى يشتغلوا فيها بدون مشاكل ... لأن الكانشيل طبعاً زى ما حضرتك عارف عبارة عن دايهاتسو ميرا ( الشكل بتاع 92 ) .... يعنى أى قطعة غيار حاتشتريها زى تيل فرامل فلتر هوا فلتر زيت فلتر بنزين سير دينامو سير تكييف ..... إلخ حاتشترى بتاع الدايهاتسو ميرا 92 .....

المشكلة الوحيدة فى الميرا أو الكانشيل عموماً ... هى صغر حجم حوض الموتور ... يعنى بتبقى عملية الصيانة صعبة إلى حد ما .. عشان مكان حوض الموتور صغير شوية ... وكل حاجة بتبقى جنب بعضها قوى .... ودى حاجة عادية فى العربيات الصغيرة كلها ... زى الماروتى والدايو ماتيز والدايو تيكو والشاريد والكانشيل والبرودوا كليسا ...... إلخ

وبالنسبة لأماكن محلات قطع الغيار .. الحمد لله موجودة ومتوفرة ... ولو قلبت فى المنتدى فى قسم البرودوا حاتلاقى محلات كتير لقطع غيار الكانشيل .... وأشهرهم اوشين اللى فى الحرفيين ... والسرساوى فى ميدان الدقى ....

وربنا يوفق الجميع .....