عربية مستعملة في رينج 40-42 الف - أرجو النصيحة
السلام عليكم جميعا
دة تالت موضوع لية في المنتدي طلبا لمشورتكم في اختيار أنسب عربية لية واللي هتكون أول عربية بالنسبالي
الموضوع اللي فات يمكن كنت مصعبها عليكم لأني ذكرت الموديلات اللي باختار من بينها وكانو موديلات كتير ساعنها المرة دي قدرت (بفضل الله وبفضل الخبرات الجبارة اللي موجودة في المنتدي هنا) أقللهم ل 8 موديلات أفتكر مش هخرج براهم..
انا حاطط ميزانية 42 الف - وصعب أزود عليهم حاليا
الموديلات اللي رسيت عليها:
دايو لانوس - هيونداي اكسنت - كيا ريو - اوبل كورسا - بروتون ويرا - رينو كليو - سيات ابيزا - سكودا فابيا
بالنسبة لأهم احتياجاتي بقي:
أنا عندي مشوار الشغل يوميا 60-70 كم رايح جاي ف عايز عربية اعتمادية عالية
وتكون اقتصادية في البنزين للسبب نفسه، وركوبة مريحة
والتسارع والثبات مهمين لأنه تقريبا طريق سفر (طريق سريع نوعا ما)
بالنسبة لقطع الغيار مهم تكون متوفرة ومش غالية نار.. بس مش شرط تكون أرخص حاجة
الصيانة: عاوز الاقي حد بيفهم فيها بسهولة مش أغلب بيها في أي مشكلة تظهر فيها
سنة الصنع: 2001-2004 .. الا لو حد رشح حاجة محترمة حتي وهي أقدم من كدة
اعادة البيع: مافتكرش هافكر ابيع قبل 3-4 سنين بس مش عايز أدوخ بيها ساعتها وملقيلهاش بيعة
أما العفشة بقي: مش عاوزها قريبة من الأرض بحيث تحك في كل مطب لما يكون حد راكب ورا
الوسع الداخلي ووسع الشنطة: مش عايزها بس تكون أضيق حاجة في الحياة
البودي: الصاج مايبقاش خفيف
وشكرا لكل من يساهم برأيه وخبرته
