الموضوع: تيست درايف شيفروليه أوبترا 2010 أوتوماتيك

السلام عليكم ورحمة الله وبركاته

أمس أتيحت ليا الفرصة أنى أجرب العربية الأوبترا وده تقييم بسيط للتجربة:
ملاحظة: الصور كلها من على النت لان مكنش في فرصة للتصوير الجيد وعموما أكيد كلكم حافظين العربية.

البطاقة الفنية:

- السيارة: شيفروليه أوبترا 2010 - اللون: بترولي - عدد الكيلومترات 72 ألف كيلو
- الموتور: 1600، 16 صباب يولد قدرة مقدارها 107 حصان عند 5800 أر بي إم، وعزم أقصى 150 نيوتن متر عند 4000 أر بي ام. السرعة القصوى للأوتوماتيك 175 كم/س.
- الجيربوكس: 4 سرعات أوتو.



العربية عربية شركة ولذلك عاملة كيلوهات كتير زي ما انتم شايفين. أنا قطعت بيها مسافة 60 كيلو تقريبا منوع
ما بين طرق سريعة وداخل البلد وطرق غير ممهدة.

- الشكل الخارجي:
طبعا أول كلمة بتتقال ان الشكل أذواق.. بس رأيي بصراحة ان شكلها كلاسيك، عكس الالنترا مثلا.

- من الداخل:

شكل التابلوه مريح وان كان برضه فقير في اللمسات الجمالية..وأكتر حاجة رخمة هي الوجود الكتير جدا للون الرمادي!! مش فاهم ليه كل حاجة رمادي! التابلوه معظمه رمادي، الأبواب، الفرش - اللون ده بيستفزني شوية عشان بيفكرني بالفيرنا.
الدركسيون برضه مش مصدق ليه مش حاطين علامة شيفروليه بلون ذهبي؟؟ ليه كل حاجة فيه سوداء؟!
التقفيل يعتبر كويس جدا - كل حاجة مثبته فى مكانها كويس ومفيش غير عيوب تقفيل وفروقات بسيطة.

- اول ما تدخل العربية وتقعد تحس علطول بنظام التعليق الناشف حبتين والكراسي كذلك. كرسي السائق تقدر تعدل فيه كذا تعديل للأمام والخلف وفوق وتحت وطبعا الظهر وكذلك الدركسيون بيتحرك لفوق ولتحت، والكلام ده بيسهل انك تلاقي الوضع المناسب للقيادة أيا كان طولك.

- الكنبة الخلفية واسعة، ومساحة الأرجل خلف الكراسي الأمامية كبيرة وكذلك الـ Head room أو المساحة الرأسية جيدة جدا. الكنبة بتتني تلت وتلتين، عشلن لو الشنطة مكفتش وعايز تزود مساحة التخزين.

- الكاسيت شرايط!!!!!!!!!!!!!!!!!!!!!!!!!! دي كانت الفاجعة الكبيرة اللى عرفتها وأنا بحاول ألاقي مكان للسيدي اللى كنت واخدها معايا!

- التكييف ممتاز كما هو متوقع من العربيات الكورية.

- الباور خفيف جدا وسهل تحركه بإيد واحدة.

- أماكن التخزين كتيرة وأماكنها ممتازة. في 2 حامل اكواب + مساحة جيدة أسفل الكونسول الوسطي، ومسند يد ( بس صغير شوية مش عارف ليه؟) ودرج صغير بجانب عجلة القيادة وجراب للنظارة أعلى باب السائق، وفي الأبواب، باختصار مساحات التخزين تعبر جيدة جدا.

- فى نور سقف أمامي وفى نور كمان للكنبة الخلفية ممتاز جدا لو عايز تشوف أو تقرأ حاجة بالليل.

- فتح الشنطة والتنك من الداخل ويمكن فتح الشنطة أيضا من الريموت.

- مفيش زرار تقفل منه السنتر وانت داخل الكابينة. بس لو دست على سقاطة القفل بتاعة باب السائق السنتر كله بيقفل.

- تجهيزات الأمان: الأوبترا طبعا تاخد صفر زيها زي كل عربيات منصور وغبور فى الفئة دي. مفيش حتى ايرباج واحدة للسائق!! ده حتى مفيش جنوط سبور!!

- الجيربوكس شكله جميل أوي بالحلية الفضية اللى حواليه..



القيادة:

مبدأيا أنا بقالى فترة كبيرة مسوقتش غير عربيتي اللوجان، وبالتالي حسيت بشعور غريب أول ما دخلت الأوبترا وقعدت أظبط المرايات اللى الرؤية فيها مختلفة تماما عن اللوجان. القعدة مختلفة تماما غير قعدة اللواجان اللى عاملة زي الماتريكس فى العلو.
أول ملاحظة ان العربية سهلة جدا فى السواقة وأبعادها سهل تتعود عليها، شايف الكبود وانا قاعد والمرايات موضحة كل شيء تقريبا بيدور حول العربية.
الباور خفيف جدا عن اللوجان ويشابه باور الالنترا أحيانا، بس بيتقل شوية مع السرعة، واستجابة الدركسيون تعتبر جيدة جدا برضو، وإن كان اللانسر أفضل منها.
الموتور استجابته جيدة جدا، وصوته هادي بس بيعلى أوي لو قرصت عليه. الجيربوكس استجابته جيدة بس مش عارف ليه أحيانا بحس فى تأخير فى النقل، بس عموما أداء الجيربوكس جميل جدا ونقلاته تكاد تكون مش محسوسه.

العفشة رغم انها ناشفة شوية إلا انها مكانتش عملة لى أى ازعاج، طبعا الجنوط الـ 14 هى اللى مققلة الاحساس بالنشوفية، لو الجنط كبر شوية 15 أو 16 أعتقد العفشة هتبقى مشكلة كبيرة جدا!

ثبات العربية كويس جدا على الطريق الطوالي، لكن فى المنحنيات مش كويس وبعد أول منحنى أخدته بيها ابتديت أقلق وأقلل السرعة عند المنحنيات. السبب أعتقد الباور الخفيف بتاع العربية.

العربية أجمالا قيادتها سلسة ومريحة ومفيش أي أصوات مزعجة سمعتها أثناء القيادة.. وتعتبر اختيار موفق في الفئة دي.

إلى اللقاء فى تيستات أخرى إن شاء الله..

والسلام عليكم ورحمة الله وبركاته،

المشاركة الأصلية كتبت بواسطة eslam_nagy

أحيك ع الحيادية

فعلا كنت بقالى فترة بسال نفسى هى الاوبترا دى كويسة ولا سيئة والحمد لله خدت الصورة العامة من حضرتك

تسلم ايدك

ألف شكر يا اسلام على تشريفك للموضوع وكلامك الجميل،