استفسار من الاخوة المصريين في السعودية او اللي سافرو قاعدوا في السعودية

**casper_Dj30** · 18-07-2011 11:34 AM

انا ان شاء الله مسافر شغل في الرياض و معايا الاسرة
سؤالين بقا علي الماشي كدا
1- اية العربية المستعملة اللي ممكن اجيبها معاكم لغاية 25 الف ريال و طبعا لو ينفع ااقل يبقي احسن و تكون عربية محترمة (موديل قديم جديد مش فارقة المهم تبقي محترمة) يعني تكون منتشرة هناك علشان التصليح و قطع الغيار و التكيف و الثبات يبقي تمام
و ال 25 الف دول يجيبوا حاجة معقولة اصلا و لا محتاج اكثر من كدة

2- الشغل هناك هيبقي في حي العزيزية ان شاء الله .... اقرب منطقة معقولة و يكون السكن فيهامن 18 الي 20 الف ريال ممكن يبقي فين

استحلفكم باللة محدش يبخل عليا بمعلومة علشان اعرف اظبط ميزانيتي

**Elawany13** · 18-07-2011 12:19 PM

أنا كنت فى السعوديه من حوالى 15 سنة
ياباشا ده سؤال برده
العربيات فى السعوديه ببلاش تقريبا

بـ 15 ألف تركب عربيه محترمة
بـ 25 ألف هتدلع نفسك آخر دلع

المعايير هناك فى الأختيار مختلفة عن هنا تماما

لما تروح بس هتلاقى اللى انت عاوزه

**ahmedhawas** · 18-07-2011 03:03 PM

ب 25 ألف ريال هتجيب الشبح S320 أو S500 موديل من 92 إلى 98 حالتها نضيفة مش متهانة
العربية دي بيحبوها أوي في السعودية ومازالوا حتى الان بيستوردوا منها كتير من أمريكا واليابان - وقطع غيارها منتشرة جدا هناك
والعربية دي يعني مش محتاج أقولك مدي قوتها وثباتها وادائها عالطريق وأحسن بكتير من الموديل اللي بعدها إسمه فياقرا في السعودية
وقبل ما تشتري طبعا ، تروح تتفرج في معارض المستعمل والحراج ، وتتابع على موقع haraj بتاع السعودية
ولاينصح للمصريين المقيمين بمصر دخول هذا الموقع ..... عشان حالتهم النفسية متسوئش
وربنا يوفقك وييسرلك الخير إن شاء الله.

**nodey** · 18-07-2011 06:36 PM

نصيحة لوجه الله
ممكن حضرك تو شوية وتجيب هنويداي اكسنت زيرو ولما ربنا يكرمك وتنزل مصر هتنزلها بعد خصم قيمة من جمركها وربنا معاك

**tamerosman** · 18-07-2011 09:36 PM

هيونداى النترا شغالة تاكسيات فى الرياض ( تقريبا نصف التاكسيات تويوتا كامرى و نصها هيونداى النترا ) انا ركبت النترا 2005 و بعتها فى 2010 ب 19 الف بس و كانت ماشية زى الفل و تصليحها رخيص و سهل

نصيحة هات النترا لانها اكتر عربية منتشرة فى الرياض و تصلحها عند اى ميكانيكى و قطع غيارها رخيصة فى التوكيل

خلى بالك اسعار السكن فى الرياض يقت نار و اقل شقة محترمة ب 30 الف فى السنة و انتى طالع

**khaled_bibo** · 18-07-2011 09:47 PM

اما تيجي اسال على حي اسمه المنفوحه ده كله مصريين و اسعار الشقق هتلاقيها مناسبه و قريبه من العزيزيه و بالنسبه للعربيه اظن الانترا كويسه

**raedegypt** · 18-07-2011 09:47 PM

اركب النترا من الوعلان زيرو وهاتها لمصر لما تنزل . السكن فى المنفوحه ستجد الرنج دة وحى كله مصريين وقريب من العزيزيه بس خلى بالك السعوديه مع الاسرة مش هاتجيب همها المدارس غاليه وتبقى على كف الرحمن والكفيل حاول تقضى سنتين عذوبى واعمل لك مصلحه وانزل لبلدك ووفر المشوار

**saadelden** · 18-07-2011 11:28 PM

البي ام 316 موديل 90-95 من 5000 ل 12000 بالكتير !!
ف قيس علي كدا بقى العربيات التانيه

ممكن ب 20000 تجيب كورولا 2006
صاحبي كان جايب مرسيدس 200 موديل 94 ب 12 الف و كانت مفيهاش اي مشاكل
و دلوقتي وصلت ل 8000 !!
مرسيدس s500 ب 25 الف موديل 95-98 و حالتها ممتازه جدا

هنا قطع غيار المرسيدس اسعارها معقوله جدا و الياباني ارخص بردو
لو هتحتاجها في سفر كتير و محتاج حاجه تريحك يبقى خليك في المرسيدس او الكورولا موديل حديث

هنا الكوري مابتداش ينتشر الا اما نزل التاكسي الالنترا و السوناتا لكن قبل كدا كان كله كامري و كرسيدا
دلوقتي نزلت السوناتا الجديده و الكامري و السيراتو و الاوبتيما و فيه عربيات امريكاني زي الكابريس و اللومينا

عموما الالنترا تقريبا نفس الماتور من ساعه ما نزلت ف هتلاقي قطع غيارها في كل حته
لكن العربيه دي بالذات ماتجيبهاش مستعمله لان مشاكلها كتير اولها التكيف لو مش مهتم بيه و الماتور لو مش مهتم بالعربيه

بردو العربيات هنا ممكن تلاقيها موديل 2008 و ماشيه 500 الف كيلو و تلاقي الماتور زي الفل
بالذات المرسيدس و العربيات الكبيره هتلاقيها ماشيه كتير
يعني العربيه الي بيقولو عليها بيتي هنا الي بتعمل في السنه 50 الف !!