الموضوع: هل فعلا الزيرو افضل من المستعمل؟ المفاجأة!!! لماذا المستعمل افضل في مصر؟؟

المشاركة الأصلية كتبت بواسطة Dr.SherifMansy

اسمحوا لى اقول رأيي الشخصى المتواضع.

أنا جربت كده و كده كذا مرة.

الموضوع اولا نسبى من شخص للتانى و لكن داخل فيه عوامل كتيرة و بالتالى ما حدش يقدر يقول مع التعميم ان ده احسن او ده احسن... ليه بقى ؟؟

احنا للأسف بنفترض فى سوق العربيات عندنا ان فيه امانة و نزاهة و التزام بالكلمة و الوعود ، سواء من البائع او الوكيل ، و للأسف ده ابعد ما يكون عن الحقيقة عندنا...

كتير جدا من العربيات المستعملة بيكون فيها عيوب و البائع بيعتبرها شطارة و فهلوة لو قدر يخبيها عن المشترى ، و الغريب و المضحك ايضا انه البائع لو عنده ذمة و قال على العيب اللى فى العربية للمشترى تلاقى المشترى بيحاول يبقى هو الفهلوى و يخسف بثمن العربية الأرض ، او انه يتقمص دور شرلوك هولمز و يستنتج ان اكيد فيه مصيبة اكبر مادام البائع ذكر العيب الموجود فى العربية !!!

عربيات زيرو كتير جدا بتنزل عندنا و هى فيها مشاكل معروفة (طبعا معروفة بره مصرنا) و توكيلات اوروبا و امريكا رجعتها ، مثلا لفشلها فى اختبارات السلامة ، او ان الشكل ما لاقاش اقبال زى ما توقعوا ، او فيها عيوب فى الموتور و الميكانيكا ، و بالتالى بتنزل عندنا و تتصرف فى السوق زى الفل ، و هنا بيظهر غش التوكيلات فى تلصيم الأمور لحين أنتهاء الضمان و بعدها خللى العميل يشرب من كيعانه.

ده غير ان احنا بناخد اقل فئة و اقل اوبشنز باعلى سعر و للأسف ده بيمشى على الكل ، زيرو و مستعمل.

الميزانية بتحكم الموضوع ده بشكل كبير ، كذلك عدد من يستخدم السيارة يعنى هايركب فيها كام ، و هل اللى هايسوقها واحد ولا اكتر ، و هل سواقة هادية و لا سريعة ... كل دى عوامل بتحكم..

ما ينفعش يبقى عندى عائلة من 5 او 6 افراد و بدل ما اجيب mini SUV اروج اجيب بنفس الثمن عربية رياضية سحبها طيارة ...

ماينفعش اكون واحد ما بيفهمش فى العربيات و ماعرفش (معرفة وثيقة تمنع الغش و الخداع) ميكانيكى و سمكرى كويسين و فاهمين شغلهم ، و انزل اشترى مستعمل ... اكيد هاشرب مقلب محترم.

ماينفعش اكون واحد وقتى ضيق جدا و محتاج العربية ليل نهار و اشترى مستعمل ، اى مستعمل (زى ما قلتوا هنا) هايقعد سنة على الأقل بيفتح بقه كل شوية لحين الانتهاء من كل المشاكل الموجودة فيها ، و ساعات مش بتخلص تماما ، معنى كده انى اسيب شغلى و اعطل مصالحى و اقعد جنب الميكانيكي ، و هنا الزيرو ارحم ، يوم واحد بيضيع كل كام شهر و بيعدى.

ماينفعش تكون ميزانيتى محدودة جدا و غير قابلة للتجديد فى زمن بسيط و افكر فى المستعمل ، بمعنى انى لو مثلا كل اللى حيلتى يجيب زيرو فئة متوسطة او مستعمل فئة اعلى ، و لكن مش هايبقى معايا فلوس ممكن تتحوش لفترة سنة او اكثر ، هنا المستعمل هايبقى مشكلة لأن كل ما يظهر حاجة محتاجة تغيير مش هايكون معايا ثمنها ، و العربية هاتقعد تحت البيت لحد ما ربنا يفرجها ، يبقى هنا الزيرو ارحم.

بلاش الجرى فى الزيرو ورا اجدد موديل نزل و مافيش زيه خالص قبل كده ، الا اذا كنت بتحب تكون beta tester ، لأن العربية سلعة معمرة ، و ماينفعش اخدها اجربها و اشوف حلوة و لا لأ ، انا افضل اشترى عربية مشهود لها من قبل.

لو بتحب الأوبشنز العالية و كل حاجة تكون الكترونية فى العربية هنا المستعمل افضل و اوحش فى نفس الوقت ، أفضل لأن سعره هايكون فى متناول اليد بدون المغالاة الرهيبة بتاعة التوكيلات فى حالة الزيرو ، و لكن اوحش لو فيه sensor او جزء الكترونى فيه عطل ، لأن غالبا بيكون غالى جدا او مش موجود أو سريع التلف و ده احد الأسباب اللى خلت المالك الأول عايز يخلص من العربية.

علشان كده باقول الموضوع نسبى و داخل فيه عوامل عديدة بشكل كبير ، و بالتالى كل حالة هى فردية و يصعب تعميمها.

و تحياتى

مات الكلام