الموضوع: ايه اكتر مكان روحته كفسحه وعجبك

السلام عليكم ورحمة الله وبركاته

الموضوع ده عامله علشان نحط فيه خبراتنا عن الاماكن اللى ممكن الواحد يروح يتفسح فيها وايه النصايح اللى ممكن نقدمها لبعض

انا للاسف من هواة الجلوس فى البيت برجع من الشغل ياما ادام الكومبيوتر ياما ادام التليفزيون ماسك ريموت الدش وعمال احول كل كام ثانيه الف على القنوات الموجوده كلها لا بعرف اشوف حاجه معينه واثبت عليها ولا باخلى اللى معايا يشوف حاجه لدرجة ان والدى واختى بيزهقوا منى وبيحاولوا يسيبولى البيت ويخرجوا


بس بعد لما العربيه جت بحاول اغير النظام ده بصراحه واحسن مكان روحته من شهر وعجبنى جدا كان افريكانو بارك اللى على الطريق الصحراوى قريبه من كارتة اسكندريه وقرية الاسد العيب الوحيد الجو حر جدا وانا مش باستحمل الحر خالص وبسيح واتفرهد على الاخر

غير كده مكان تحفه فعلا خاصة لمحبى الحيوانات زىى حتلاقى متعه كبيره جدا فى التعامل مع عدة انواع من الحيوانات عن قرب وتاكلها وتلمسها براحتك وكل واحد وشجاعته

ورغم حبى للحيوانات خفت ااكل اى حد فيهم ماعدا الحصان السيسى طيب جدا ودمه زى العسل وبعد لما اكلته بايدى ملقيتش ليه اى ريحه نفس وحشه على ايديا خاصة ان انا بقرف من التعامل باللمس

سعر تذكرة الدخول كامله للعربيه باللى فيها 250 جنيه ايا كان عدد الافراد
انصح بهذا المكان وخاصة لو معاك كاميرا تصور الصور الرائعه اللى فيه ويفضل عدم الذهاب خلال الاشهر 6,7,8 علشان حرارة الجو الفظيعه

مستنى خبراتكم عن بعض الاماكن اللى زورتوها

المشاركة الأصلية كتبت بواسطة tarekomar66

انا بعشق مرسى مطروح هوه المكان بعيد شويه بس يستاهل انك تروحه لدرجه انى من كام سنه ماكانش عندى فرصه غير الخميس بعد الشغل حتى فجر الاحد والعوده على الشغل
الاسعار متفاوته بتبتدى من 150 فى اليوم حتى 800 ج فى اليوم والكلام بالنسبه للشقق وحسب موقعها وبحرى او قبلى او ترى البحر وفيها تكيفات ولا لأ وطبعا

شكرا على المشاركه ياباشا

المشاركة الأصلية كتبت بواسطة misoalex

بص انا روحت حتت كتير
والغردقه الميزه فيها انها مش زى شرم لا دى مدينه زى اسكندريه او مطروح كده والشواطئ بتدخلها ببصات او تذاكر

وفيه على حسب ميزانيتك فيه شواطئ ب 70 جنيه واكتر
وفيه شؤاطئ ب 10 جنيه تقريبا

ودى فيها اجانب ودى فيها اجانب بس الفرق فى المستوى طبعا والهدوء وغيره

بس فيه فندق رخيص ومكانه جميل جدا

اسمه فندق فلوباتير

مكانه فى وش اتوبيس الجونه على طول وطبعا مطل على شارع عمومى كبير جدا فى الغردقه وجنبه كل حاجه قريبه منه سواء حتمشى او حتركب مواصلات

هو الليله فيه كانت ب 90 جنيه تقريبا وكانت غرفه دابل ليا وللمدام ودلوقتى ارخص اكيد لان الجو هناك هادى دلوقتى


وطبعا فيها اماكن زى شيرى والممشى ودى مليانه بازرات وديسكوهات وكافتريات ومطاعم وكل حاجه انت عاوزها

هناك لو عاوز تاكل سندوتش فول وكوبايه شاى وتدفع 5 جنيه حتلاقى ولو عاوز تاكل كافيار واستاكوزا وتدفع 1000 جنيه حتلاقى

على عكس شرم كلها اسعار سياحيه ونظام قرى وشواطئ تبع القرى غاليه جدا
او لازم تبقى نزيل فى القريه عشان تدخل الشاطئ

الخلاصه الغردقه تجمع بين شرم ومطروح يعنى كأنك فى مطروح بس روحت شرم هههههههههه

بس هى مشتى اكتر من انها مصيف
درجه الحراره فى الصيف بتوصل الظهر ل 40
فى الشتاء هناك كنت بنزل البحر عادى جدا فى شهر 2 اللى الناس هنا بتبقى لابسه جلد وصوف ههههههههههه

الف شكر على المعلومات
ممكن نمرة تليفون الفندق