-
كليو ولا لانوس ولا كورسا
السلام عيكم جميعا..
أنا بصراحة محتار بين التلاتة دول..
كليو: أكتر عربية ميال لها
لانوس: كتير بينصحو بيها
كورسا: ماكنتش من ضمن اختياراتي لحد مالاقيت عربية قدامي يقال انها لقطة ومتتسابش وهي:
موديل 95 1200 سي سي فابريكة برة وجوة مع وجود بعض الخدوش البسيطة، ازاز كهرباء (أمامي فقط) مرايات كهرباء فتحة سقف ... وعلي 35 ألف
لو هجيب كليو أو لانوس هيبقي في حدود 42 ألف
أنا يهمني في المقام الأول الاعتمادية
بالنسبة للكورسا.. ايه أخبارها من حيث قطع الغيار (توافر وأسعار) والصيانة (السهولة وتوافر اللي بيفهموا فيها) والعفشة والثبات
كان من ضمن اختياراتي برضه (بس مش قبل ال3 دول..): هيونداي اكسنت - كيا ريو - بروتون ويرا - سيات ابيزا - سكودا فابيا
وشكرا لكل ردودكم مقدما
-
الكورسا حتبقى موديل قديم
الكليو افضل طبعا كثبات وامان وفرامل
اللانوس قطع غيار ارخص جدا وبرده عربيه ثبتت وجودها
-
نسيت أقول ان الكورسا عاملة حوالي 100 الف كيلو
-
-
-
متهيالى اللانوس علشان الاعتماديه
قطع غيار فى السوبر ماركت و رخيصه
اى بقال بيفهم فيها و حافظها من ساسسها لراسها
الكليو حلوه جدا ثبات و فرامل بس قليله جدا و قطع غيارها غاليه - الرينو كله كده -
الكورسا حلوه بس لو حضرتك هتضحى بالشنطه و الوسع
-
الكليو امان و فرامل و قطع الغيار متوفرة و موفرة ف البنزين و حتركب موديل عالى ف المقابل صالون ضيق بالنسبة ليا عشان طويل و اعادة البيع مش عارف بصراحة.
الانوس معشوقة الشعب المصرى.
الكورسا حتبقى هاتش باك و لو داخلة دماغك اركبها و بالنسبة لقطع الغيار مقدرش افيك
-
شكرا لكل اللي ردو..
ولسة متابع..
-
بص بقى
كل عربيه فيها مميزات وعيوب عن التانيه ومفيش واحده فى المجمل احسن من التانيه
انا شايف انك تشوف اللى حالتها احسن فيهم وتتوكل على الله
لان المستعمل حاله
-
كليو 1200 مو 2003 وسعرها مايعديش 40 أو 41 ألف بالكتير لكذا سبب:
1- أحسنهم كاركوبة
2- كمالياتها حلوة
3- اقتصادية في البنزين وفي نفس الوقت 74 حصان علي 1200 يبقي حلو جدا
4- لأن الكورسا التسعينات صغيرة وقدمت جدا جدا جدا ومش عملية زي الكليو أو اللانوس. أما اللانوس لو حكمت عقلك آه هيا قطع غيار أرخص من الكليو بس لو الاتنين عدي عليهم 8 سنين وقول سنتين كمان بعد ما تشتري (يعني في حدود 10 سنين) شوف مين فيهم حاتشتكي أكتر.
5- بصراحة كدة من الآخر حتي لو الاتنين اشتكو.. لو استخدامك للعربية كتيير (نقول فوق الساعتين يوميا زي حالاتي) حاتحس فعلا انك محتاج ركوبة تريحك لأنها ببساطة بيتك التاني حتي لو حاتصرف عليها 400 ولا 500 جنيه زيادة سنويا بس ماتنساش انك بتشتري راحتك.
أنا كنت زيك مليون من نصحني بلانوس بدل كورسا سيدان وفي الآخر لسة ماشتريتش ولا واحدة وان شاء الله رايح أشوف واحدة كورسا 2005 بكرة (يعني لسة مش نهائي بس ربنا يوفقهالي ان شاء الله لو فيها الخير) وعارف اني في الأغلب حاصرف عليها أكتر من اللانوس حبتين بس مش عاوز بجد أركب اللادا.. قصدي اللانوس بتكنولوجيا 97 اللي اتوقف انتاجها في العالم كله ولسة بيستعبطو علينا بيها هنا. بصراحة اقتنعت الي حد كبير ان أهم حاجة راحتك وانت قاعد في العربية بمزاجك آخر روقان :ma:
Content Relevant URLs by
vBSEO 3.6.0 PL2