استفسار بخصوص فيات برافا 2001 (أرجو الرد السريع)

**Amr_Azab** · 20-07-2011 10:49 AM

لو سمحتو انا قدامي فيات برافا 2001 فول اوبشن مانوال والعربية عموما حالتها كويسة جدا وحخلصها علي 35000 جنيه
بس ناس كتير خوفتني من قطع الغيار والصيانة فهل الكلام ده صحيح ؟ مع العلم انا من اسكندرية

وفي حاجة انا لاقيتها في الموتور وهو علي السلنسيه صوته بيعلي كده ويوطي تاني علطول فنا مش عارف ده عيب ولا ايه
هو الميكانيكي كده كده حيبص عليها لسة بس بصراحة انا العربية عجباني جدا جدا وكنت عايز اعرف موضوع قطع الغيار ده عندنا في اسكندرية والسعر مناسب ولا لا

اسف اني طولت عليكو واتمني الرد السريع

**Amr_Azab** · 20-07-2011 12:59 PM

الف شكر يا أستاذ / حامد علي الآهتمام والرد والعربية فعلا رائعة جدا بصراحة وكنت محتاج بس اتاكد من موضوع قطع الغيار ده وخصوصا في اسكندرية

وصاحب العربية تقريبا قاللي علي موضوع الآيدل ده فعلا
فلو العيب منه فعلا فيبقي ايه الكلام كده ؟ اشتريها ولا ايه ؟

**mr_hamed_s** · 20-07-2011 04:13 PM

المشاركة الأصلية كتبت بواسطة Amr_Azab

الف شكر يا أستاذ / حامد علي الآهتمام والرد والعربية فعلا رائعة جدا بصراحة وكنت محتاج بس اتاكد من موضوع قطع الغيار ده وخصوصا في اسكندرية

وصاحب العربية تقريبا قاللي علي موضوع الآيدل ده فعلا
فلو العيب منه فعلا فيبقي ايه الكلام كده ؟ اشتريها ولا ايه ؟

بص لو الايدل مش مشكله هوه العيب ده شائع فكل مواتير 1300 والكلام ده من صحاب العربية بره مصر
العربية ديه منتشرة جدا فى اوروبا الشرقية وديه المشكله الوحيده الى فيها موضوع الايدل انه بيبوظ بعد 40000 الف تقريبا بس مش دائما
عموما هوه فعلا الايدل يعمل جديد تقريبا 900 جنيه وممكن تجيبه استيراد اقل من كده وقطع غيارها انا عارف الجديد والمستعمل هنا فالقهاهرة انما الاسكندرية معنديش خلفية بس نصيحه تنزل مكان بيع قطع الغيار الاستيراد وتبص على حاجتها عندك وتعرف مستوى الاسعار ايه
العربية ديه مريحه دا بس بشرطين انك تجيب قطع الغيار بتاعتها مش تعديل وتاليف والكلام ده وانك تصلحها عند الناس اللى بتفهم فيها غير كده هتتعبك جدا وبالتوفيق

المشاركة الأصلية كتبت بواسطة toteda

ياباشا الف مبروك مقدما علي العربية وعموما لو هي مسألة ايدل هو تمنه 900 جنيه عند الكيلاني وحوالي 200 جنيه تركيب علشان هيتزبط كمبيوتر يبقي اخصم المبلغ من تمنها واتوكل علي الله ... علي فكره انا معايا ماريا اختها الكبيرة

تظبيط الايدل بالظبط 50 جنيه بالكمبيوتر :D
كنت عايز اسالك عندك فوانيس المارية الكريستال اللى فيه lens ولا العاديين كنت عايز اجيبهم وعايز اعرف ليهم تعديل لو ركبوا فالبرافا ؟؟

**Amr_Azab** · 21-07-2011 10:21 AM

الف شكر استاذ / toteda وأستاذ / حامد علي الرد والاهتمام
انا فعلا جبت ارقام بتوع قطع غيار استعمال الخارج في شارع صلاح الدين عندنا في اسكندرية وكلمتهم ولقيت عندهم حاجات العربية
( 2 مساعدين امامي بالبطحات والسوست 325 جنيه - باب كامل 250 جنيه - الآيدل 280 جنيه ) دي الحاجات اللي سالت عليها

ياريت يا أستاذ / حامد لو معندكش مانع تبعتلي تليفونك علي الخاص ( أكون شاكر جدا )