مبدئياً اعترف اني كنت غلطان
لما دخلت في مباراة السلفيين ضد الليبرالين ، الاخوان ولا البرادعي ، صبحي صالح كخة ولا ساويريس مش حقبل اسفه
قد إيه قدرتنا هائلة على الشيطنة والتفرقة . الإعلام بيهيس وحنا وراه
هوا الثورة دي قامت ليه؟ هو إيه إلي كان مزعل ملايين الناس دي كلها؟
مصر ولا كانت إسلامية ولا مدنية ولا أي حاجة أصلاً. مصر كانت خرابة ، غابة ، منهبة
سنين طويلة و أهلينا مش عارفين يربونا على إيه؟ امشي عدل يحتار عدوك فيك، صح؟ غلط، في مصر امشي عدل تلبس فالحيط
الناس إلي فهمت التيته عرفت إن العدل و المبادئ ميأكلشي عيش. زبطت (أو بوظت ) بوصلتها الأخلاقية على المكسب و بس
الناس دي وصلت و مسكت البلد ، و كلت بدل العيش جاتوه و عرفو إن ليك مكان طول ما إنت مع العصابة على الغلابة
مش بس كدة، ربو عيالهم على كدة، و دخلوهم مناطق السلطة و اللقمة الحلوة.
أكتر من 30 سنة شبكة المصالح بتتربى ، و كلنا بقينا بندور على خيط من الشبكة يسندنا في الزنقة
لجنة سخيفة ، تعلية دور مخالف، واحد ليك عندو فلوس و مش عايز يجبها ، وظيفة ... ولا حتى فشخرة فاضية انك قريب فلان ولا تعرف الباشا.
أخلاقنا بقت استك ، نشتم إلي سرقوا البلد و لو كنا مكانهم كنا عملنا زيهم، المال السايب يعمل أكتر من كدة.
شبكة المصالح دي و النظام إلي مش عجبنا دول مش ناس من المريخ
دول أنا و إنت بس على كبير شوية ،
الناس دي حتحارب علشان محدش يقرب منها أو يحسبها .
أغبى حاجة عملوها كانت يوم الجمال، إتعلمو من ساعتها . الشغل إلي بجد مش بالدراع ، الشغل إلي بجد بالدماغ
كنيسة ضد سلفين ، اخوان ضد ليبرالين، دستور ولا إنتخابات ، نعم ولا لأ، أمي حتقلع الحجاب ولا تتنقب غصب عنها و لسة إلي جي كتير
إلي إتربو على الفساد لسة معهم السلطة و المال
إلي خرج يطلب بالعدل و قتل لسة دمه ضايع
و على رأي المثل إعرف صاحبك و علم عليه
ياريت قبل ماتهجم حد بكلمة ولا فيديو ...فكر
إعرف عدوك و علم عليه
اتحدو يرحمكم الله
منقول من الفيس بوك