الموضوع: سلسلة سلوكيات القيادة - الحلقة الرابعة (استخدامات الكلاكس)

السلام عليكم ورحمة الله وبركاته

لو حضرتك ركزت شوية وانت ماشي في اي شارع رئيسي وليكن شارع مراد من بعد نفق الشيراتون متجه في اتجاه الكيت كات، هتلاحظ ان تقريبا في الثانية الواحدة بيتضرب حوالي 3 او 4 كلاكسات (الله يكون في عون الساكنين في هذا الشارع)

انا لاحظت لو راكب تاكسي او ميكروباص ان في بعض السواقين عندهم داء اسمه (كلاكسكون) وهو انه يفضل يضرب كلاكسات بشكل هيستيري علي الفاضي والمليان بمعدل كلاكس كل ثانية وساعات بتجيله الحالة ويعمل نغمات بالكلاكس واحيانا بيضرب الكلاكس بايديه الأتنين بالتبادل عشان يعمل نغمة او سيمفونية من الكلاكسات المتواصلة

ودايما وانا سايق بقابل نوعيات من دوول ويبقي حظه سئ جدا الي يجي قدام واحد من دوول لأنه ممكن يصيبك بهيستريا من كتر الكلاكسات لمجرد ان نور الفرامل عندك عمل فلشر (مجرد فلشر) لونه احمر او لو كان وراك بجنب وحضرتك اديتله اشاره في اتجاهه او لو لقيت مطب وهديت (المفروض تجري باقصي سرعة وقبل المطب ب سنتيمتر تدوس فرامل "يستحسن تكون فرامل خفيفة")

يعني بمعني اصح المفروض مننا دايما نوسع الطريق لهؤلاء المرضي عشان يرتعوا بحريتهم في الشوارع يجروا بكل رعونة ويسببولنا حوادث لا قدر الله

ومش بس بيكتفوا بالكلاكس بتاع الفبريكة (بتاع البني أدمين) لا بيركبوا كلاكسات بتاعة قطارات او تريلات او الله وحده الأعلم بمصدرها بحيث يكون الصوت مفزع جدا جدا لمن تسول له نفسه ويحاول انه يعترض طريقه ويمشي بسرعة بطيئة (90 مثلا)

العجيب ان في مصر بلاقي شوارع كتير في وسط البلد (تقريبا كلها) او شوارع في مناطق حيوية كالدقي والمهندسين والعجوزة والزمالك فيها لافتات بتقول "ممنوع استخدام آله التنبيه ومن يخالف يعرض نفسه للمسألة القانونية" وتلاقي السواق من دوول يجي قدامها بالظبط ويضرب كلاكس وكأنه بيطلع لسانه للقانون ولسان حاله يقول "الي تقدر تعمله اعمله" وفعلا انا شخصيا عمري ماشوفت عسكري مرور او امين شرطة بيوقف حد فيهم عشان يعمله مخالفة استخدام آله التنبيه

وتلاقي الواحد فيهم واقف ساعة عشان يحمل ولو جه واحد وقف قدامه 3 او 4 ثواني تجيله الحالة ودائما بيكون العلاج الموصوف له من الطبيب المعالج هو استخدام الكلاكس بشكل هيستيري (زي بالظبط لما يقولك اكسر اي حاجة عشان تهدي)

ولو واقف في اشارة والأشارة فتحت لو مطلعتش بالعربية خلال 30 نانو ساكند تلاقي وابل من الكلاكسات نازل يرف علي ودانك

واتوبيس المدرسة الصبح وهو بينادي علي مدحت عشان يروح المدرسة بتلاقي السواق عنده اضطراب نفسي وبيستخدم الكلاكس بشكل غير طبيعي بيصحي كل الحي عشان يروحوا المدرسة بدل مدحت

ولو واحد مستني المدام او الأولاد او واحد صاحبه تحت البيت بيفضل يسلي نفسه بالكلاكس بدل ما يقعد فاضي مش بيعمل حاجة

اعتقد الكلام دة مالوش اي محل من الأعراب في كل بلاد الدنيا، لأني اعرف حد شغال مع ناس كوريين بيقولي الراجل الكوري معاه عربية بقاله 3 سنين عمره ما ضرب كلاكس ولو حتي الي قدامه وقف لمدة ساعة عمره ما يضرب الكلاكس ولا حتي يزعق ويخرج دماغه من الشباك (زي احنا ما بنعمل)

أتمني يا جماعة فعلا ان يطبق قانون مخالفة من يستخدم آله التنبيه بدون داعي

واعتقد الحالات الواجب فيها استخدام الكلاكس كالتالي
1- التحذير من خطر كأن يكون الي قدامك عربيته بتريح عليك في اشارة
2- لو واحد العربية بتنحرف منه ناحيتك غصب عنه وهو مش واخد باله
3- لو هتدخل في شارع جانبي وخايف تتفاجأ بحد خارج من الشارع وطبعا الكلام دة الظهر (لأن بليل في عندك الأنوار)
4- لو عايز تنبه حد انه يكلمك لأي سبب من الأسباب وهو مش واخد باله منك

واعتقد انه لازم يتمنع استخدام الكلاكس في الشوارع السكنية بعد الساعة 11 بليل لحد الساعة 8 الصبح

انا كتبت الموضوع من وجهه نظري وان كان يحتمل الصواب ، لو حد من الأعضاء شايف رأي مختلف ياريت يصححلي

والله المستعان
،
،

أقرأ ايضاً
http://www.nilemotors.net/Nile/22676...post3873583122
http://www.nilemotors.net/Nile/23092...post3873631012
http://www.nilemotors.net/Nile/23395...post3873668353