المشاركة الأصلية كتبت بواسطة sharafconsult
الاجهزه كلها زى بعض لأن التكنولوجيا فيها بسيطه جدا
فيه شركه بتعمل تكييف وفيه فلاتر كتيره وفيه جهاز نازل وبيقولوا فيه هيبا فلتر بتاع غرف العمليات وده مشكله أنه يتحط فى جهاز منزلى
فيه شركه الجهاز بتاعها لما تزود شحنته تدفع 1000 جنيه لأن الفريون صديق للبيئه وأغلى بكتير من الفريون العادى
فيه شركه بتعمل مواسير النحاس من صناعه رديئه وفيه شركه بتعمل من خامات ممتازه مستورده
فيه شركه الكباسات فيها امريكى وفيه شركه كباساتها صينى وكورى
فيه شركه صوت الوحده الداخليه والخارجيه هادى , وفيه شركه تانيه الصوت مزعج
غير كده كلها راحات نفسيه وتجارب مع الاشخاص
زى اللى بيركبوا العربيات البى ام مش بيحبوا مرسيدس
لولا اختلاف الاذواق لبارت السلع
المهم فى الموضوع هو تجربة الجهاز فى مصر وسعر الجهاز و خدمة ما بعد البيع
بس معلومه مهمه , مش معنى أن الجهاز صينى يبقى وحش , لأن ده حسب أسم الشركه اللى منزلاه فى السوق وسمعتها , يعنى كاريير تيع شركة ميديا الصينيه
لكن كل الاجهزه زى بعضها طالما المميزات واحده
بالنسبه للأجهزه السعودى الاختلاف بيكون فى القدره التبريديه عند درجة الحراره الخارجيه , بمعنى أن الجهاز مكتوب عليه 3 حصان مثلا لكن ده مشروط أن حرارة الجو الخارجى 35 درجه مئويه , لما الحراره توصل 40 الجهاز قدرته بتقل
لكن الاجهزه السعودى مصممه لتعمل عند درجات حراره عاليه وده اللى بيدى الاحساس أنه أفضل رغم نفس القدره مع الاجهزه المصرى
وفيه نقطه مهمه كمان هى أن الجهاز ممكن تركبه وتحس أنه مخلى المكان تلاجه وأنت ما تعرفش أنه أزيد بكتير من المطلوب , يعنى حد يصدقنى لما أقوله أنى مركب جهاز 1.5 حصان فى غرفه 20 متر والدنيا تلاجه , أكيد محدش هيصدق لكن ده حقيقى لأن الموضوع مرتبط بالاحمال الحراريه فى المكان مش بحجم المكان ,وممكن غرفه تانيه نفس المساحه بس تحتاج تكييف اكبر ( حسب أحمالها الحراريه )
وكل الموردين بيحط جهاز أكبر من اللى أنت محتاجله علشان ماتشتكيش كل شويه وتقول التكييف مش بيسقع المكان كويس
أرجو أكون أفدتكم
مع خالص تحياتى
عمرو شرف
مهندس أستشارى
عضو لجنة اعداد كود التكييف المصرى