الى سكان مدينة نصر ماذا يحدث الان ..

**AmAhmed** · 23-07-2011 02:01 AM

التظاهر و الاعتصام حق للشعب طالما بشكل سلمي
لا داعي لان يخرج الموضوع عن حجمه الحقيقي حتي الان

**EslaM_NagY** · 23-07-2011 02:03 AM

المشاركة الأصلية كتبت بواسطة khaled_nowaihy

انا كنت رايح من مدينة نصر الى حدائق القبة الساعة 10 تقريبا لقيت المدرعات قافلة الطريق بعد منزل كوبرى الفنجرى قبل الفنية العسكرية ومانعين المرور
اتجهنا يمين اجبارى من جنب دار المشاه ورجعت صلاح سالم علشان ادخل من ناحية العباسية لقيتهم قافلين مدخل الميدان اللى تحت الكوبرى ... كملت لغاية كوبرى الفردوس عشان اخش من احمد سعيد لقيته زحمة
لفيت ورجعت أوتوستراد-رابعة-عباس العقاد وماكانش فيه أى مظاهرات
ولسه داخل البيت من ربع ساعة

دا انا حظى حلو

كنت نازل وحعدى من عند كوبرى الفنجرى وبعدين منزلتش !!!!

الحمد لله مش ناقصه عك

**tarekomar66** · 23-07-2011 02:11 AM

المشاركة الأصلية كتبت بواسطة wawoo

الصدام ليس مع الجيش ..جنود الجيش المصرى الشرفاء مع الثورة

الصدام مع هذا المجلس العسكرى الذى يحمى مبارك و عصابتة ..
مطلوب مجلس عسكرى موالى للثورة و يحميها فعلا لا قولا

ياعم ارحم نفسك شويه وهدينا شويه احسن العمليه مش ناقصه

**Amr Axel** · 23-07-2011 02:17 AM

ولعها ولعها شعللها شعللها
قولولي انهم بيهزروا
قولولي انهم بيهرجوا
قولولي انها دعابة

التظاهر و الاعتصام حق للشعب طالما بشكل سلمي
لا داعي لان يخرج الموضوع عن حجمه الحقيقي حتي الان

يا ريس حضرتك مش معانا و لا ايه هههههه
ده الناس عمالة في السويس و اسكندرية بيضربوا ازاز و طوب و كل ما تطولها ايديهم
و مش عارف كمان ايه اللي بيحصل عندنا في مدينة نصر غير ان فعلا كل المداخل اتقفلت

و البداية ان الناس في السويس حاولوا يدخلوا مديرية الامن بالعافية و لما الشرطة العسكرية منعتهم و قبضت ع 14 كله زاط فيها

هي شكلها كده مش هتخلص و هنفضل كده

و شكلنا هنقول هتوحشينا يا مصر

زغرطي يا ام ممدوح البلد بتروح
زغرطي يا ام عمار البلد بتنهار

**youssefmustang** · 23-07-2011 02:26 AM

عليه العوض ومنه العوض فيكى يا مصر ويا مصريين
خلاص الراجل غار فى داهية واتنحى هو والشلة الواطية بتاعته وابقو قابلونى لو اقل واحد فيهم اتحاكم دول عندهم استعداد يخلصو على نص الشعب ده نظام عالمى كبير مش مسألة مجلس عسكرى والكلام الهايف ده
ده نظام ماسونى ماشى على العالم اجمع
وياريت نهدى شوية عشان الجيش صبره بدأ ينفذ ولو نفذا هتبقى مجازر بالجملة وساعتها مش هينفع الندم ولا تقولى سوريا ولا ليبيا ولا العراق
وهبقى مبسوط لو حصل كده فى بتوع التحرير بالذات
ده رأى ومش عايز اى غلط لو هتنقد انقد بأسلوب كويس

**heshamzaky** · 23-07-2011 02:31 AM

لسة راجع من برة من شوية كنت فى مصر جديدة قريب من روكسى و بيتى فى مدينة نصر .
الدنيا مقلوبة فى العباسية دلوقتى و قفلو المداخل و شارع جسر السويس زحمة موت تقريبا قفلو الاتجاة الى ناحية العباسية . الحمد لله روحت لآنى حافظ مصر الجديدة و نزلت من عند محكمة مصر الجديدة الى الماظة دى فاضية جدا .
المسيرة تحركت من التحرير الى غمرة وصولا للعباسية و الجيش نزل مدرعات و قفل الكوبرى الى ينزل الى شارع صلاح سالم ,
عديت على شارع طومان باى أمام قسم الزيتون حوالى 15 ظابط واقفين خارج القسم و عربيات كتير شرطة واقفة اكيد خايفين ليحصل أى أنفلات أمنى زى المرات السابقة

**AmAhmed** · 23-07-2011 02:36 AM

المشاركة الأصلية كتبت بواسطة youssefmustang

عليه العوض ومنه العوض فيكى يا مصر ويا مصريين
خلاص الراجل غار فى داهية واتنحى هو والشلة الواطية بتاعته وابقو قابلونى لو اقل واحد فيهم اتحاكم دول عندهم استعداد يخلصو على نص الشعب ده نظام عالمى كبير مش مسألة مجلس عسكرى والكلام الهايف ده
ده نظام ماسونى ماشى على العالم اجمع
وياريت نهدى شوية عشان الجيش صبره بدأ ينفذ ولو نفذا هتبقى مجازر بالجملة وساعتها مش هينفع الندم ولا تقولى سوريا ولا ليبيا ولا العراق
وهبقى مبسوط لو حصل كده فى بتوع التحرير بالذات
ده رأى ومش عايز اى غلط لو هتنقد انقد بأسلوب كويس

+1
لكن السؤال حنهرب من المجلس العسكري نروح لمين .. مفيش حد مضمون .. البلد فيها ازمة قيادات في كل الاماكن و في كل التيارات .. بركات حكم مبارك ... الثقافة عند اغلبية الشعب 0 .. و مفيش قيادة يلتف حولها الناس و يثقوا فيها

**tarekomar66** · 23-07-2011 02:36 AM

الرحمه من عندك يارب واهدينا للطريق الصواب
الواحد مابقاش عارف مين مع مين ضد مين ؟؟؟
لسه الامل فى ربنا ثم الجيش
""اللهم ولى امورنا خيارنا ولا تولى امورنا شرارنا""

**heshamzaky** · 23-07-2011 02:42 AM

......... منقول ........
قوات الجيش تمنع المتظاهرين من الوصول إلى المجلس العسكرى
السبت، 23 يوليو 2011 - 00:10
قامت قوات الجيش والشرطة العسكرية بالتصدى للمسيرة المتجهة إلى المجلس العسكرى، وذلك من خلال منعهم من المرور من أمام مسجد النور بالعباسية، وقامت قوات الجيش بإطلاق الأعيرة النارية فى الهواء لتفرقة المتظاهرين.

يأتى ذلك بعد خروج مسيرة حاشدة من آلاف المتظاهرين مساء اليوم، متجهة إلى مقر المجلس العسكرى للتنديد بأحداث العنف والاعتقالات التى شهدتها مدينة السويس.

وكانت قوات أمن السويس مساء اليوم قد أحبطت محاولة اقتحام مبنى مديرية الأمن، ومنعت قيام مجموعة من المتظاهرين من اقتحام مبنى جهاز الأمن الوطنى بعد قيام المتظاهرين بإلقاء الحجارة وعدد من الزجاجات الحارقة "مولوتوف" فى اتجاه مبنى الأمن الوطنى والقوات التى تحميه وألقت القبض على 14 من مثيرى الشغب.