مراحل شراء النترا 2012 وتقرير عنها- هدية للمنتدى اللى ساعدنى كتير
السلام عليكم
اولا احب اشكر كل القائمين على هذا المنتدى لأنهم ساعدونى جدا بموضوعاتهم ان اقرر هشترى ايه
انا الحمد لله اشتريت الانترا 2012 اول فئة اوتوماتك وعملت بيها تقريبا 300 كيلو
مراحل الشراء بقى:
1- انا كنت معجب بنيسان صنى جدا ومنتدى نيسان هنا كان السبب الرئيسى وكنت على وشك اشتريها
2- بالصدفة كنت معدى جنب غبور اللى فى صلاح سالم لسه طالع من البنك فلقيت عربية واقفة بره اول مرة اشوفها اخد بالى منها اكسنت ار بى اعجبت جدا بشكلها وخطوطها الرياضية قلت ادخل اسئل عليها وكان فيه حد من sales بره سألته على السعر قالى 100750 قلت تمام قريب من سعر الصنى وعاجبانى ادخل بقى اعرف التفاصيل فى المعرض نفسه
3-انا دخلت وشوفت الانترا فيرانى واقفه جواه بامانه والله العظيم انا اتصدمت ايه الشكل ده وقولت اكييد سعرها معدى بسأل لقيت 120 المهو دخلت فيها وقعدت الف حواليها وكلمت اخويا يجيلى المعرض
4- انطباعى الأول عنها انها اختراع شكل اسطورى -سعر مش بطال- واسعه جدا - شنطة مهولة المساحة
5- بامانة مبقتش قادر مجبهاش وجيت دورت على كل المنتديات على عيوبها ومشاكلها ومشاكل التوكيل وفى الأخر توكلت على الله
6- بعد شوية لف يمين وشمال لقيت افضل سعر تسليم فورى هوا 124 مش عارف اذكر اسم المعرض ولا لأ
7- بعد انتظار كمان شوية عشان اللون انا كان نفسى فى ابيض بس عرفت ان الأبيض اللى موجود خليجى بس ولقيت سماوى كان عليها تحفة فربنا ييسر وكان موجود
8 استلمت العربية والمندوب شرحلى كل حاجه وانطلقت على بركة الله
انطباعاتى عن العربية ( انا خلفيتى بيجو - بس سوقت سيراتو وكورولا ولانسر فعندى خبرة بسيطة يعنى):
1- العربية جراية شعرة بنزين تلاقيها فتحت معاك
2- واسعة جدا ما شاء الله
3- العفشة ناعمة ومبسمعش صوتها الا لما اتغابى عليها فى نقرة عشان اجرب العفشة
4- التابلوه شكله جميل وبسيط وخطوطه انسيابية
5- الأبواب من جوا تقسيمة برضه انسيابيه تحس بخطوط رياضية جوه وبره كده
6- العربية عالية عن الأرض وحتى وانا مركب اتنين تقال ورا عالية ما شاء الله بس حكت فى مطب واحد بس كان عالى من النص وقصير من على الجنبين حاجه كده تعجيزية لأى عربية
7- الكشافات بتاعتها ممتازة
8- الفتيس ستيب تبرونيك جامد جدا فى الشد بس هوا وصل معايا لحد الخامس ومتهيألى المفروض انو اربع سرعات فياريت حد يبقى يشرحلى الموضوع ده
9- نور الصالون الداخلى والعدادات بيطفى بخفوت -بحس بنعومة التعامل يعنى العربية بتعاملك بنعومه
10- بحس انها عريضة وقعدت شوية على ما اخدت على ابعاد العربية
11- السماعات صوتها نقى وجميل
12- انا حاسس ان الفرامل بتاعته ممتازة حصل موقف كده كنت ماشى على 70 وواحد كسر فجأة وانا جنبى رصيف فرملت جامد ووقفت فى ااقل من متر ونص بس منكرش برضه انها زحفت
13- استهلاك البنزين ممتاز
14- حصلتلى بقى مشكلة واحدة(هيا مطلعتش مشكلة فى الأخر) لحد دلوقتى الحمد لله وحد من منتدى تانى ساعدنى فيها ولسه هجرب الحل ان شاء الله وهيا كالتالى:
اركنها فترة طويلة واجى استخدم الريموت الاقيه مش شغال اول ما افتح العربية بالمفتاح وحتى من غير ما افتح الباب الريومت يشتغل زى الفل-- نفس الكلام فى ساعة العربية كل ما اظبطها واسيب العربية فترة كبيرة 6 ساعات مثلا ترجع بايظة تانى-- ونفس الموضوع فى الراديو لما اظبطه على محطه معينة ارجع الاقى الراديو على اول محطه تانى
وزى ما قلتلك فيه حد قالى مشكورا ان دى مش مشكلة وهوا عاملنها كده قصد فى الريموت وبالنسبة للراديو فى حاجه تتعمل برضه لو اشتغل هقولهالكم ان شاء الله
وبكده انا خلصت لو حد عنده اى اسئلة او استفسارات انا تحت امركم
