قراءة للوضع............يا رب أكون غلطان

**أبو_حمزة** · 24-07-2011 05:07 PM

أولا و قبل ما اقول تحليلى لصورة الاحداث فى بلدنا اعرف نفسى و تكوينى الفكرى يمكن ده يفيد فى فهم وجهة نظرى أو يفيد اي حد يعرفنى انا غلط فى ايه أو حتى يشتمنى عشان الشتيمة تبقى على بينة. انا مهندس متزوج وبا اشتغل فى مكان كويس و مستورة و الحمد لله. نشأت فى بيت سلفى متدين من الطبقة المتوسطة حيث ابى و امى موظفين حكومة كل ما لديهم ينفقونه على تربية أولادهم. عرفت الاخوان كويس و والتحمت معاهم طول سنوات الجامعة لكن مع تقديرى لهم اختلفت معاهم فى المنهج. وكفاية كده
قريت الجرائد و اتفرجت على التليفزيون المصرى و الفضائيات ودخلت على المنتديات و سايتات الاخبار فى محاولة لفهم الوضع فى بلدى. لكن تفكيرى القاصر و ضعنى فى تصور ارجو ان اكون خاطئ فيه.
التفسير الوحيد المنطقى قدامى هو ان المجلس العسكرى قرر ان السلطة تفضل معاه تحت اى اسم. يمكن ده كان قرارهم من اول يوم و يمكن مجريات الاحداث حسستهم بامكان ده. لكن مفيش قدامى تفسير تانى. و لما بفتح عنيا و اتلفت حوليا بلاقى الوضع الاعلامى بقى شديد الشبه باول ايام الثورة. تظبيطات و اتفاقات و اتهامات و محدش شاغل نفسة لا بأدلة و لا بتحقيق.
ليه با اقول كده لانى شايف ان التيارات الاسلامية بتعمل و بيتعمل فيها نفس اللى حصل اول ايام عبد الناصر و السادات. اتفاقات و تطمينات ووعود بان الجاى ليكم و الشارع معاكم (لكن الخازوق جاهز و امن الدولة راقد فى الذرة). أما الاحزاب فكانت أصلا راضية بالفتات و حتة جزرة تتعلق تخلى الحمير تمشى وراها لاخر اليوم
الداخلية و امن الدولة زى ماهى و عندهم و عود انهم مفيش حد منهم ها يتلمس. و جاهزين يرجعوا فى الوقت المناسب بحملات الاعتقال و توضيب الساحة السياسية و زى ما خدموا امبارح بكره يخدموا اللى ماسك فى ايد الحبل و فى الايد التانية العضمة
بس الصورة كده ناقصها حتة عشان تكمل و التستيفة تتظبط....... العدو
فين العدو اللى نرعب الناس بيه و نعبيهم ضده و يقف الشعب يسقف و يستحمل ضرب القفا من ايد بتضرب العدو ده.
عبد الناصر و السادات كان العدو معاهم خارجى و كان مش محتاج رسم و لا افلام كتير. بس المرة دى مش عايزين ندخل فى متاهة مع حد يبهدلنا.
وهنا جت 6 ابريل تكمل الصورة. يمكن عشان هما عملاء فعلا و يمكن عشان هما من الضعف بحيث مقاومتهم تبقى فى الحدود المقبولة و يمكن عشان دماغهم ناشفة و الاتفاق معاهم صعب. الله اعلم انا ما اعرفش عنهم اكتر من اللى على الانترنت ووسائل الاعلام.
و لو نفتكر من كام شهر الحملة الاعلامية على السلفيين من اول الودن المقطوعة لحد برامج التوكشو. لكن يبدو لى ان المجلس فهم ان انتقاء عدو من التيار الاسلامى له عواقبه اللى ممكن تبوظ الطبخة كلها.
أما با افتح التليفزيون و الاقى ضيف بيتكلم عن المجلس وكأنه الامام المعصوم و لا يطلب منه دليل على اى اتهام. و بيتكلم عن العيال اللى سافرت امريكا و ما تفهمش عن الحرية غير علاقة الرجل و المرأة خارج الزواج. و الاقى احد اعضاء المجلس يقول طبعا معانا الادلة لكن مش ها نطلعها الا لما الوقت يبقى مناسب و امتى الوقت المناسب الاجابة احنا اللى نحدده
انت اتهمت ناس ووجهت الدعوة للشعب يتصدى لهم و يا اما الدليل قاطع ويروح النيابة يا اما انت كداب و عايز تحرق البلد لمصلحتك يا اما انت دلوقت مسرح رجالتك من امن الدولة السابق يجهزوا اى ادلة تمشى الحال.
يارب اكون غلطان
امين
امين
امين

**تامر.محمد** · 24-07-2011 05:10 PM

للأسف انت مش غلطان , انت صح 100% , و كل اللي بيحصل بيقول كده

**رزق** · 24-07-2011 05:16 PM

معاك قلبا وقالبا

**hossaam** · 24-07-2011 05:17 PM

احييك على تحليلك...اهم نقطة احب اعلق عليها هي التيارات الاسلامية ...اللي هتغلط نفس غلطتها كل مرة...
فعلا...السكينة سارقاهم للاسف على اساس ان الثورة خلاص اكتملت....وكنت اتمنى يكونوا على قلب رجل واحد مع بقية التيارات...من لا يتعلم من دروس التاريخ...يستااااااااهل اللي هيجراله

**dr.amr** · 24-07-2011 05:21 PM

نص الموضوع منقول من مجلة روزاليوسف
http://www.akhbarak.net/articleview.php?id=2647559
استبعد الطبيب الألماني ماركس بوشلر الذي زار الرئيس المخلوع للمرة الثالثة الأربعاء الماضي حاجة مبارك لإجراء عملية جراحية وذلك بعد أن انتشرت الخلايا السرطانية في أنحاء جسده انطلاقاً من البنكرياس الذي استأصل منه ورم سرطاني خبيث أثناء فترة علاجه في ألمانيا وكشف التقرير الطبي الذي أعده بوشلر ويعتزم فريد الديب محامي الرئيس المخلوع ارفاق نسخة منه بمذكرة الدفاع وكذلك اخطار النائب العام به أن مبارك يعاني من غيبوبة متصلة وأصبح فاقداً للتركيز في لحظات افاقته ولا يستطيع الحركة.

كما اكتفي الطبيب الألماني ماركس بوشلر بالاعتماد علي أدوية يتناولها مبارك من خلال المحاليل معتبراً أن حالته الصحية متأخرة جداً ومن الصعب إنقاذ حياته.

وقالت مصادر مقربة من أسرة مبارك أنه من المتوقع تأجيل محاكمة مبارك بعد أن أصبح فاقداً للوعي وفي حالة صحية لا تسمح بمحاكمته أو نقله إلي مجمع محاكم شرم الشيخ كما تردد مؤخراً.

**mazagngi2010** · 24-07-2011 05:26 PM

متفق مع معظم كلام صاحب الموضوع والردود اللى سبقتنى
المفروض الناس تفوق دلوقتى وبالذات الاخوان لان السكينه سارقاهم واتكرهوا من ناس كتير

**TFSI** · 24-07-2011 05:42 PM

كلام صح 100% بس أنا متفائل خير بإذن الله لأن الأساليب اللى بيستخدموها عفى عليها الزمن وبيعملوا نفس الغلطات السازجة اللى عملها مبارك فى أول الثورة ، والشباب دلوقتى عندهم وعى جامد جداً والأهم من كدة إنهم كمان متوقعين الكلام ده ومش ممكن يتنازلوا عن الثورة بسهولة ، بالإضافة إنى متأكد إن القيادات الوسطى فى الجيش مش عاجبها تصرفات المجلس العسكرى وما عنديش دليل غير اللى حصل أيام الثورة من ظهور ظباط كتير مش راضيين عن الوضع ومنهم من طالب المشير كمان بالرحيل .

وما تنسوش إن الثورة دي نجحت أولا بتوفيق من ربنا وثانياً بغباء النظام فى التعامل مع المظاهرات ومن رأيى إن الغباء مستمر

-

-

الموضوع: قراءة للوضع............يا رب أكون غلطان

LinkBack

أدوات الموضوع

عرض

قراءة للوضع............يا رب أكون غلطان - انشر الموضوع فى :

-

-

-

-

المواضيع المتشابهه

هل ينفع وانا ماشى على ال d انقل للوضع المانيوال ولا غلط

يا ريت لو غلطان أعرف غلطان فى ايه؟؟؟

أنا vs أطفال الشوارع (أكون أو لا أكون)

الكلمات الدلالية لهذا الموضوع

المفضلات

المفضلات

ضوابط المشاركة