تقوية شبكة المحمول فى المنزل و فى الدور الارضى عموما ؟؟؟؟

بسم الله الرحمن الرحيم
السلام عليكم ورحمة الله وبركاته
عندى العيادة فى منزلى فى الدور الارضى و تكون الشبكة ضعيفة و تكاد تكون معدومة لدرجة انى بحط الموبيل فى الشباك و بتكلم عن طريق البلوتوث (الشباك على مسقط واسع حوالى 12 متر مربع ) مع العلم ان الشبكة فى الادوار العليا كويسه

و فى ايام الحر و الرطوبه دى بتكون الشبكة اوقات كتير مش موجودة ياريت يكون هناك جهاز لتقويتها
هل من احد لديه اية معلومة يفيدنا بها او نصيحة لتقوية الشبكة لانى سمعت ان فيه اجهزة بس غالية و مش فى مصر عموما
الهاتف نوكيا و الشبكة اتصالات

؟؟؟؟؟؟؟؟؟؟؟؟؟؟؟؟؟؟؟؟؟؟؟

انا دورت لحضرتك على النت و فعلا في جهاز بيعمل كدا
شوف اللينك دا كدا:
فرصة جهاز تقوية اشارة شبكات الموبيل وزيادة التغطيه يعمل على نظام3g - موقع الدي في دي العربي - DVD4ARAB.MAKTOOB.COM

الموبايلات القديمه كان ليها كاركيت لتقويه الشبكه وده لان زمان كانت الشبكه زفت

لكن الان الشبكه افضل فعشان كده مش بينزل ليها كاركيت

بس اكيد فيه شبكه عند حضرتك اقوى من اتصالات استحاله ال 3 يكونو مش موجودين

الحل الجذرى هو انك تشوف الشبكة الأقوى فى ظروف العيادة وتحول لها بنفس الرقم.

اقتباس:

---

المشاركة الأصلية كتبت بواسطة egyzizo

الحل الجذرى هو انك تشوف الشبكة الأقوى فى ظروف العيادة وتحول لها بنفس الرقم.

---

التحويل بنفس الرقم دى اشتغاله كبيره جداااااااااااااااااااااا

حضرتك ممكن تكلم خدمة العملاء بتاعت شبكتك و تشرح له الموقف و تديله العنوان .. هو بينسق مع مهندس برج التقوية لاعادة التوجيه و الضبط علشان الشبكة تزيد في اتجاه حضرتك
تمت قبل كده مع احد الاصدقاء مع شبكة موبينيل و الشبكة اتحسنت عنده

اقتباس:

---

المشاركة الأصلية كتبت بواسطة احمد المصرى

التحويل بنفس الرقم دى اشتغاله كبيره جداااااااااااااااااااااا

---

ليه بس
ايه اللى بيخلى حضرتك تقول كده
انا حولت من موبينيل الى اتصالات بنفس الرقم من حوالى 6 اشهر و كله تمام لا فرق بين الاتنين فى الاماكن المعتادة
مشكلتى مع العيادة من زمان و لا زالت

بتكلمهم يا دكتر وبيبعتولك مهندس بيديلك جهاز زي الراوتر بتمضي على انه عهدة عندك وبيعمل على تقوية الإرسال انا عامله عندنا في الشكرة ولكن بصراحة لو سألتني كفتة خالص !!! جربه يمكن ينفع مع حضرتك بشكل افضل ..

حضرتك لو خدنا وصله سلك من طبق بتاع دش ووصلناها لإريال داخلى(يمكن عمله يدوياً)وحطينا الموبيل جمب الاريال الداخلى الشبكه هتكون كويسه جداً جداً وعن تجربه يعنى ممكن حضرتك الاريال يتحط على مكتبك وتتكلم من السبيكر أو الهاندى فرى

يا دكتور فيه حل اسهل بكتير جدا من كل الدوشة دي .
انت هتروح تعمل حاجة اسمها ديوال سيل ( شريحتين بنفس الرقم ) و تروح جايب بريماسيل و تحط فيها الخط التاني و تعلقها على الحيطة قريب من الشباك و توصل عليها تلفون عادي ....

اكسس واحد يعمل على تقوية كل الشبكات حتى مع القمر الصناعى جرب وادعى لله

اقتباس:

---

المشاركة الأصلية كتبت بواسطة هيثم المنياوى

حضرتك لو خدنا وصله سلك من طبق بتاع دش ووصلناها لإريال داخلى(يمكن عمله يدوياً)وحطينا الموبيل جمب الاريال الداخلى الشبكه هتكون كويسه جداً جداً وعن تجربه يعنى ممكن حضرتك الاريال يتحط على مكتبك وتتكلم من السبيكر أو الهاندى فرى

---

المعادن بتعكس اشارة الموبيل مش بتنقلها

كلم الشركة و قولهم ان المنطقة كدا "لو عندهم دم" هيبعتولك واحد يقيس الاشارة عند حضرتك و يحرك الantenna عشان التغطية تبقى افضل

اقتباس:

---

المشاركة الأصلية كتبت بواسطة هيثم المنياوى

حضرتك لو خدنا وصله سلك من طبق بتاع دش ووصلناها لإريال داخلى(يمكن عمله يدوياً)وحطينا الموبيل جمب الاريال الداخلى الشبكه هتكون كويسه جداً جداً وعن تجربه يعنى ممكن حضرتك الاريال يتحط على مكتبك وتتكلم من السبيكر أو الهاندى فرى

---

بارك الله فيك أخى الحبيب
يعنى آخد وصلة من مخرج الدش (كأنى هوصلها على رسيفر ) و اوصل السلك باريال تليفزيون ( عندى واحد قديم ) و ممكن أحط الاريال فى المسقط جنب الشباك مثلا
و هل نفعت هذه التجربة معك شخصيا ؟؟؟

اقتباس:

---

المشاركة الأصلية كتبت بواسطة tjp

اكسس واحد يعمل على تقوية كل الشبكات حتى مع القمر الصناعى جرب وادعى لله

---

مش فاهم يعنى ايه كلام حضرتك ...ممكن توضيح يا بلدياتى

اقتباس:

---

المشاركة الأصلية كتبت بواسطة mazagangee

يا دكتور فيه حل اسهل بكتير جدا من كل الدوشة دي .
انت هتروح تعمل حاجة اسمها ديوال سيل ( شريحتين بنفس الرقم ) و تروح جايب بريماسيل و تحط فيها الخط التاني و تعلقها على الحيطة قريب من الشباك و توصل عليها تلفون عادي ....

---

مش فاهم حاجة ايه هو البريماسيل انا اخرى عارف الشيكولاته الفارماسيل بصراحة و التليفون العادى يطلع ارضى و لا محمول

متابع

-

الحلول كتير يادكتور أحمد

فكره سلك الإريال دى رقم واحد ومجربه على الموبايل واليو إس بى مودم

فكره جهاز البريماسيل رقم أتنين بس على حد علمى تم وقف بيع الجهاز جديد

وممكن تتصل بالشركه بيوفروا لحضرتك أنتينا صغيره تتحط عندك فى المكتب

بس للإمانه إحنا عملناها مع فودافون ببلاش

عشان معانا حوالى 700 خط بزنس منهم

أنا جربت سلك الاريال بوصلة من الدش على اريال تليفزيون قديم ...... و لا الهوى مفيش فرق خالص؟؟؟

لازم الإريال الداخلى للموبايل

يلامس السلك من الخارج

يعنى التليفون يتحط على السلك وشاشته لفوق

وغالبا جزء الشبكه الداخلى بيكون أعلى بطاريه المحمول

أنا مجربها عندى وشغاله تمام

المشكلة دى قرفنى بجد فى الموقع اللى انا شغاله فيه لكن اكتشفت حل لذيذ ان الشبكة بتقوى جدا و انا واقف جنب اى حاجة نحاس او المونيوم

ابسط مثال فيه مبنى خرسانى بالكامل و بخش جوه اشارة اتصالات تقطع تماما لقيت بتاع 30 كيلو بارات نحاس فى عمق المبنى متشونين , اول ما اقف جانبهم الاشارة تيجى كاملة و المكالمة صوتها حلو . ابعد الاشارة تختفى

ابسط الحلول التحويل لشبكة تانية انا بفكرا جديا احول من اتصالات لفودافون , اكيد هتلاقى عندك شبكة اقوى من ال 3 مش معقولة الكل قاطع

أنا بحط الموبيل على شباك الوميتال بس لا حياة لمن تنادى
تقريبا الشبكة بتبقى موجودة ربع الوقت بس و الباقى الله المستعان

اقتباس:

---

المشاركة الأصلية كتبت بواسطة د.أحمد السعيد

بارك الله فيك أخى الحبيب
يعنى آخد وصلة من مخرج الدش (كأنى هوصلها على رسيفر ) و اوصل السلك باريال تليفزيون ( عندى واحد قديم ) و ممكن أحط الاريال فى المسقط جنب الشباك مثلا
و هل نفعت هذه التجربة معك شخصيا ؟؟؟

---

بالظبط يادكتور زى ماحضرتك بتقول وأنا مجربها شخصياً وكمان كنت عامل اريال يدوى وحاطه فوق البيت
فأكيد الوصله من طبق الدش هتكون نتيجتها أفضل بكتيييييير

اقتباس:

---

المشاركة الأصلية كتبت بواسطة هيثم المنياوى

بالظبط يادكتور زى ماحضرتك بتقول وأنا مجربها شخصياً وكمان كنت عامل اريال يدوى وحاطه فوق البيت
فأكيد الوصله من طبق الدش هتكون نتيجتها أفضل بكتيييييير

---

جربته مش فارق حاجة خالص ؟؟

اقتباس:

---

المشاركة الأصلية كتبت بواسطة د.أحمد السعيد

جربته مش فارق حاجة خالص ؟؟

---

لا كدا الشبكه زعلانه من حضرتك يادكتور
لإن الموضوع ده كان بيجيب نتيجه جامده جداً معايا
يعنى حضرتك من حوالى 10 سنين كان معايا اريكسون688 كان بيخليه يجيب 3شرطات ولا كإنك واقف فوق البرج

شكلها زعلانه خالص.؟؟.

اقتباس:

---

المشاركة الأصلية كتبت بواسطة د.أحمد السعيد

شكلها زعلانه خالص.؟؟.

---

معلش يادكتور كان نفسى أساعدك والله

اعرف كذا احد عنده نفس المشكلة وبيكلم الشبكة وبيقولها المشكلة وهما بيجوا يركبوا عنده جهاز بيقوى الاشارة الخاصة بالشركة دى فقط، مش عارف بقى نظام الجهاز بفلوس ولا ايه بس فيه واحد من اللى اعرفهم قالى عشان انا ليا علاقات بالشركة فركبوا الجهاز عندى من غير حاجة.

بس فيه عضو كريم هنا قالى انهم بيمضوك على ان الجهاز عهدة عندك، كلمهم وشوف الوضع ايه

يا بلدياتى ؟؟؟؟؟؟؟؟ههههههههههههههههه ههههههههه

انا عندي في البيت كانت شبكه موبينيل مش بتشتغل غير في البلكونه
اتصلت بيهم وعملت شكوي وقالولي مش عارف في شهر كام حيظبطوها
وفعلا اتظبطت
بس عاوز اقولك اني كان مره معايا موتورولا c117 كان بيجيب شبكه جوه الشقه
وفي المحل برضه فودافون كانت منعدمه جوه المحل ونفس الموبايل كان بيجيبها تمام
شوفلك حاجه من الموتورولات الرخيصه
شبكتها جباره
وبيتهيالي انه ممكن يلقط شبكه من غير شريحه
صحيح
نوع موبايلك ايه ؟

اقتباس:

---

المشاركة الأصلية كتبت بواسطة tjp

يا بلدياتى ؟؟؟؟؟؟؟؟ههههههههههههههههه ههههههههه

---

مفهمتنيش ايه هو الاكسيس؟؟؟

اقتباس:

---

المشاركة الأصلية كتبت بواسطة SHNORY

انا عندي في البيت كانت شبكه موبينيل مش بتشتغل غير في البلكونه
اتصلت بيهم وعملت شكوي وقالولي مش عارف في شهر كام حيظبطوها
وفعلا اتظبطت
بس عاوز اقولك اني كان مره معايا موتورولا c117 كان بيجيب شبكه جوه الشقه
وفي المحل برضه فودافون كانت منعدمه جوه المحل ونفس الموبايل كان بيجيبها تمام
شوفلك حاجه من الموتورولات الرخيصه
شبكتها جباره
وبيتهيالي انه ممكن يلقط شبكه من غير شريحه
صحيح
نوع موبايلك ايه ؟

---

شكرا يا قرصان
موبيلى نوكيا 6500s

البريما سل مخالف لقانون الاتصالات

اقتباس:

---

المشاركة الأصلية كتبت بواسطة a.saad

البريما سل مخالف لقانون الاتصالات

---

يا اسيادنا متفهمونا هو ايه اصلا البتاع دا علشان نعرف هو مخالف و لا مش مخالف
الله يسامحك يا فتحى ؟؟؟

متابع