أخيرا جبت بيانات الـ 4 سماعات اللى عندى فى العربية ... وعاوز استفسر ليهم على الجى ام

معلش انا عارف ان متقل عليكم والله بس لان ماليش غيركم اسئاله والله

والسماعات اللى عندى
2 سونى أكسبلود تايلاندى ( بيانتهم ) كالأتى:
peak power 400w
rated power 100w
impedance 4 o اللى مفتوحة من تحت حرف O

و 2 بايونير صينى تقريباً مش باين عليهم بلد المنشاء بس أنا كنت شاريهم من الأرخص بالتوفيقية من سنتين تقريباً.
بيانتهم كالأتى:
300w
max
40w nom
4 o اللى هييا مفتوحة من تحت حرف O

ياريت احسن وانضف نوع جى أم يركب عليهم يكون 4 تشانيل عشان طبعا عاوز أحس أن فى فرق ونقاء فى الصوت بس مع العلم ان مش هاقدر اغير سماعات منهم انا نفسى اجيب جى ام ليهم كلهم مع بعض يكون 4 تشانيل يكون نوع كويس ومحترم وكلهم يتوصلوا عليه.

مش هينفع توصل السماعات الباايونير على الجى ام هتطيير انشااء الله ههههههههههههههه
السماعات البااايو تتشتغل على الكاسيت وهيديها باور منااسب اوى انما السونى تجبلها جى ام سونى 350 وات او كينود 350 وات 2 تشانل بس وعييش ياريس

وكد كده السماعات ال 300 مش محتاجة باور علشاان تقووم يادووب 40 ار ام اس والكاسيت 22 ار ام اس ولازم يبقى فيه فرااغ شوية بين الار ام اس يعنى مش سماعة تبقى 100 ار ام اس اديها 100 ار ام اس ههههههههههه يبقى طير وعيش بس لازم تسييب 20 ار ام اس كده السماعة تتحرك فيهم بس

الله ينور عليك يا معلم بيسو يافنان
ربنا مش يحرمنا مننك ولا من خبرتك ولا من كلامك الجميل دا
طيب انا لو فكرت اركب مثلا السماعات السونى أكسبلود اللى عندى دى اركب عليهم جى ام يكون 4 تشانل وصب كدا حاجة معقولة وصغننة انتا ايه رائيك فى كدا وياريت الجى ام يكون حاجة محترمة ومتجربة لان بصراحة مقلق وكل واحد يقولك دا كويس ودا وحش ودا مش عارف ايه لما خلاص دماغى ورمت منهم خلاص
يعنى انا عاوز للسماعات جى ام 4 تشانل وصب حاجة الحسبة كلها مش تعدى الـ 600 جينه أنتا عارف اللى خارج من تجديد وتظبيط بيكون خارج مننه منفض وانا على رائيك عاوز أعيش بقا وكمان لان وانا فى سيتى ساوند لاقيت عنده صب ماركته سيتى ساوند 1200 واط 12بوصة عامل 160 جينه ولا انتا ايه رائيك بس أنا عاوز حاجة مش تعدى المبلغ دا ولو على قد سماعات البايونير متفق معاك واوصلهم على الكاسيت مافيش مشكلة
ولا أنتا ايه رائيك ترشحلى ايه على قد الملبغ البسيط دا

ومستنى ردك يا فناااااااان

صحيح نسيت اسئالك يا بيسو معلش
لو حصل فعلا وجبت صب يكون مثلا 12 بوصة وركبته ورا على الرف مع السماعات هيكون صوته حلو ولا لازم الصب علشان يطلع صوته الفعلى صندوق وفى الشنطة
ولو فكرت ان أبيع السماعتين البايونير اللى عندى دول سعرهم كام تقريباً هو حالاتهم نضيفة جدا

انت ممكن تجيب الجى ام ال 4 تشانل مستعمل بقى
و تجيب الصب السيتى ساوند ده
و تعمله صندوق كويس او تحطه فى تيوب بازوكا
و اعتقد ان الميزانيه ممكن تزيد من 50 الى 100 كمان
عشان الصندوق و الوصلات و السلوك
و مصنعيه تركيب


و السماعات جديده فى التوفيقيه ب 200- 220
اعتقد برضه ان سعرهم مستعمل مش هايبقى مرضى اوى
ممكن بالكتير اوى لو حالتهم كسر زيرو
يبقى 150

انت لا تجيب جى ام ولا حاجه....لو عندك كاسيت محترم هيقوم السماعات...فى حد يجيب جى ام لسونى 400 يارااجل...عايز تجيب جى ام هات صب

الف مليون شكرا يا أستاذ beetleMOSH على ردك وأهتمامك ومتابعتك
بس أنا ماشاء الله السماعات حلوة أوى معايا وكمان خرج الكاسيت كويس جدا الحمدلله بس عاوز أحس الأداء وكمان أحس بالفرق دا ويكون ملحوظ معايا فا إيه رائى حضرتك لو جبت جى أم بس زى ما بيسو رد علييا وقالى ان أجيب جى ام سونى او كينوود يكون 350 وات 2 تشانيل للسماعات السونى اكسبود والبايونير هاوصلهم على الكاسيت هيكون كويس والاداء أحسن وهحس بيه لان بصراحة انا مش بحب ولا بفكر فى موضوع الصب ولا البازوكا
ولو هاجيب الجى ام 2 تشانيل انتا ايه رائيك أجيب انهى نوع فيهم وهل ينفع ان اجيب جى ام 400 وات وبرضو يكون انهى نوع وهل هيكون احسن من 350 وات على السمعاتين السونى أكسبلود


انا بشكر حضرتك يا أستاذ ahmed_nubira على ردك ومتابعتك بس انا مش عاوز البيز الضخم اوى دا اه عاوز بيز بس يكون فى الحنين يعنى دى فى الاول والاخر 128 يعنى الكلام دا هاخليه للتقيل بقا العربية الجاية

فى أنتظار الرد ومتاااااابع

اقوولك بقى على فكرة صايعة انت تجييب جى ام سونى 600 وات ماشى وتجيب سماعاتني سونى 300 وات فى البااب مقااس 16 وتوصلاهم بالبايونير وتقوم موصلهم بالجى ام فاهم حاجة ؟؟؟ والسونى ال 400 اللى عندك توصلهم على تو تشاانل وممكن توصل السماعات السونى ال 300 والبايونير ال
300 بالجى ام بردجد وهيقله معاك تمام وهتاخد احسن بااور من كل اللى عندك

اولاً انا مش عارف اشكرك ازاى والله يا بيسو ولا ارد جمايلك دى ازاى ومتابعتك وأهتمامك يا معلم والله انتا فنااااااااااااااااااااان

وثانيا خلاص يابيسو أنا أقتنعت بوجهة نظرك الأولى ان هاوصل البايونير على الكاسيت وهو انا فاكر ان كان مكتوب على العلبة 25*4 يعنى أعتقد انه من كلامك كدا حلو اوى اوى اوى عليهم
وكمان انا مفهمتش حاجة من فكرتك الصايعة يامعلم طبعاً بس كله يهون فى سبيل أن أحسن جودة وكفاءة الصوت
وهاجيب خلاص أن شاء الله للسماعات السونى اكسبلود جى ام 350 وات زى مانتا قولتلى وانا اقتنعت بكلامك وكدا فل اوى ولا الفرق فى الصوت مش هيكون ملحوظ علشان انا خلاص هنزل اشترى اخر الاسبوع إن شاء الله

بس فى مشكلة أخيرة بقا محيرانى هو أن أجيب الجى ام دا أجيبه سونى ولا كينوود طبعا عاوز الأحسن فيهم وياريت لو يكون بعيد عن الصينى وكمان لو فى مكان كويس أجيب مننه ولا انزل اجيب من سيتى ساوند اللى فى شارع الازهر وتقريبا هيكون فى حدود كام

ومعلش بقا أن تقلت عليك يا معلم بيسوووو وبعتلك الاضافة على الفيس بوك ويشرفنى اننا نتكلم عليه قريب

هوا انت ايسو محمد ؟؟؟؟
بالنسبة بقى للموضوع الاتنين هما هما مافييش اى فرق الفكرة ان الجى ام السونى اكبر من اليكنود الجى ام الكينود صغير بس وانت وراحتك بقى الاتنين اداء واحد ماتقلقش بس وانا تجت امرك فى اى حاجة ياكبييير وعايز تنزل انزل التوفيقية جيبه من هناك من محل الارخص او ارخصهم اى حاجة وعيش وتبقى تقولنا عملت ايه

ايوة يا معلم بيسووو انا اللى اسم بروفيلى Esso mohamed

وتسلم يا معلم وربنا يخليك لينا وللشعب ولكل الغلابة