تجربتى مع طلوع الروح (قصدى الرخصه)

**Shady_mas2000** · 25-07-2011 02:18 AM

فى البدايه بحمد ربنا وبشكره لأنه الهمنى الصبر
والتوفيق فى انى اخلص الموضوع ده على خير
من غير ما ارتكب ولا جريمه واحده...
بجد يا جماعه الموضوع مرهق ومتعب لأقصى حد ممكن
وللأسف كان فكرى ان كل حاجه اتغيرت بعد اللى البلد
مرت بيه فى الايام اللى فاتت لكن للأسف مفيش جديد
بل بالعكس فيه مواضيع زادت اكتر من الاول بكتيييير
الرشوه والواسطه وزى ماتقول قول..

**Shady_mas2000** · 25-07-2011 02:20 AM

نيجى الاول لرخصة المكنه:
بصراحه اللى اجبرنى ارخصها ان سمعت ان الافراجات
اتحرقت ايام الثوره وكل اللى عنده مكنه افراج لازم يلحق
يرخصها الايام دى عشان الموضوع هيبقى صعب اوى
وفعلا روحت مرور العجمى عندنا فى اسكندريه وكل اللى
عملوه ادونى رخصه 3 شهور لحد ما اجيب الافراج من بورسعيد
بالرغم انى مقدم على سنه وفعلا روحت بورسعيد ولقيت الورق
راح مرور رابعه العدويه فى مدينة نصر وملقتش اى حاجه اقدر اعملها
بس بصراحه احسن حاجه حصلتلى اليوم ده انى قابلت اخويا وحبيبى
محمد الفاتح اللى وقف معايا اليوم ده وقفه مش هاقدر انساها..
واستكمالا لبقيت المشوار استغليت فترة وجودى فى القاهره وروحت
مدينة نصر مرتين مره عشان استعلم عن الورق وارسله لمرور العجمى
والمره التانيه لما روحت العجمى ولقيته لسه ماوصلش اضطريت اروح تانى
بعد ما الموظفه سخنتنى وقالتلى روح اشتكيهم واعملهم فضيحه عشان
هما مش هايبعتو حاجه غير لما تدفع وفعلا روحت اشتكيت للمدير على طول
لقيت الورق وصل بعدها بحوالى اسبوع لما نزلت الاجازه والحمد لله
قدرت بعد عناء طويييل انى استكمل ملف المكنه وارخص لمدة سنه..

**Shady_mas2000** · 25-07-2011 02:20 AM

بالنسبه للرخصه بتاعتى:
بصراحه كان الموضوع كوميدى من اول مره روحت فيها
كنت مذاكر الاشارات كويس ورحت لقيت الناس خايفه
قمت وقفت بينهم وخطبت فيهم وقعدت اراجع معاهم واشرحلهم الاشارات
واحطلهم قواعد يمشوا عليها ههههههههههه والمصيبه بعد كل ده اطلع
انا الوحيد اللى سقط من المجموعه كلها هههههههههه والكمبيوتر بتاع
الامتحان كان يوميها عطلان والعبد لله عمل فيها عنتر راح مصلحه
وريتنى ما صلحته هههههههههههه المهم اخدت تاجيل 3 شهور
وروحت اول امبارح امتحن تانى ونجحت المره دى والحمد لله
ورحت على طول السواقه ولفت نظرى حاجه غريبه فى حياتى مشفتهاش
تخيلوا امتحان سواقة العربيات عندنا فى محرم بك بيخلوا الناس تسوق
عربيه نقل كبيره ههههههههه اه والله عربيه man التريللا بس من غير
مقطوره الحمد لله قدر ولطف ههههههههه المهم الراجل قاللى روح وتعالى
بالموتوسيكل بتاعى قام مدينى لائق على طول وطلعت الرخصه فى نفس اليوم
ودى كانت اسهل حاجه حصلتلى فى حوارات المرور دى....
باقى بس حاجه عاوز اضيفها ان القدر والنصيب خلانى اخلص اخر
خطوه فى الرخصتين فى يوم واحد روحت العجمى ومحرم بك وسبحان الله
خلصوا الاتنين فى يوم واحد هو اول امبارح السبت وطبعا الحمد والشكر كله لله
اللى وفقنى فى كل المشاوير دى باقى بس ابيع المكنه بقه بعد ماخلصت ورقها
وابدا افكر فى حاجه جديد باذن الله...باركولى بقه ياجماعه