السلام عليكم ورحمة الله.....

احب احكيلكم عن تجربتي اليوم مع توكيل العبور ....
توجهت اليوم الساعة 11 الا ربع الصبح مع ان ميعادي كان تسعه ونص بس الطريق من المعادي طويل جدا مع ان المقطم اقربلي بكتير جدا الا اني بفضل العبور...المهم انتظرت كتير لحد ما اتنده رقمي واللي ندهه مهندس محمد بهجت وكنت متضايق لاني بفضل مهندس احمد لانه الصراحه فااااااااااااااااهم جدا وزوق اخر حاجه

كانت المشكله ان العربيه عامله 17500 معملتش صيانة العشرة وغيرت زيت بره ومحدش عرف يغيرلي الفلتر + سخونة عند الدواسات والعضوين المحترمين Xlance2010 واستاذ مصطفى سعد قالولي انها مشكله مكررة وهتتحل + الجلده بتاعة الزجاج الامامي مخلوعه + كليبسة تثبيت حامل الكبوت مخلوعه ومطلع عيني في قفله وفتحه + مساحه من المساحات قاعدتها الجلد اتقطعت...

مهندس محمد قالي هنعمل صيانة ال 15 وهسالك ع الفلتر فوجئت بيه بيقولي اول مرة اسمع عن شكوى السخونة عند الدواسات دي..دي حاجه جديده خالص..انا تنحت الصراحه وقلتله دي شكوى شائعه في ال 2010 كلها وانا متاكد راح قالي هسالك...

انا الصراحه رحت رايح لمهندس احمد الراجل الفاهم ،،قبل ما كمل الجمله قالي نركبلك لباد...وخد مني اورنيك الصيانه وقالي من عينيا..الصراحه بني ادم زوق جدا...مع ان العربيه مش هو اللي مدخلها...

بالصدفه رايح لمهندس محمد اساله ايه الاخبار لقيته قاعد جنب واحد مهندس كبير دايما بشوفه وعينيه ملونه بس معرفش اسمه سمع الحوار راح قالي مغيرتش فلتر يبقى لازم تغيره وتغير الزيت تاني حتى لو بدري عشان الموتور وراح قايل اعمله يا محمد صيانة العشرين وقالي ممكن تستنى الف كيلو بعد ال 27500 وتعمل صيانة ال 30 على 28500 او 29000 الصراحه اقتنعت بكلامه وقلت ماشي ولو اني مكنتش عامل حسابي في الفلوس بصراحه بس اتسترت من مكنة اي تي ام جنب التوكيل...

قدت لحد الساعه 2.30 او تلاته الا ربع وباعدين مهندس محمد نده اسمي لولا اني سالته ايه حصل في العربيه ولا كان قالي حاجه...وباعدين قالي فلتر هوا وبنزين وبوجيهات وزيت وفلتر واللباد اتركب ( قال يعني كان عارف موضوع اللباد اصلا) ما علينا دفعت 715 جنيه ( المفروض في عرض خصم 20% على الفلاتر خلال شهر يوليو وانا فلتر الزيت شاريه من زمان وما اتركبش ) واستلمت العربيه ورحت لقيته معملش حاجه للمساحه مع اني قايله قالي اااه صح معلش اروح اجيبهالك هي ب 66 جنيه راح ندهلي واحد تاني جابهالي وراح ركبها بنفسه وباعدين قلتله بالنسبه لحامل الكبوت وجلدة الزجاج قالي روح قسم السمكرة وهما يعملوهالك ( مهندس احمد قبل كده راح معايا قسم السمكرة وفضل واقف معايا هناك لحد ما المشكله اتحلت مع اني ولا اعرفه) رحت لقيت مهندس قالي استناني اخلص تليفون....( لا تعليق) وباعدين قالي كليبسة حامل الكبوت مش موجوده هطلبهالك وتعالى بعد 20 يوم ( عاوزني ارجع المشوار ده كله عشان كليبسه) قلتله يا عم ملهاش اي حل تاني قالي لا ولزقلي جلدة الزجاج الامامي...بساله على عفصه عندي في الباب والرفرف الخلفي يمين تترد ع البارد ومفهاش مشكله قلتله تتكلف كام في التوكيل قالي 1400 جنيه غير الضريبه قلت الله يكفينا شر الحوادث وشرور الطريق وما يحوجنا للتوكيل ابدا الا في الصيانه وتوكلت على الله...