أؤومر يا جميل
طيب ما تجاوب
عرض للطباعة
المهم احنا هنعمل ايه بالظبط؟
عمرو قالى انه هيكتب اللى حصل فى المقابلة وهنبعته لمازدا
ان شاء الله لما عمرو يكتب الايميل ( على فكرة اسلوبه ممتاز والله ) هنقعد نتكلم فيه ونتناقش مع بعض،،، وربنا يسهل كل امر عسير ان شاء الله
تمام اوى ياجماعه الشغل ده وانا منتظر الجديد و لو فى حاجه اقدر اساعد فيه انا معاكم
صباح الفل يا رجالة
انا بعتذر اني متأخر في موضوع كتابة النقط اللي اتكلمنا فيها مع غبور لحد دلقوتي ، بس والله ضغط الشغل عندي مش طبيعي وبروح كل يوم الساعة 10 و 11 بالليل ، ومش عايز اكتب التقرير بكروتة عشان بجد الكلام محتاج تركيز ويترتب صح عشان لما مازدا اليابان يشوفوه يحترمونا و مايقولوش علينا بنهذي و يعرفوا ساعتها ان غبور بيستهبل في شوية حاجات
ان شاء الله بالكتير يوم الجمعة ( او قبل كده) بإذن الله يكون التقرير مكتوب ومبعوت للكل عشان نقراه ونتناقش فيه قبل مانبعته لغبور عشان نتفق عليه ونبعته لمازدا اليابان ان شاء الله
ولسه المشوار طويل ، بس مش اوي ، لأن فعلا زي مالناس قالت الشكوى شكلها نفختهم !! احنا مش عايزين نإذي حد ولا احنا بنطالب بحاجة مش من حقنا ولا نحب اننا نخسر حد ! بس لما بيقولي انهم ياعيني حاطين نسبة ربح قليلة اوي عشان يعرف يشتغل !! يعني بنسبة الربح القليلة دي والأسعار غالية كده ، اومال لو نسبة الربح كانت زيادة شوية كانت الأسعار بقت زي الجيتا والبي إم ولا ايه ؟؟ ( :toot: )
وموضوع موديلات ال bK انهم مايستنوش اكتر من كده دي رد غريب فعلا ؟؟ اومال انت توكيل ازاي يعني ؟؟؟ هو ايه مفهوم الوكيل ؟؟
انا دخلت عشان اقول اني متابع الموضوع و مش ناسيه والله و ابتديت فيه اصلا بس عايز الاقي وقت عشان اكتبه و أخرجه (حلوه أخرجه دي) في شكل محترم و محترف محدش يقدر يغلطنا فيه
وبلاش فعلا موضوع الفيس بوك ده دلوقتي عشان العربية سمعتها مش ناقصة ضياع و شعبنا بيحب ينشر الوعي (بدون ادنى مجهود للتأكد من المعلومة ، ده لو نقلها صح اصلا من غير اضافات وتحابيش ) و هي العربية مش ضايعة اصلا ولا حاجة ، والله العربية دي انا مقتنع بيها جدا وزي الفلللللللللل بس للأسف حظها وحش في مصر بسبب الإهمال فيها
وبجد كنت سعيد جدا بمعرفتكم كلكم ، ومتفائل خير بإذن الله ، واتمنى اشوفكم تاني على خير ان شاء الله :Copy of m-s5:
الله ينور عليك يا عمرو انا عارف انك مش ناسى ومتاكد ان اللى معطلك عن القسم هو الشغل ربنا يكرمك ويوفقك ان شاء الله،،، انا اتشرفت جدا بيك واتشرفت كان نفسى اقعد معاك اكتر من كده ونحكى مع بعض كتير.
عجبتنى جدا كلمة اكتبه واخرجه هههههههههههههههه
انت عارف طول ما انا راكب العربية بفكر فى اسم لجروب الفيس البوك لو حصل اننا عملناه ومالقيتش غير اسم واحد
زمان كانوا بيقولوا المازدا فاسدة ولو زيرو طبعا انا ضد الجملة دى جدااااااااااااااااااااااا اااااااااااا
شوية تعديل بسيط المازدا فاسدة بسبب غبور ( اسم جروب ممتاز)
زى نظام جروب الفيس بوك بتاع احنا كمان بنهزر يا ساويرس
وفكرت فى موضوع استيكرات تتحط على العربيات ضد بنفس اسم الجروب
ياريت يا عمرو تحط الكلام ده فى الايميل،،، اننا فى حالة عدم وجود حل لموضوع قطع الغيار هنعمل الجروب ونعمل الاستيكرات وتتلزق على العربيات
يا جماعة ربنا يكرمكم ويعزكم انا ماعملتش حاجة استاهل عليها تنفخوا فيا النفخ ده كله ، ده شغل اي حديقدر يعمله يعني وبعدين شباب ايه اللي يفرح ده اللي يفضل شغال كل يوم من 9 الصبح ل 10 بالليل ياعم محمود ؟؟؟ يفرح بإمارة ايه ؟؟ ده حتى مش هتلاقي فيه صحة ولا دماغ (وأظن كان واضح عليا موضوع الصحة ده ) :grin54:
والله هي بس فترة مؤقتة لمدة شهر تقريبا بس مش اكتر ان شاء الله وهارجع للمعاملة الآدمية تاني ان شاء الله ، هانقول ايه هو ده نظام القطاع الخاص وكلكو عارفينه يعني ما فيش عنده تفاهم
المهم انا شغال في التقرير دلوقتي ، هاحطه في شكل جدول برضه لأن ده هايكون اسهل لمازدا اليابان انهم يقروه ويستوعبو كل مشكلة ، هايكون أحسن من لو كتبناه كلام و دش.
الجدول عبارة عن اسئلتنا وشكوانا وقصادها ردود غبور عليها ، وبعد كده هاحط قصاد كل رد من غبور ارقام ورسومات بيانية تبين اذا كان رد غبور منطقي ولا اي كلام ( الأرقام هي الفاصل الوحيد وبتنهي اي كلام مطاطي )
طبعا كلنا كنا متوقعين مبررات و ردود خلاصتها هي (انسوا) ، بس ده مش معناه ان القصة انتهت عشان في زملاء اعزاء بحس في كلامهم بشكل غير مباشر انهم محبطين او ان الحكاية كده خلصت
طبيعي جدا اللي حصل ، والخطوات اللي هاتحصل ان شاء الله هي :
1- تقرير المقابلة هانبعته لمازدا
2- مازدا هاتدرس التقرير وتسأل غبور عن اللي فيه ، غبور طبعا هايحاول يبرر او يضرب ارقام ويشكك في مصداقية معلوماتنا ويلعب على نقطة ان السوق المصري معقد ومش سهل الوصول للأسعار اللي احنا بنتوقعها
3- مازدا هايردوا علينا ان غبور معذور وظروف السوق عندكم كده بس هانوعدكم بمعاملة كويسة وعروض وحملات صيانة او ايا كانت الوعود اللي بغرض تهدأة الوضع وتحسين صورة العربية في السوق برضه (ماهو أكيد عايز يحسن صورته في السوق لأن الرسالة كده واضحة العربية سوقها واقف ولازم تتصرف ياغبور أنا كمازدا اليابان عايز فلووس ومش ناقصاك تعطلي فلوس ممكن تجيلي في عز الأزمة اللي انا فيها)
4- مش هايعجبنا الرد ، ساعتها نرد نقول لليابان انهم خيبوا ظننا فيهم ومكناش نتوقع كده من اسم زي مازدا اليابان ، وكده انتوا نهيتوا سوق مازدا في مصر لأننا مش هانستمر في امتلاك سيارة مش لاقي ليها خدمة كويسة ( اللي هو لو انتوا هاتريحوا دماغكم براحتكم كده هاتخسروا سوق كان ممكن يكون واعد ومربح لو اهتميتو بيه اكتر)
5- هانحاول نفكر في اي فكرة او تصرف (إيجابي) مش سلبي (لأني بعتبر خطوة الفيس بوك تصرف سلبي ، تصرف عدائي فيه احتمال ولو ضعيف أنه ممكن يعود على ملاك المازدا في مصر بالسوء في انخفاض سعر إعادة البيع ) ومش بحب أريح دماغي واستسهل واخش في تصرف عدائي او خناقة قبل ما استنفذ كل السبل السلمية او الإيجابية (غالبا بتكون موجودة بس عادة الإنسان بيكسل يفكر فيها او يتعب شوية عشان يعملها لأنه بيحب يريح دماغه و بيستسهل الخناق أكتر من انه يفكر و يتفاهم بهدوء )
ايه هو الحل الإيجابي ساعتها ، لسه مش عارف :shyy: ، ممكن حد تاني يكون عنده فكرة او لما يبقى يجي وقتها الأول
6- تيجي هنا خطوة الفيس بوك ( والبس ياغبور )، وغالبا هانلاقي ان فجأة سبحان الله الأسعار نزلت والعروض اتحسنت ازاي متعرفش (بس مش قبل سنة على الأقل عبال مالمشكلة تسمع بجد ويبتدي غبور يحس بيها لأن غبور متغطرس شوية ومش ييتحرك نتيجة كلام او اخبار بتتنشر حتى لو حقيقة ، هو بيتحرك بلغة الفلوس وبس و هايفضل معاند لحد مايلاقي الفلوس والأرقام بتتكلم )
وبعد كل ده ، الله أعلم ايه السيناريوا اللي ممكن يحصل ؟ ممكن يحصل ردة فعل كويسة على عكس ماحنا متوقعين
انا بس عايز الناس اللي راحت مركز الصيانة وشافوا اي مشاكل او معاملة مش كويسة او اي سلبيات يقولوها هنا عشان تتحط في التقرير وتتظبط عشان ماعدناش نلاقيها تاني لما نروح نعمل صيانة عندهم
اشوفكم على خير ان شاء الله
تصبحوا على خيررررررر