سلسلة سلوكيات القيادة - الحلقة الخامسة (حق المارة في العبور)
السلام عليكم ورحمة الله وبركاته
هل تعلم حضرتك ان المارة (المشاة) احق بالعبور من السيارات وأن الطريق حق لهم وليس للسيارات
كتير منا بيبقي ماشي بالعربية ولو لقي حد بيعدي قدامه بيتجنن ويا اما بيقلب النور او بيضرب الكلاكس واحيانا الأتنين مع بعض
واحيانا بيبقي الي بيعدي دة راجل مسن او سيدة عجوز
فكرت تحط ابوك او أمك مكان الراجل او الست الي بيعدوا !!!!!
فكرت لو كان ابوك ورجليه بتوجعه (بحكم السن) والي ماشي ضربله كلاكس او قلبله نور حالته حتبقي ازاي ؟؟؟ وموقفه ايه يا أما يضغط علي نفسه يا أما يموت نفسه ؟؟؟
حاول تدقق في وش الي سايق وانت بتعدي الشارع (بس مادققش اوي) هتلاحظ انه بيبصلك بغيظ ولو دققت اكتر هتلاقيه بيدوس بنزين اكتر وكأنه عايز يشيلك من طريقه
الحياة سلف ودين
لو وقفت لست كبيرة في السن ولا شايلة عيل علي كتفها وهي بتعدي، صدقني والله ربنا هيبعت الي يقف لوالدتك او لمراتك او لأختك وهي بتعدي ويمكن يقفولك انت شخصيا وانت بتعدي
في شوارع كتير اوي في مصر التعدية فيها اشبه بالمهمة المستحيلة علي سبيل المثال لا الحصر شارع جسر السويس من بعد التجنيد شارع الطيران - طريق الأوتو ستراد - شارع الهرم - كورنيش النيل - شارع القصر العيني
صدقني لو محدش فينا وقف للناس في الشوارع دي محدش هيقفلهم ولو احنا مارحمناش بعض ربنا مش هيرحمنا وهيبعت لنا الي مايرحمناش
اتمني يا جماعة نخلي في قلوبنا رحمة للناس الي بتعدي الشارع وماتبصش للي بيعدي انه احقر منك اكمنه ماشي علي رجله وانت راكب عربية
انا معاك ان في ناس بتشل الواحد وهو راكب والي يشل اكتر لو شاب وبيعدي علي اقل من مهلة ومش بيبصلك اساسا ببقي نفسي اطلع امريكاني واخده قدامي علي الكبوت بس بقول اعوذ بالله من الشيطان الرجيم وبصبر عليه
ياريت يا جماعة نصبر علي بعض ونستحمل بعض
Best Practice
- لو لقيت حد بيعدي، شغل الفلاشر وهدي وحاول تشاورله عشان يعرف انك وقفتله
- لو عرفت تطلع ايدك من الشباك وتشاور للي وراك انه كمان يقف (عشان يقف جمبك وبالتالي الي هيعدي يعرف يعدي الشارع كله مش نصه)
- لو للأسف ماعرفتش تقف لحد حاول ترفع ايدك اعتذارا منك انك اغتصبت حقه في الطريق
والله المستعان
،
،
أقرأ ايضاً
http://www.nilemotors.net/Nile/23432...post3873673040
http://www.nilemotors.net/Nile/22676...post3873583122
http://www.nilemotors.net/Nile/23092...post3873631012
http://www.nilemotors.net/Nile/23395...post3873668353