الموضوع: اول موضوع ليا فى المنتدى - انا عملت حادثة - هههههههههههههه

للاسف ان اول موضوع ليا فى المنتدى كان بالعنوان ده ( انا عملت حادثة ) بس للاسف هو ده اللى حصل
الحمد لله انا بخير ومحدش حصل له اى حاجة بس فعلا فعلا الموضوع رخم جدااااااااااااااا بعد ما تشوف العربية وتاخد الصدمة الاولى
وبعد كدا طبعا المحضر والقسم والشرطة والقرف بتوصل لحد التوكيل زى الباشا ويصدمك اكبر صدمة فى حياتك وهى ان العربية هتقعد من 3 الى 4 اسابيع فى التوكيل وهتغير شنطة واكصدام وفانوس ورفرف وهنسمكر الباب ههههههههههههه ( كان المفروض يتغير بالمرة طبعا بس هما بيتقوا الله فى شغلهم قوى فعلشان كدا هيسمكروه ) وطبعا الرخامة الاخيرة اللى بتخليك بتشد فى شعرك وهى ان العربية هتتكلف 9880 جنيه تكون حضرتك مضطر تدفعهم من جيبك لحد ما التامين يخلص ورقه وياخد فواتيره ويتيييييييييييييييييييييت عليك وبعد كدا يفكر يطلع لك شيك لصالح البنك تروح انت تتصرف مع البنك علشان تصرفه واللى هو اصلا بقيمة 90 % من الفلوس اللى انت دفعتها فى التوكيل ههههههههههههههههههههههههه هههههههه بذمتكوا مش حاجة تضحك.........
المهم انا هحكيلكوا اللى حصل وبعد كدا ليا كام استفسار كدا بعد اذنكوا
انا كان عندى سفرية فى اسكندرية تبع الشغل وابويا قعد يقولى متسافرش بيها واخواتى وكل الناس وانا صممت انى اسافر بيها علشان دى اول مرة اسافر بالعربية وقلت دى اسكندرية وبالذات لما سمعت ان الطريق اتظبط وبقى فل
فقلت لا لازم اسافر بيها وسافرت وانا رايح الطريق عجبنى جدا وكنت مسافر على 150 من بوابة القاهرة لحد بوابة اسكندرية ولله الحمد وصلت بالسلامة وخلصت الشغل وتمام والحمد لله وركبت العربية علشان اتوكل على الله وارجع ودورت العربية وجبت الفتيس على الd ولسة بدوس بنزين ههههههههههههههه لقيتنى بترج جوه العربية ومش فاكر انا اتخبط فى ايه ولا ايه اتخبط فيا
المهم نزلت لقيت عربية تويوتا ميكروباص جديدة ممكن تبقى موديل 2008 او 2009 تقريبا العربية التويوتا خبطت عربية جمبي ( قالولى اسمها هيونداى بونى ) هى اللى اخدت الخبطة الاولى وبعد كدا العربية وصلت لعربيتي وخبطتى فى زاوية العربية الشمال من ورا وانا واقف اصلا وكان فى عربية فيرنا قدامى طبعا خبطتها المهم نزلت ونزل سواق الميكروباص مخضوض جدااااااااا وبيقول انا جيت ادوس فرامل ملقتش فرامل والركاب اللى كانوا جمبه شهدوا بكدا وبعد شوية واحنا واقفين لقينا زيت الفرامل بتاع الراجل كله على الارض طبعا روحنا عملنا المحضر والذى منه والحمد لله اتحركت من هناك الساعة 1 ونص بليل بعد ما كنت خلاص قربت انفجر.
طبعا الحمد لله كلنا بخير وتمام لكن روحت التوكيل انهارده علشان اعمل مقايسة واشوف تكلفة الحادثة واتخنقت اكترطبعا بعد ما عرفت التكاليف والوقت
فقلت اسأل الناس اللى انا بعتبرهم اصدقائي واخد رأيهم
فى التوكيل قالولى ان الشنطة والفانوس والرفرف والاكصدام هيتغيروا والباب الخلفى هو اللى هيتسمكر بس
المهم بعد المصنعيات والتكاليف حسبت التوتال طلع 9880 ولله الحمد مش ده اللى مضايقنى لكن اكتر حاجة مضيقانى هى انهم قالولى العربية هتقعد من 3 الى 4 اسابيع وطبعا ده بالنسبة لى مصيبة فده خلانى افكر جديا انى اعملها بره التوكيل لكن قلت اخد ارائكم بصراحة الاول قبل ما اخد القرار
فى واحد قالى طالما فى حاجة هتتغير يبقى غير فى التوكيل لكن لو كنت هتصلح بس يبقى صلح بره وبصراحة عجبتنى وجهة نظره بس عايز اعرف رأيكوا ايه وممكن اصلح فين مكان يكون ثقة وتقريبا هتتكلف كام
انا ممكن اصور العربية لو محتاجين تشوفوا الخبطة
وارجو كل واحد يقولى ايه رأيه فى الموضوع ده بجد لانى حيران جدااااااا ومش عارف اعمل ايه
كمان فى سؤال مهم قوى قالولى ان المفروض السواق بتاع الميكروباص كان يشد فرامل اليد او حتى ياخد غيار عكسي والعربية كانت وقفت كنت عايز اعرف الكلام ده صح ولا لا لانى بصراحة مش عارف حاجة فى الموضوع ده
وشكرا مقدما

باشا فكك من التوكيل ده نصاب تيت :) اصلا مرة كان في كوبية هناك عاملة حادثة الرفرف الخلفي بالعتب تصدف انهم رشوا فوق البلاستك الي بيبقى في زاوية العتبة :)

بص لو ملكش ضهر هناك مش فارقة و حيتنصب عليك و تلبس!@ لو ملكش حد تعرف برض كدة يبقى بردة حتلبس :( مش عارف انصحك اقلك ايه :(