مش عارف ابدا كورسات دلوقتى ولا بع الجيش

ازيكم يا جماعة عاملية اية فى الجو الحر دا


انا بصراحة محتار جدا ومش عارف اعمل اية قولت اخد رائيكم فى الموضوع دا


انا السنة دى اخر سنة ليا فى الجامعة انشاء الله دا طبعا بعد ما النتيجة تطلع


وطبعا لو طالع من غير اى مواد هايكون جيشى فى شهر 10


انا مشكلتى انى كنت مطنش للجامعة على الاخر فطبعا تقديرات الثلاث سنين اللى فاتوا مقبول فطبعا التقدير العام مقبول ومش عارف الموضوع دا هايفرق معايا فى الشغل ولا اية


الجامعة عندنا منزلة كورسات فى بيرلتز المستوى ب 350 واللى اعرفى ان المستوى فى العادى بيعدى ال 1000 ج




اية رائيكوا اتوكل على الله ولا مالوش لازمة لانى داخل الجيش ياعنى مش هاعرف اكمل الكورس للاخر وكمان هانسى الكلام دا
وكمان الجامعة مشترطة ان اللى يستفيد من الموضوع دا يكون طالب او حديثى التخرج اللى هو ماعداش سنة على تارخ التخرج اللى هى من الاخر هانقضيها فى الجيش




انا بصراحة مش عارف اعمل اية وحتار جدا فى الموضوع دا
وانا اليومين دول بالذات فى قلق جامد اوى على موضوع الشغل والمستقبل وكدة


انا اسف جدا على الاطالة وارجو الافادة

نفس مشكلتك

بص ياريس..
خد كورسات انجلش على قد ماتقدر وابتدى من دلوقتى واسمع نصيحتى..بالذات الانجليزى لحد ماتكون بروفشنال فيه مع الوقت
وحاول تاخد كورس icdl هيفرق معاك اوى وبس ووقف كورسات كمبيوتر الا بقى لو ناوى تكمل فى تخصصات ال IT وغيره..انما غير كده icdl فقط
ارجوك اهتم بالانجليزى اوى..عشان متندمش وتخيب نفس خيبتى
انا اترفضت فى وظايف كتير بسبب الانجلش ومفيش حد سئلنى معاك icdl ولا اى حاجة ومعشتش غير تجارب مريره فى انترفيوهات الانجلش وبس..
رغم انى معايا icdl من اليونسكو وسيسكو وادارة شبكات ودعم فنى وفوتوشوب وغيره بس كله زفت مبينفعش ببصلة غير فى مجال ال IT وحتى كده لازم تكون انجلش بروفشنال
وربنا يوفقك

Take any good courses you can if you want to make your English better you can work with English or American people if you can & this way your English will be very good - I think good courses are in the British Council in Agouza or Heliopolis - they have native speakers /teachers from England while the teachers of Berlitz are not certified instructors
there is also mahad el kowat el mosalaha lel loghat el agnabeya - I hear they have good teachers with a low cost
Do all what you can to make youself better & have better chances in life

Rabena yekremak

Ahmed Samy
=========

اقتباس:

---

المشاركة الأصلية كتبت بواسطة beshomilan

بص ياريس..
خد كورسات انجلش على قد ماتقدر وابتدى من دلوقتى واسمع نصيحتى..بالذات الانجليزى لحد ماتكون بروفشنال فيه مع الوقت
وحاول تاخد كورس icdl هيفرق معاك اوى وبس ووقف كورسات كمبيوتر الا بقى لو ناوى تكمل فى تخصصات ال IT وغيره..انما غير كده icdl فقط
ارجوك اهتم بالانجليزى اوى..عشان متندمش وتخيب نفس خيبتى
انا اترفضت فى وظايف كتير بسبب الانجلش ومفيش حد سئلنى معاك icdl ولا اى حاجة ومعشتش غير تجارب مريره فى انترفيوهات الانجلش وبس..
رغم انى معايا icdl من اليونسكو وسيسكو وادارة شبكات ودعم فنى وفوتوشوب وغيره بس كله زفت مبينفعش ببصلة غير فى مجال ال IT وحتى كده لازم تكون انجلش بروفشنال
وربنا يوفقك

---

متشكر جدا لرد حضرتك
بس ليا سؤال كدة
هو ال icdl مش هو اساسيات التعامل مع الكمبيوتر ولا اية بالظبط
متهيئلى مافيش حد دلوقتى مابيعرفش يتعامل مع الكمبيوتر
وكمان بالنسبة للغة لو الواحد درس محاسبة انجليزى مش دا احسن

انا شايف انك تاخد الكورس و مش لازم تكمل للأخر و تاخد الشهادة بس مهم انك تكون استفدت و تعرف تطبق اللى استفدته

بجد والله يا جماعة انا متشكر جدا على المعلومات القيمة دى بس باردوا انا المشكلة معايا دلوقتى فى الفلوس
وهو دا اللى خلانى افكر فى الحوار اللى نازل فى الجامعة دا

انت خريج تجارة عربى ولا انجليزى ؟؟؟؟؟

اقتباس:

---

المشاركة الأصلية كتبت بواسطة matrix_it

انت خريج تجارة عربى ولا انجليزى ؟؟؟؟؟

---

عربى

اقتباس:

---

هو ال icdl مش هو اساسيات التعامل مع الكمبيوتر ولا اية بالظبط
متهيئلى مافيش حد دلوقتى مابيعرفش يتعامل مع الكمبيوتر
وكمان بالنسبة للغة لو الواحد درس محاسبة انجليزى مش دا احسن

---

لما بيكون معاك شهاده icdl معتمده من الخارج بتدعم موقفك جدا فى اى شغل وده عن تجارب غير لما تقول انا بعرف كده ده غير انها بتعرفك خبايا كتير جدا فى كل حاجة انت مش عارفها..وانا كنت فاكر نفسى استاذ وانا مهندس it اصلا بس لما دخلت طلعت بطيخة ده غير انها تحتوى على برنامج الاكسيل طبعا وبعد ماتخلصه ممكن تاخد اكسيل متقدم وبعد كده تاخد اكسيل احترافى وتبقى استاذ ومع الانجلش هتلاقى الشركات بتبوس ايدك عشان تشتغل وتلاقى فجاه بيتقالك
انت هتبتدى معانا ب 2500 وبعد 6 شهور هتبقى 3000 ومبالغ تانية كتير لا داعى لذكرها وكل ده عن شهاده ناس فى نفس مجالك
والانجلش هيساعدك تدخل شركة كبيرة لانك اهم حاجة تعدى انترفيوهات القبول المبدئية وحتى لو انت ضعيف هيدربوك ومنها تاخد شهادات زى cma على حسابهم وده موجود فى شركات كتيرة وده موجود فى شركتى الحالية بس اهم حاجة الانترفيوهات الانجلش اللى فى بداية دخولك الشركة حتى على سبيل التدريب

اقتباس:

---

وكمان بالنسبة للغة لو الواحد درس محاسبة انجليزى مش دا احسن

---

انا قلتلك رايي وهتعرف قيمة كلامى ده جدا لما تيجى تدخل انترفيوهات
ابتدى بالانجلش وكمل بالتوازى معاه كورسات محاسبة انجلش او شهاده cma بس الانجلش الاولوية

لا كدة يبقى لازم تهتم بالانجليزى اوى حتى لو هتسافر امريكا عشان تتكلم و تسمع 5 دقايق انجليزى!!!!!!!!
ابتدى من دلوقتى لو الكاشات معاك و فاضى يبقى فرصة ولو ضيعتها تبقى انت الخسران

اقتباس:

---

المشاركة الأصلية كتبت بواسطة matrix_it

لا كدة يبقى لازم تهتم بالانجليزى اوى حتى لو هتسافر امريكا عشان تتكلم و تسمع 5 دقايق انجليزى!!!!!!!!
ابتدى من دلوقتى لو الكاشات معاك و فاضى يبقى فرصة ولو ضيعتها تبقى انت الخسران

---

طيب انا فعلا الكاشات مش متوفرة معايا دلوقتى بالشكل الكافى للاماكن الجامدة
وكمان انا سمعت كتير اوى عن بيرلتز بالذات هنا فى المنتدى ناس كتير بتقول جامد جدا

لو طالما انت كدة كدة مش هتاخد منهم شهادة يبقى خليك فى حاجة رخيصة و جرب الموضوع و لما تخلص جيش ابقى ادخل بكل تقلك و حماسك و هتلاقى الموضوع ماشى ان شاء الله

اكسب وقت و ابداء من دلوقتى

والله يا جماعة انا مش عارف اشكركم ازاى على الاهتمام الجامد دا

بس معلش انا ليا سؤال اخير اية الفرق بين كورسات الانجليزى وكورسات المحاسبة الانجليزى
مش انا بعد كدة معاملاتى كلها فى شغل المحاسبات ياعنى هابقى محتاج للمصطلحات المحاسبية اكتر
ولا الانجليزى العام دا شرط اساسى

اعتقد تجارة انجليزى ملهاش حل غير انك تبقى متخرج من كلية تجارة انجليزى و ملهاش كورسات
اما الانجليزى كلغة بتبقى كورسات و ممارسات
اى خدمة انا معااك للصبح

اقتباس:

---

متشكر جدا لرد حضرتك
بس ليا سؤال كدة
هو ال icdl مش هو اساسيات التعامل مع الكمبيوتر ولا اية بالظبط
متهيئلى مافيش حد دلوقتى مابيعرفش يتعامل مع الكمبيوتر

---

ICDL (يونسكو) بيكون 7 امتحانات منهم (office 4) عبارة ورد و بوربوينت واكسل واكسس - ويندوز- it - نتورك ,,
أنا خلصت اول امتحانين وعندى امتحان ثلاثاء القادم ,, وربنا يستر على نتيجة ..

اقتباس:

---

لو طالما انت كدة كدة مش هتاخد منهم شهادة يبقى خليك فى حاجة رخيصة و جرب الموضوع و لما تخلص جيش ابقى ادخل بكل تقلك و حماسك و هتلاقى الموضوع ماشى ان شاء الله

---

الانجليزى ملهاش اى لزمة الشهادات مطلقا واسال مجرب وده خطا شائع جدا ان يقولك خد فمكان جامد عشان الشهاده..الموضوع انه بيختبرك من خلال المحادثة انما ايه الفايده انك معاك ليفيل عالى وانت يادوبك hello وكنت بتنجح بالبركة فى امتحان كل ليفيل

نفس الفكره فى الكمبيوتر بس لازم يكون معاك قبل ماتدخل الوظيفة اصلا شهادات دوليه فى مجال الشبكات او غيره وبرضه مبيعترفش بيها وبيفضل يمتحنك تكنيكال بصورة بشعة لمده ساعة لحد ما تكاكى قدامه

الخلاصة ان محدش بيعترف باى شهاده ان شالله فى الجامعة الامريكية اهم حاجة تكون جامد فى الانجلش
انا اعرف ناس كانت بتاخد فى مراكز تحت السلم وماشاء الله دلوقتى بقوا حاجات تانى ياريت بس ابقى ربعهم لانهم استفادوا جدامن الكورسات الرخيصة دى

حضرتك انا دخلت اختبار شغله جبارة فى مصر وهى مضيف طيران جوى وكان معايا مئات من صيدلة وطب وحاسبات وتجارة انجلش وحاسبات ومعاهد خاصة وغيره وكان اختيار تحريرى واختبار محادثة واللى كمل دخل الكشف الطبى واشتغل ومطلبوش غير مؤهل عالى وولا طلبوا اى شهاده للانجليزى لانك بتنكشف فى اختبار المحادثة اللى بيكون حوالى نص ساعة انجليزى غباوه مش بتاع بنى ادمين وعايز حد جامد جدااا فى مقابل شغله جامده ومرتب بيبتدى من 2000 جنيه وبونس عالى جدا على كل رحلة

انا قلتلك على اللى فيها وربنا يوفقك

بجد والله انا متشكر ليكوا جدا

انتا عندك امل ان جيشك يكون شهر 10 ؟؟


انتا الاول نص اول ولا تاني ..


لاني الي عايز اقولوا لك انا مستني من شهر 2 الجيش وروحت دفعة 4 و 7 واجلوني لـ 10
الاسباب الشهادة معتمدة متأخر وانا نص تاني ..


خد كورسات وحتي لو حصل وجت شهر 10 لسة في كشف ولو تخش هيكون علي 1 كدا ..

انتا لو شهادتك اعتمدت بعد يوليو ( يعني لو ماطلعتش خلال الخمس ايام دولت من الشهر ) هتكون السنة الي جاية

طيب انا خلاص هاروح اقدم بكرة انشاء الله مش عارف اعمل اية قبل تحديد المستوى علشان الواحد فعلا ناسى كل حاجة
وياريت اللى يعرف موقع كويس ممكن يفيد الواحد قبل مااروح تحديد المستوى

السلام عليكم ورحمة الله وبركاته
ازيك يا ميدو و عامل ايه ... يا ريت تكون بخير

قال النبي - صلى الله عليه وسم - : ( اغتنم خمسا قبل خمس حياتك قبل موتك وصحتك قبل سقمك وفراغك قبل شغلك وشبابك قبل هرمك وغناك قبل فقرك ) رواه البيهقي بسند صحيح
) .

فأنصحك باغتنام الوقت خصوصا و انت فاضى ... و الجيش ممكن تاخد تأجيل باذن الله و تكمل الكورس عادى

الواحد بيكون خارج من الجامعة عنده حماس لاكمال الدراسه و الكورسات ....بعد كده دماغ الواحد بيصدى و بيتشغل بأكل العيش عن التعليم
و ربنا يوفقك لكل خير

اقتباس:

---

المشاركة الأصلية كتبت بواسطة د.أحمد السعيد

السلام عليكم ورحمة الله وبركاته
ازيك يا ميدو و عامل ايه ... يا ريت تكون بخير

قال النبي - صلى الله عليه وسم - : ( اغتنم خمسا قبل خمس حياتك قبل موتك وصحتك قبل سقمك وفراغك قبل شغلك وشبابك قبل هرمك وغناك قبل فقرك ) رواه البيهقي بسند صحيح
) .

فأنصحك باغتنام الوقت خصوصا و انت فاضى ... و الجيش ممكن تاخد تأجيل باذن الله و تكمل الكورس عادى

الواحد بيكون خارج من الجامعة عنده حماس لاكمال الدراسه و الكورسات ....بعد كده دماغ الواحد بيصدى و بيتشغل بأكل العيش عن التعليم
و ربنا يوفقك لكل خير

---

انا متشكر جدا لرد حضرتك
والحمد لله انا فعلا روحت النهاردة الجامعة وعرفت التفاصيل وهاقدم بكرة انشاء الله
انا بس عايز اعرف اعمل اية قبل تحديد المستوى لان الواحد فعلا نسى كل حاجة والكتب اللى عندى كلها قاموس مافيش كتب فيها مادة علمية الواحد يقعد يذاكر فيها

طيب معلش سؤال اخيير انا عارف انى رخم بس معلش
هو موضوع التقدير بيفرق فى الشغل وياريت بجد بلاش تطيب خاطر علشان ماعشمش نفسى بحاجة وبعد كدة اتصدم