الموضوع: ممكن تسامحنى؟؟

مش انا طبعا هنتلكك هو انا عملتلكو حاجة : )

بس يلا زى بعضه لو حد زعلان منى ميزعلش رمضان كريم


انا بتكلم عن حد عمل حاجة صعبة زعلتك بجد ممكن تسامح؟؟!!

حتى لو قلت انا سامحتك مش معنى كده ان الغفران الكلى حصل ده معناه انك بتحاول ودى اول خطوة فى عملية التسامح لأنها عملية صعبة حبتين

بس فكر معايا مش لو مقدرتش تسامح بتسمح للجانى اللى غلط فى حقك انه يتحكم فى حياتك لأنك اعطيته القوة يصيبك بالأحباط والتعاسة؟

مع ان التسامح مش ضعف بل منتهى القوة فى ناس بتخاف يتاخد بمظهر التراجع والأنسحاب او تغيير رأيك فى قوة الأساءة خصوصا لو الآخرين بيعطوك تأييد وعواطف ضد الجانى

الغريبة ان الناس اللى بتسامح صحتها النفسية والجسدية بتكون احسن لأن اللى مسامحش عمال يفكر فى الألم و يتخيل الجانى بياخد جزاءه وكل ما يسترجع الموقف يغضب تانى ويتألم تانى شعوره الدائم بالمرارة والضغط ده ممكن يسبب صداع -طفح جلدى-توتر عضلات -ارتفاع ضغط الدم وبالتالى تدهور القلب -سكتات دماغية وقصور فى الكلى !!!
اصل جسمك بيتعامل مع الضغط النفسى زى شعوره بالتهديد الجسمانى مبيفرقش فالجهاز العصبى يفضل يبعت رسايل للغدد والأعضاء الداخلية


طب لو الأساءة كبيرة قوى لدرجة ان كمان المعارف والأهل شايفين ان اللى حصل لا يمكن نسيانه وبالتالى مفيش تشجيع للجهد اللى بتبذله لنسيان الماضى وبدء حياتك بطريقة طبيعية
برضه بذل الجهد لمحاولة تحقيق التسامح افضل من السماح للجانى بالتأثير فى حياتك اليومية بمشاعر الغضب والأحساس بالظلم بمحض ارادتك ويصبح هو الفائز
وطبعا لو اعتذر او اظهر الندم او حاول يصلح باى شكل ده هيسهل الأمور

طبعا الموضوع هياخد وقت والتسامح من شيم المحسنين
طبعا انت فكرت كتير جواك فى اللى عايز تقوله للشخص ده واستهلكت طاقة كبيرة تألف حوارات اكتب الكلام ده فى ورقة كأنك هتبعته (بس مش هتبعته طبعا )

كده هتقدر تنفصل شوية عن الأنفعالات وتنظر للأمر بموضوعية
بعد اسبوع حاول تعدل فى الجواب حاول تعبر بعدل عن اللى حصل و جايز تحس ان الموضوع مكانش مقصود مثلا بس ناتج عن بيئته وطريقة تربيته


كمان المشكلة اننا دايما نتكلم عن مشاعرنا كانها خارجة عن ارادتنا : (ازاى يعمل فى كده وهو عارف ان ده هيغيظنى -بوظت لى مودى - ) اللى حوالينا هم اللى بيحسسونا بالفرح او الحزن ! تقييمك للحدث هو اللى بيولد المشاعر
مثلا
واحد زميلك قابلك فى السوق وطنش مسلمش عليك
1=ده شافنى وقصد يتجاهلنى خلاص انا اتعصبت ومزاجى بقى وحش يمكن عشان اخر يوم فى الشغل كنا بنتكلم فى كذا؟

او 2=اكييد مخدش باله منى اما اقابله فى الشغل هبقى احكيله قد ايه كان سرحان ومشافنيش: )

او3=معقول الغرور يوصل للدرجة دى يعمل نفسه مشافنيش انا طول عمرى بقول عالواد ده متكبر

تقييمك للحدث هو اللى ولد المشاعر هل هى هفوة من زميل مخدتش من تفكيرك دقيقة ولا سببت سخط وعصبية


طب لو مقدرتش ممكن تبص له على انه شخص مريض وانت عايز تبطل تحس بالحزن بسببه عايز تتخلص من مشاعر الحقد والكره دى والشخص اللى يعمل كده مع الناس ده لازم نشفق عليه ان مخه كده
ماهو اللى فات خلاص مش هنقدر نغيره مع انه ظلم بين وحتى معندناش القوة نرغمه يعتذر او نقنعه انه غلط فى حقنا لكن قوة مشاعرك ناحيته تقدر تغيرها

واصلا الدنيا مش مكان عادل مسالم فى ناس طيبين جدا بس بيحصل لهم فيضانات ومجاعات
كمان كل البشر خطاء ممكن انت تغلط فى حد بدون قصد وتحتاج انه يسامحك
عمرك ما حكمت على حد من غير ما تعرف الحقيقة كاملة بعدين اكتشفت انك ظلمته ولا اندفعت فى غضبك وندمت ولا اخدت قرار وطلع غلط

عشان تتعاطف مع الآخرين لازم تنظر للحياة بعيونهم طب حاول تعرف دوافع الجانى مع ان ده صعب


يمكن تسرع واندفع التمس له نفس الأعذار اللى بتلتمسها لنفسك لما تغلط ماهو نادر قوى اللى بيتعمد يسىء للآخرين بحيث يدمر حياتهم

يمكن من سوء حظك جيت قدامه فى الوقت الغير مناسب وكان لسه سامع خبر وحش فى التليفون مثلا

اكتب فى ورقة شوية اعذار ممكن هو يتحجج بيها حتى لو بعيدة

طب لو كان قريب منك وكان فى بينكو حاجات حلوة افتكرها بس من غير مقارنة بين الماضى واللى حصل دلوقتى
متقولش ازاى يعمل كده بعد ما كنا اعز اصحاب وكنت طيب معاه قد ايه

لأ قول اكيد هو مش بالوحاشة دى والا مكنتش اخترته يكون صاحبى ده عنده صفات كتير حلوة
اكيد اختلفنا فى وجهات النظر
اكيد جرحه لى غير مقصود

انت معتقد انه كان مدرك تماما هو بيعمل ايه كان قاصد وعارف هيترتب ايه على عملته السودا

المشاركة الأصلية كتبت بواسطة max_ziro

كلام جميل جدا ..

اى خدمة : )