نيو اكسنت هتجنني !!!

**Nanona2011** · 28-07-2011 05:31 AM

السلا عليكم
انا بقالي فترة متابعه المنتدى الرائع ده وبفضل كلام الاعضاء هنا كونت رأي مبدأي اني هجيب النيو اكسنت 2011 ان شاء الله
دلوقتي في جوايا شوية مخاوف بتخليني متذبذة تجاه العربية دي
اولا في عربيات بيبقا مكتوب عليها فيرنا ودي الي صورها مغرقة النت قولنا اوكي عادي هي نازلة في الشرق الاوسط بالاسم ده ماااااااااااااااشي مبلوعة
طيب ليه بقا في الي مكتوب عليها فيرنا وفي الي مكتوب نيو اكسنت هم بيلخبطوني ليه غلاسة يعني ؟ ما نيو اكسنت وخلاص بقااااااااااااااااااااااا ااااااااااااااااااا ما علينا عديييييييها

شوفتها بالفعل في معارض هنا عندي في بورسعيييييييييييييييد وعجبتني جدا كشكل خارجي
لكن للاسف مكنش عندي وقت اتكلم في تفاصيل واعرف اي الفرق ما بين الاصدارات دي وتقدرو تقولو اتحرجت شوية لاني لسة مبعرفش في العربيات اوي وبالذات هيونداي

المـــــــــهم دلوقتي انا عارفة ان في نيو اكسنت ار بي
نيو اكسنت 2011
نيو اكسنت سبورت
ايه سعر كل وحدة فيهم الاوتوماتيك بتاعها طبعا
و ايه الفرق بين التلاتة
كمان في نقطة مقلقاني شوية انا عارفة ان غبور مبيريحش نفسه بيحب يعدل اي حاجة في العربية نفسها وفي سعرها وشوية شوية هيعدلنا احنا ذات نفسنا

قولولي الي تعرفوه ولو في لينكات لموضوعات عنها ياريت لاني لسة مسجلة هنا ومش عارفة اتحرك جوه المنتدى

وسوري بقا على الصداع الي عملتهولكو زمانكو بتدعو عليابس معلش اعتبروني اختكم الصغيرة

**Nanona2011** · 28-07-2011 05:33 AM

لو مساعدتونيش هروح اشتري جين تو واريح دماغي بقا هاااااااااا وبدل ما انضم للهيونداويين هنضم للبروتونيين انتو الخسرانين ;) ;)

**eng.m7md.ali** · 28-07-2011 06:00 AM

ههههههههههههههههههه
تنوري يافندم وتشرفينا

**HOSSAM99** · 28-07-2011 08:55 AM

و عليكم السلام و رحمة الله
أهلا بحضرتك
و يا رب نقدر نفيد حضرتك و ننقل المعلومات صح علي قد ما نقدر

نبدأ بسم الله في الفرق بين الثلاث عربيات هم في الواقع إثنين مش ثلاثه
لأن النيو أكسنت أسبورت و عاديه واحد

أولا : النيو أكسنت أسبورت و عادي

مواصفات

عدد السلندرات
4

سعة المحرك اللتريه
1600

قوة المحرك
112

عدد النقلات
4
سعه خزان الوقود باللتر
45

طول السيارة بالمليمتر
4280
عرض السيارة بالمليمتر
1695

أرتفاع السيارة بالمليمتر
1470

ضمان السيارة
ثلاث سنوات او100 الف كيلو متر

معدل استهلاك الوقود لكل 100 كم
_6.5
7.0
وزن السيارة فارغه بالكيلوجرام
1080

كماليات

تكييف هواء يدوى - مصابيح ضباب امامية - مسند ذراع امامى - غلق الابواب مركزيا - حامل اكواب - غطاء محرك - مصباح علوى خلفى للتوقف - لمبة قراءة - مرايات خارجية مزودة باشارات جانبيية - مرايات كهربائية - باور ستيرينج - زجاج كهربائى - عجلة قيادة قابلة للامالة - فتح الشنطة من الداخل - 4 سماعات

دي مواصفات النيو أكسنت سواء أسبورت أو عادي

الشكل فقط هو اللي بيختلف
دي عادية

و دي كمان

و دي سبورت

و دي كمان

بالنسبه للسعر :
سبورت : 96 أو 97 ألف
عاديه : 91 ألف

نيجي للأكسنت RB

المواصفات

المحرك : 1600 سي سي - 124 حصان - 4 اسطوانات

الطول : 4370 مم

العرض : 1700 مم

الوزن الصافى : 1035 كجم

سعة خزان الوقود : 43 لت

معدل استهلاك الوقود لكل 100 كم 6.5 ليتر

تكييف هواء يدوى - زجاج كهربائى - غلق مركزى للابواب - باور ستيرنج - مصباح فرامل خلفى علوى - ضبط ارتفاع كرسى السائق - مرايات تضبط كهربائيا - مرايات جانبية مزودة باشارات - مسند يد - فتح الشنطة من الداخل - راديو و سى دى - 4 سماعات

و دي صورها

السعر أوتوماتيك أول فئه 101 ألف
ارشح لحضرتك الـRB
موتور قوي شكل جديد واسعه

أفضل من النيو أكسنت
و لو النيو أكسنت حضرتك هاتجيبيها بلاش الأسبور هايبقي زيادات خارجيه غير منتفع بها بحوالي 6 الاف جنيه (رأي شخصي

نتمني لك التوفيق إن شاء الله

**Ashraf_Ibrahim** · 28-07-2011 10:54 AM

توضيح بسيط لصاحبة الموضوع
تختلف مسميات السيارات في مصر عن المسميات للشركة الأم خارج مصر
بمعنى
ان الأكسنت ال RB هي نفسها الفيرنا 2011 خارج مصر
والأكسنت سبور اللي هنا في مصر هي نفسها الاكسنت خارج مصر
اما عن النيو اكسنت والفيرنا هنا في مصر فدول لا يتم انتاجهم خارج مصر حاليا
اتمنى يكون كلامي واضح

*حضرتك فكري تقري شوية عن محركات Campro اللي موجودة في جيل بروتون جين تو يمكن تغيري رأيك وتنطلقي لبروتون
انا مجرد بنصح فقط لا غير رغم اني هيونداوي :D

**meshmesh_egypt** · 28-07-2011 11:06 AM

المشاركة الأصلية كتبت بواسطة ashraf_ibrahim

توضيح بسيط لصاحبة الموضوع
تختلف مسميات السيارات في مصر عن المسميات للشركة الأم خارج مصر
بمعنى
ان الأكسنت ال rb هي نفسها الفيرنا 2011 خارج مصر
والأكسنت سبور اللي هنا في مصر هي نفسها الاكسنت خارج مصر
اما عن النيو اكسنت والفيرنا هنا في مصر فدول لا يتم انتاجهم خارج مصر حاليا
اتمنى يكون كلامي واضح

*حضرتك فكري تقري شوية عن محركات campro اللي موجودة في جيل بروتون جين تو يمكن تغيري رأيك وتنطلقي لبروتون
انا مجرد بنصح فقط لا غير رغم اني هيونداوي :d

والله يا باشا انا مع واحد صاحبى الجين 2 هو ماتورها حلو وانت طافى التكييف اول لما تشغل التكيف العربيه بتبقى 128 وانا معايا نيو اكسنت 2010 مش بيعرف يشد معايا وهو مشغل التكييف وانا مشغله هو لازم يطفيه
ثانيا التابلوه كده من جوه بيحسسك ان العربيه صينى والكلام الى على الزارير بيتمسح
بصراحه انا بعتبر النيو اكسنت بتكسب فى كل الاحوال

**memo823000** · 28-07-2011 11:53 AM

النيو اكسنت والسبورت والجتس انتاجهم اتوقف خلاص ومعدوش موجودين فى التوكيل
يعنى معتش قدامك غير الار بى وهى عربيه محترمه ومحدش اشتكى منها رغم الانتشار الرهيب
وهى طبعا طبعا افضل من النيو اكسنت فى الموتور والفتيس والخامات الداخليه والصاج والتقفيل ونعومة العفشه وهدوء صوت الموتور والاوبشنز ووسع الصالون والشنطه والشكل الرياضى الحديث وكمان لسه العربيه جديده مش انتاجها اتوقف زى النيو اكسنت
مفيش حد اشتكى من العربيه فى المنتدى هنا غير حالتين ومشعارف اتحلت ولا لا

**samirsaid1** · 28-07-2011 12:54 PM

النيو أكسنت العادية افضل واشيك من الاسبورت كمان

لانه مافيش فعلا فى الامكانيات

بخلاف تواجد قطع الغيار

بخلاف انه عند البيع تتباع هوا

وبالتوفيق

**Screenplays** · 28-07-2011 04:11 PM

زي ما الاخوه الاعضاء وضحوا الفروق و لو ممكن حضرتك تنتظري لرمضان تكون في عروض نزلت و كده و عموما متشتريش من المعارض و روحي التوكيل افضل بس هي موجوده في معارض ايه بالظبط ؟ حسن شلبي و لا محمد نور ؟