الموضوع: عربيات هتتوزع ببلاش قريباً!!! ده لو حد رضي ياخدها أصلاً

يا جماعة اولا فى ناس كتييير اوى فاهمين الموضوع غلط
كل سنة بتقل 5% يعنى بعد 10 سنين سعرها بيقل 50% و بعد 20 سنة هيدفع صاحبها الحد الادنى(المشكلة الحد الدنى 1000 جنيه لو العربية اكتر من 2030cc و دا مبلغ كبير اوى على واحد عنده عربية موديل 70 مثلا و لا 80).
الفكرة انا مش عارف هيسعروا العربيات على اساس ايه بمعنى عربية موديل 1990 دى هيحسبوا تمنها وقتها و لا دلوقتى و لا ايه النظام.
فى نقطة مهمة اوى كمان خدت بالى منها.
البريليانس و الاسبرانزا و السوناتا ال 2000 مش ضمن العربيات اللى هتتاثر بالموضوع دا (على ما اعتقد و شوفوا بنفسكوا).

الزيادات أيضًا رسوم رخص تسيير السيارات الخاصة ذات السعة اللترية 1030 سي سي من 16 إلى 116 جنيهًا، وللسيارات ذات السعة فوق 1030 إلى 1330 سي سي من 23 جنيهًا إلى 143 جنيهًا وللسيارات التي تزيد عن 1330 سي سي ولا تتجاوز 1630 سي سي من 25 إلى 175 جنيهًا، أما السيارات التي تزيد سعتها عن 1630 سي سي فتم رفع الرسوم عليها من 120 جنيهًا إلى 1000 جنيه، وأما السيارات التي تزيد سعتها اللترية عن 2030 سي سي فقد تم رفع رسومها إلى 2% من قيمة ثمنها بحد أدنى 1000 جنيه

الريليانس و الاسبرانزا و السوناتا ال 2000 هيدفعوا 1000 جنيه بس و معتقدش واحد شارى عربية ب 100-150 هتبقى مشكلة لما يدفع 1000 جنيه سنويا ترخيص لان العربيات دى 2000cc بس و كمان مش 2000 بالظبط لأ 199x يعنى اكييد ضمن اللى هيدفعوا 1000 بس.

يعنى على حظى جت عليا انا بس (سوناتا 2400 ) و على الكومودو طبعا و بصراحة اللى يدفع 130-160 الف فى الكومودو الصينى التعبانة دى يستاهل يدفعوا مليون جنيه سنويا ضريبة غشامة (بصراحة عايز اقول ضريبة (عدم ذكاء) مش عايز اقول الكلمة علشان محدش يزعل نسميها غشامة علشان يستاهل لما يدفع 130-160 فى عربية صينى) .


الفكرة كمان انا مش عارف العربيات ال +2030cc هيطبق عليها موضوع ال 2% دا و لا لأ لان فى قانون بيقول ممنوع فرض ضريبة على الضريبة و العربيات دى اساسا عليها 45% ضريبة مبيعات و 8.5% ضريبة تنمية يعنى ال 2% دول مش هيبقوا على تمن العربية الكلى هيبقى على تمنها قبل الضريبة (معرفش قبل الجمارك كمان و لا لإ) اما بالنسبة للعربيات اللى متجمعة فى مصر دى عليها 10% بالكتير اوى جمارك بس , انما معرفش عليها كام فى المية ضرايب بس انا اعتقد ان هيطلعولها قانون مخصوص تشجيعا للتجميع فى مصر.
المشكلة الكبيرة مش فى ال2% فى ترخيص ال2030cc فيما فوق , المشكلة ان فى ناس كتير مامنة على العربيات بتاعتهم يعنى هيدفع بتاع 2.5 - 3 % تامين و 2 % ترخيص سنويا يعنى حوالى 5% سنويا من تمن العربية و دا كتير جدا.
تخيل لو مثلا السوناتا ال2400 (5% من تمنها يعنى 9250 جنيه سنويا ترخيص و تامين بس).(انا شخصيا مش مامن)
أنا معنديش مشكلة فى رسم الترخيص المشكلة بالنسبالى بس ان تمن العربية مستعمل هينخفض جامد اوى لو حبيت ابيعها و الناس هتقول اشترى ال2000cc من السوناتا و خلاص
فتمن عربيتى المستعمل هيقل كتير و على فكرة لو كنت اعرف موضوع زيادة رسوم الترخيص دا قبل مشترى العربية برده كنت اشتريت السوناتا ال2400 ليه؟ علشان انا شايف انى بشترى حاجة بارخص من نص تمنها بمعنى السوناتا اللى عندى لو كانت مستوردة كان تمنها عدى ال300 بكتير (غبور كان بيبيع السوناتا ال2400 الاقل من اللى عندى فى المكانيات ب 300 قبل ميجمعها) يعنى انا شارى حاجة غالية بسر قليل يبقى انا شايف لو دفعت 3700 جنيه فى السنة برده الموضوع دا مش هيعوض و لا 10% من فرق السعر بين المجمعة محليا و المستوردة.
أما مصانع العربيات مش هتتاثر نهائيا يعنى مرسيدس و بى ام بس اللى عندهم عربيات فوق ال2030 مش هتفرق مع اللى هيشتروها اما السوناتا هينتجوا اكتر من ال2000 و هيقللوا من انتاج ال2400 مش مشكلة بالنسبلهم و مش هتفرق معاهم , و الشيروكى غالية اساسا بتمن ال بى ام ال320(قريب اوى منها) فبرده مش فارقة المشكلة فى الكومودو و دول انا فرحان فيهم علشان يحرموا يضحكوا على الناس و يبيعوا عربية صينى زبالة كدا بالسعر دا .

اما من ناحية تانية بالنسبة لموضوع زيادة سعر البنزين انا شايف الناس زودتها حبتين (اصحاب السيارات مش اللى بيركبوا الموصالات (الله يكون فى عونهم اللى بيركبوا مواصلات)) و هثبتهلكوا برده انا عايز كل واحد ابتدا من النهاردة لحد 17 يونيو يحسب هو بيستهلك كام لتر بنزين فى الشهر و هعمل موضوع مخصوص كل واحد يكتب الرقم و نحسبها.
اللى هيتاثر اللى بيركبوا مواصلات واللى بيركبوا عربيات بس مشوارهم طويل اوى كل يوم انما بالنسبة للشخص العادى التاثير مش هيزيد عن 100 جنيه فى الشهر قول 150 بالكتير (الفكرة برده ان ال100-150 صحيح مبلغ صغير بس مع زيادة اسعار كل حاجة فى البلد فى الاخر بيسببوا مشكلة انا عارف) انما البنزين زاد 45 قرش فى اللتر بس يعنى لو عربيتك تنكها 50 لتر مثلا هتفرق معاك 20 جنيه بس كل مرة تحط بنزين لو حد له راى مخالف يوضحلى يمكن فى حاجة انا مش واخد بالى منها.