بسم الله الرحمن الرحيم
عندى شوية استفسارات واتمنى مساعدتكم
نوع العربية : جين 2 موديل 2008 - مانيوال
الموضوع الاول : العربية سخنت منى جامد شوية والمؤشر عدى الـ 90 وده اكتشفت انه كان بسبب ان الرادياتير اتخرم المهم روحت عملت الرادياتير وبقى تمام وبرضو الحرارة بتعلى يعنى خلال ربع ساعة ممكن توصل للأحمر بس انا مش بوصلها لكده المهم الراجل بتاع الرادياتير قالى ده جوان وش السلندر لان لما بزود المية فى الريادياتير بتنطر مية وفعلا انا دخلت قريت عن الموضوع ده كتير
- النتيجة انى لازم اغير الجوان ده ولكن انا قلقان من كذا حاجة بعد ماقريت فى الحوار ده
1- فى نوعين من الجوانات جنجريد (مصرى طبعا ) وده عامل 40 جم وده الميكانيكى بيقولى عليه حلو اوى وبيظبط علطول واللى فهمته من الكلام الـ على النت انه الجنجريد بيتطلب قشط وش السلندر وخراطة وماشابه من الكلام ده وحاسس ان الميكانيكية بيحبوا النوع ده عشان بيعرفوا يتعاملوا من خامة الجنجريد دى بس اللى عرفته ان طالما وش السلندر او الجوان مش فاهم اوى اتعمل فيه قشط وتظبيط يبقى كده لو المشكلة دى اتكررت هضطر اركب جوانين عشان اعوض المساحة اللى راحت وطبعا وقتها لازم يبقى جنجريد وبصراحة حاسس انى هدخل فى متاهات وقتها
2- الجوان الصاج ( الالمونيوم ) طبعا ده بتاع العربية الاصلى لو جبته وركبته اللى فهمته لازم يبقى مظبوط بالملى لانه مفهوش لعب بس سمعت انه مع الوقت بيحتاج يتقرط عليه وكذا واحد بيقول انه بيفشل مع الوقت لانه مش بيظبط مع وش السلندر علطول وهتضطر تروح للميكانيكى كذا مرة معئنى حاسس ان دا الاختيار الصح
اسئلتى وعايز خبراتكم عشان انا مش بثق فى فهلوة الصنايعية
1- ايه الطريق المثالى لتغيير جوان وش السلندر عشان ميسببش اى مشاكل مستقبلا ؟
2- ايه الحاجات اللى لازم ابقى مفتح عينى اوى مع الميكانيكى وهو شغال عشان ميبوظش حاجة ويستغفلنى ؟
3- الجوان بتاع الجين ده بيعمل فى حدود كام واجيبه منين اضمن مكان
4- انا فى الجيزة والعربية بتسخن على الاخر لما بتحرك بيها مين اقرب ميكانيكى او ورشة اقدر اعمل فيها الكلام ده بشرط انى اثق فيه تماما
5- مع تغيير الجوان هل فى حاجات جانبية لازم تتغير او تتعمل وكام تكلفتها ؟
6- مصنعية التركيب هل مكلفة علما انى سألت واحد وقالى 300 جم وعايزه جنجريد وروحت سألت محل قطع غيار فى نفس الوقت بتاع قطع غيار يابانى وكورى وقالى لو هتغير الجوان المصنعية لا تتعدى الـ 100 جم ؟
7- الوقت المستغرق للعملية دى فى حدود قد ايه ؟
واتمنى المشاركة حتى مش شرط اللى يجاوبنى على كل حاجة بس اى حد عنده خبره فى نقطة واحد بس يرد عليا انا مش عايز اغلط فقط فى تصليح العربية عشان ربنا يحفظنا وتعيش اطول عمر بدون مشاكل
وشكرا واسف على الاطالة مع العلم ان اجازتى السبت غدا المفروض ابدأ اصلحها فى النهاردة او بكرة قبل دخلة رمضان
المفضلات