الموضوع: اقتراح الى كل من يملك اوبل ومشترك فى المنتدا

طيب ابتدى

تعاملى
مع عبدالله اوبل انه فهلوى
بيحاول يلبس الزبون العمه
و شغال بنظام التجربة و الخطأ و اهو كله على قفا الزبون
و كل قطع غياره صينى او مضروبة و لو جابلك استيراد تبقى اغلى من السوق كله
مصنعيته مش عالية بس خنقة

مقار
قمة الأحترام و ناس فاهمه
بس اللى يحسوا انه زبون مقرش بيخبطوه فى الحيطه
ميزتهم بيقبلوا قطع الغيار من بره و يقولك ان اللى عندنا غالى
عيبهم معندهمش تك وان للفيكترا ايه و ساعات كتير لو العربية ملفها مش عندهم ميرضوش يستقبلوها الا فى حاله الطوارئ
اسعار مصنعيتهم مش غالية بس مش رخيصه

صابر اللى فى مدينة نصر
شبع بعد جوع
عايز السك و طولة اللسان و قلة الأدب عشان تعرف تتعامل معاه و برضوا شغال فهلوه من غير جهاز
بيقول انه كان فى التوكيل او فى مقار
و دى خدعه لأن فى التوكيل و لا مقار سمعوا اسمه الا مرة فى مقار واحد قاللى فيه صبى كان بيغير الزيت كان اسمه صابر و مشى من زمان
عاملين هو واخواته مجلس ادارة
قسم ادارى و قسم فنى و قسم مالى
و لو مش واقف على ايده هيلبسك السلطانية رسمى و يبدل قطع غيار و بلاوى

منصور
حدث ولا حرج
لو ورشة تحت بير السلم هيبقوا فاهمين اكتر منهم
حاجة تعل و توكيل زباله و اسعار هبل
و اللى بيتغير مبتشوفش اصله دخل مراقبة جوده عشان يعرفوا ايه اللى بوظوا
والله اعلم هو راح فين

واحد فى شارع شهاب فى المهندسين
مش فاكر اسمه بس هاحاول اجيب اسمه
عالم ولاد ستين ................ اللى تتخيله
فهلوه و حرامية و صنعه زباله
اول من بوظلى الماف
و لبسنى فى قطع غيار عشان كنت لسه جديد فى الأوبل
زى طقم الدبرياج الفاليو
و سلوك بوجيهات اسمها بى بى تى
و وش اسبراتير لونه احمر بيقولوا انجليزى
و البوجيهات مجهوله الهوية
و حطلى زيت موتور فى الفتيس عشان اصله باور
و كسرلى مكنة رشاشات المية
و شوية بلاوى تانى
و دى اول معرفة لميكانيكى اوبل
و ستر ربنا انى عرفت اخلع بعد خناقة و ضرب نار و اقسام و بلاوى
و تتفرج على المنظر عنده تقول توكيل للعربيات الحديثة و لا عربية بتمشى الا اللى فيها حاجات هبله

عبد الحليم الميكانيكى
ده فى الجيزة
راجل على قده
بس العربية مش عايزة عباقره
ميزته بالنسبة لى انى بالاقيه فى اى وقت و مش بيقفل خالص الا فى ألأعياد و اول يوم بس
مش بيعك
بس تقفيله مش قد كده
لازم تكون واقف على ايده
ملوش قوى فى التكنولوجيا الجديده انما بيحاول يفهم
و ده مش عيب
مش بادفع مصنعيات عنده لأنى المحاسب بتاعه و هو صاحب ابويا و جارة فى البيت القديم

الحاج يحى امين العفشجى
راجل استاذ بجد
و محدشى جربه و اشتكى منه

مدحت الباشا
عفشة
برضوا استاذ
و جربه وليد عبد العزيز و عجبه
عيبه بالنسبه لى انى باتعامل مع اخوه و عيب اتعامل معاه و اخوه موجود الا لو الحاج يحى امين بعتنى ليه
عشان عنده نواقص السوق كله فى حاجات الأستيراد

محمود امين الباشا
ميكانيكى
ممتاز و بيفهم
بس برضوا تبع الفهلوه و التجربة و الخطأ
عيبه
مصنعية غالية و كتر الشغل اللى عنده يخليك تكره حياتك و العربية
ميزته
مش عارف يقولك معرفشى
تقفيل توكيل لكل حاجة
صنايعية كتير بس هو على ايديهم
باروحله فى اللى يحتار فيه الأطبا بس
و للعلم هو اخو مدحت و يحى بتوع العفشة

اشرف الكهربائى
فى الجيزة
ممتاز
بس تناكة الدنيا و الأخره
و ما بين ابوه اللى يرحمه و ابويا ما صنع الحداد
مش بيصلح
الا لو ضغطت عليه و انك مش هتغير
مواعيده زفت و بيفتح متأخر بس بيسهر لوقت متأخر

تامر الكهربائى
واد كويس بس مش لاقى حظه
اللى جربه مهندس محمد
و جربته فى مارش بتاع طارق زين
و جربته فى كذا ضفيره و رفع راسى
عيبه
كل برغوت على اد دمه
يعنى المصنعية مش حسب الشغل و لا العربية
حسب منظر الزبون
مواعيده كويسه بس ساعات بتخرف معاه
و برضوا كالعادة لازم تقف على ايده

سامى الميكانيكى
دة بتاع طوارئ و تجيبه من بيته لو مش فى الورشة
واد غلبان
بس مش بتاع عك و قرف
اللى ميعرفشى فيه يقولك مليش دعوه بيه
تربية محمود امين
بس مصنعيته كويسه
مواعيده مضروبة عشان ظروفه الصحية و انه شغال لوحده
بس امانة الدنيا فيه

عمر الفولى
ريادتيرات
الجيزة
راجل كويس
و بيفهم اوى عشان شغله ابوه و اخواته ميعرفشى غيرها
عيبه
كلامه كتير
ولازم يسيب حاجة تخللى الزبون يرجع مرة و اتنين
يتونس بيه
بس كلامه صح
عنده شغل لكل العربيات
و مش بيجيب اى قطعه غيار الا لما يجربها مرتين و تلاته
عيبه
مصنعية لازم تقاوح فيها و تسمع منه حلفانات كتير بس ارحم كتير من بره

اشرف الخراط
العمرانية
الجيزة
استاذ بكل المقاييس
و بيفهم و شغال زى الفل
عيبه معندوش مخرطه كمبيوتر و لو عنده برضوا مش هيعرف يتعامل معاها قوى عشان تعليمه على قده
بس بيعمل شغل بيحلف بيه التوكيلات
مجربه فى الف حاجة و عمرة ما قصر رقبتى