إستشارة بخصوص صوت من المساعدين

**Akram** · 06-05-2008 11:45 PM

انا من ساعت ما اشتريت العربية و انا بسمع صوت خبط بسيط من المساعدين اللى قدام مع المطبات الصغيرة , و كمان لو فيه إتنين قاعدين ورا العربية بتحك في المطبات الكبيرة ولازم آخد المطب بالراحة قوي ,
و الميكانيكي قاللي المساعدين دول خفاف و لما تيجي تغيرهم نبقى نكشف على البيض ,

المهم النهاردة كنت عند واحد بتاع عفشة و قلتله يشوف الصوت ده , و لما بص قالي المساعدين كويسين و البيض كمان لكن لازم أغير البطاحات و الكوز اللي بيبقى تحتهم و وراني ان فيه بروز في البطاحة اليمين عن البطاحة الشمال ,
و بالنسبة لموضوع العربية بتحك في المطبات لو فيه حد ورا , قاللي بنحط تعلية (كاوتش مرسيدس) بإرتفاع حوالي 5 سم ,

و قلت أشوف سعر البطاحات دي و عديت على المنير اللي في فيصل و قالي فيه بطاحات كوري بـ 50ج للبطاحة و الأصلي بـ 85ج , و الكوز بـ 20ج للواحد ,

فإيه رأيكم أدام الله عزكم..............

**Akram** · 07-05-2008 08:39 AM

انا عايز رأيكم يا جماعة ,
أعمل الحاجات دي و لا أكشف عند حد تاني ,
انا قلقان من موضوع البطاحات ده ,
هل ممكن المساعد يتأثر لو مشيت مشوار كبير أو خدت مطب مثلاً ...........

**mohsen** · 07-05-2008 08:43 AM

واضح كده والله اعلم ان الاتنين عايزين يفتحوا شغل وخلاص

*جرب الاول تربط عفشة (وخاصة تربيط الميزان كويس اوى) وتجرب العربية
*متغيرش البطاحات والكبايات الا لو كنت بتسمع طقة او تزيئ عند لف الطارة او كانت الكاوتشات بتاعة البطاحة مشققة اوى وسيبك من موضوع البروز ده ومتشغلش بالك اوى
*ممنوع انك تعلى العربية ولا حتى امم والعفشجى الى يقول كده يبقى مش فاهم
*ان العربية تحك لما تركب 2 ورا ده عادى حاول تاخد المطبات براحة وبزاوية لو امكن
*لو عايز تروح لعفشجى ممتاز روح عند مرور عين الصيرة واسأل على صابر

**ads** · 07-05-2008 09:32 AM

الحاج صابر معنا واحد فى المنتدى رحله وبيشكر فيه قوى فى شغله وامنته وده موبيله 0107610800

**MMamdouh** · 07-05-2008 10:01 AM

مش شرط البطاحة تزيق عشان تحتاج تغيير.. ممكن الكاوتس بتاعها يبقى مقطوع و متهربد و دة اللى بيعمل فرق فى الارتفاع اللى بيبان من حوض الموتور

الكوبايات بتتكسر من المطبات و الاستخدام و مش بتبان و هى راكبة

نصيحة تفك جوز المساعدين اللى قدام و ساعتها كل حاجة حتبان

اوعى تركب كاوتش علايات و الهبل دة... دا شغل تكسجية و ناس بتالف

MMamdouh

**Akram** · 07-05-2008 10:30 AM

شكراً يا محسن باشا على ردك , بس انا مبسمعش (طقّة) عند لف الطارة لكن بسمع (تزييق) بس شكله من الطارة نفسها مش من المساعدين أو البارات , و بالنسبة لشكل البطاحات هي مش مشققة لكن موضوع البروز ده متهيألي مش طبيعي ,
متهيألي أكشف عن حد تاني أحسن ,
انا سمعت عن ميكانيكي كويس في صفت كان بيقول عليه محمد ممدوح اسمه (محمد عبده) مش عارف أروحله ولا لأ ,
وبالنسبة للـ (عفشجي) اللي عند مرور عين الصيرة , هو فين المرور ده ,
و هل انت جربته ولا سمعت عنه ,

أرجو إني مكنش بتقل عليك انت و ads .

**mohsen** · 07-05-2008 11:08 AM

حضرتك انا كان عندى التزييق ده وبرضه كنت متخيل انه من الطارة لكن انا رحت للحاج صابر وكشفت عنده وقولتله انا عايزك تعملى فحص شامل على العربية وقلتله على الى انا بشتكى منه قالى هتحتاج تغير البطاحتين والكبايتين لان البطاحات كانت مشققة اوى ولما غيرتهم كل حاجة بقت تمام
لو حضرتك ماشى فى ش صلاح سالم والقلعة على يمينك اطلع كوبرى السية عائشة وبعده ب 300 متر هتلاقى اشارة فيها يمين وفيها علطول خليك علطول وامسك يمينك هتلاقى بتاع كاوتش على يمينك هتسأله على الحاج صابر العفشجى هيوصفهولك
الراجل ده ربنا يباركله
امانة + خبرة + شغل نضيف + مصنعيات تعتبر رخيصة بالنسبة للاخريين
على فكرة:كلام الاستاذ ممدوح اشتاذنا كلنا مفيهوش جدال بس انت مكنتش ذكرت ان البطاحات مشققة
متروحش لميكانيكى لما يكون عندك مشكلة فى العفشة
سلام وبطل قلق وتوكل على الله العلى القدير

**sheko_2000** · 07-05-2008 11:14 AM

المشاركة الأصلية كتبت بواسطة Akram

شكراً يا محسن باشا على ردك , بس انا مبسمعش (طقّة) عند لف الطارة لكن بسمع (تزييق) بس شكله من الطارة نفسها مش من المساعدين أو البارات , و بالنسبة لشكل البطاحات هي مش مشققة لكن موضوع البروز ده متهيألي مش طبيعي ,
متهيألي أكشف عن حد تاني أحسن ,
انا سمعت عن ميكانيكي كويس في صفت كان بيقول عليه محمد ممدوح اسمه (محمد عبده) مش عارف أروحله ولا لأ ,
وبالنسبة للـ (عفشجي) اللي عند مرور عين الصيرة , هو فين المرور ده ,
و هل انت جربته ولا سمعت عنه ,

أرجو إني مكنش بتقل عليك انت و ads .

شغل عفشة روح لعفشجى
مفيش ميكانيكى بيفهم فى عفشة

**MMamdouh** · 07-05-2008 01:19 PM

المشاركة الأصلية كتبت بواسطة sheko_2000

شغل عفشة روح لعفشجى
مفيش ميكانيكى بيفهم فى عفشة

مش صح

ما انت لما بتودى العربية فى التوكيل عشان العفشة بيعملوهالك هناك... صح؟

هو اللى بيعمل العفشة واحد عفشجى ولا ميكانيكى؟؟

دى بدعة اخترعها المصريين... و اساسا عفشة العربية مش اختراع عشان تحتاج واحد عفشجى... انا لو عندى ضاغط سوست كنت اشتغلت فى عفشتى بنفسى

ملحوظة: محمد ععبدة شغال فى توكيل دايو و عملى عفشة عربية والدى

MMamdouh