الموضوع: تقرير نيسان صنى بعد 3300كم فى شهر

استلمت نيسان صنى من شهر تقريبا من اوتو ايجيبت هاى لاين لون كحلى ميتاليك وهى اكتر عربية انا فعلا فضلتها وممكن على مدى مشاركاتى القليلة كنت بفضلها على عربيات كتير كورى وبقارن بينها وبين عربيات يابانى تانية من الناحية النظرية لكن نيجى بقا للناحية العملية وللعلم انا كنت بمتلك قبلها عربيتين تويوتا كورولا موديل 90 وكيا شوما موديل علما بأنى ال 3300 كم فيهم حوالى 2000 كم سفر وعملت الصيانة بتاعة ال 1000 فى يونايتد جروب

المميزات:
عربية ثابتة
فراملها ممتازة
انا شايف شكلها كويس جدا (الكحلى فرش بيج بالفاميه الخلفى)
قعدتها الأمامية كويسة
تكييف محترم
عربية راقية

العيوب:
1 استهلاك عالى فى البنزين بعد صيانة 1000 عند يونايتد جروب اللى قالولى حطوا العربية على الكمبيوتر واستهلاكى اللى حسبته اكتر من مرة (9 لتر \ 100 كم ع السفر و 16-17 لتر \ 100كم فى البلد والإتنين بالتكييف) ومحدش يقوللى ان ده استهلاك ال 1600 سى سى لأن انا زمايلى جايبين عربيات كورى ويابانى استهلاكهم اقل من كدة بكتير
2 الأكرة الخلفية يمين بتاعة الباب بتعلق والباب ساعات كتير مابيفتحش وقلتلهم فى صيانة الألف قالولى صلحوها ورجعت زى ما كانت
3 صوت الموتور عالى جدا خاصة ع السلانسيه ومش حاسس انها عربية جديدة لأن صوت موتور الشوما او الكورولا كان اهدى منها وبكتير مع انهم كانوا استعمال
4 النور الأمامى ضعيف وللأمانة انا بقارنه بالزينون اللى كان عندى فى الشوما لدرجة انى بفكر جديا اضيف زينون فى العربية ولسة هناقش ده مع التوكيل
5 الكنبة الخلفية ضيقة بس انا كنت عارف ده ومش مأثر معايا لأن اولادى صغيرين

انا بقول للساده الزملاء فى القسم انا عاوز حل جذرى للإستهلاك البنزين والأكرة الخلفية وصوت الموتور والنور الأمامى اعمل ايه بالضبط وفين

انا حابب العربية دى وعاوز احل العيوب بتاعتها جذريا