مبروك عليك العربيه
و ربنا يكفيك شرها
النوبيرا عربيه جميله جدا و زي ما الاخوه فوق قالولك كل مشاكلها محلوله و رخصيه و ماتقلقش
عرض للطباعة
مبروك عليك العربيه
و ربنا يكفيك شرها
النوبيرا عربيه جميله جدا و زي ما الاخوه فوق قالولك كل مشاكلها محلوله و رخصيه و ماتقلقش
ربنا يباركلك يارب و يسعدك بيها و سيبك من الكلام الكتير
بالنسبة للنوبيرا في رأيي الشخصي انها من احسن العربيات ال 1600 الواسعة في مصر تاني من احسن و ليست الاحسن بس سعرها ممتاز جدا ده موتورها وحش انا كانت مع صاحبي و اخدتها مشوار بقيت هتجنن من قوتها و وسعها من جوه لاني كنت بسمع زيك كده بالظبط و كنت مصدق لحد ما ركبتها
الناس مبقتشي تفرح لحد و كل واحد عايز يثبت انه احسن واحد بيفهم حاول متعقدشي نفسك و افرح بحاجتك و اظن الخبراء هنا هيساعدوك في اي حاجة الناس هنا محترمين جدا و خدومين جدا
تاني ربنا يباركلك و يكفيك شرها
مبروك عليك عربية محترمة
اولا الف مبروك
ثانيا هل العربية عاملة معاك مشاكل لو لا يبقى بلاش تتعب نفسك وتسمع كلام الناس
الف مبروك علي حضرتك العربيه
و حط في تفكير حضرتك إن الناس مبتبطلش كلام أي كلام و السلام
مش هاتسمع كلام مقنع أو مفيد أو حقيقي إلا من شخص مؤدب بيتكلم عن اللي يعرفه
ما شاء الله عربيتك سعرها جميل و أقل من السوق شويه و عربيه بسيطه و عائليه و قطع غيارها رخيصه و بقالها فوق 13 سنه شغاله مبتقلش
أستمتع بالعربيه
والله يا جماعة انا مش عارف اشكركو ازاي على تعاونكو ده انا كتبت في أقسام كتير بس عمري ما شفت كمية الردود دي ربنا يكرمكو
بس انا النهاردة استلمت العربية ولقيت فيها شوية مشاكل كده
1 - بتغيب اوي في الدوارة
2 - القايم الشمال شكله كان واخد خبطة بس مش جامده اوي يعني بدليل انه اترد على البارد ومش مرشوش بس هو في حتة كده بتاع 2 سم * 2 سم داخلة لجوه ودي بقى اللي محتاجة فعلاً تتعمل على الساخن هل ده يعيب العربية مع العلم اني النهاردة كنت جايب بيها 150 كم /س لا حاسس بحاجة ولا كأني ماشي 60
3 - لما بجيب سرعة عالية وأدوس فرامل الاقي الطارة بتتهز كده في ايدي وفي رعشة بس صاحب العربية قاللي عشان انا مغير تيل الفرامل ولسه مش مطبع على الطنابير
4 - لما بكسر الطارة على الاخر وانا واقف برة العربية بسمع صوت طأطأة ده معناه ايه
بغض النظر عن المشاكل دي كلها بس العربية عجبتني اوي وعليها موتور حوااااااااااااااااااااااا ار وبيسحب سحب خرااااااافي مع العلم انه بيرشح شوية زيت صغيرين كده بس انا خايف اروح لميكانيكي يقولي ( نحل ) عشان نشوف دي عمرة ولا جوان
أنتو رأيكو اعمل ايه عشان اعرف احافظ على العربية واقلل مشاكلها على أد ما أقدر
معلش أنا طولت عليكو ..... و اخر سؤال بقى هو انتو مش بتعملو مقابلات خالص
ياراجل فيه حد يشترى نوبيرا !!!
دى عربية تعبانه جدا والناس كرهاها بدليل انها بتتباع بسهوله وبسرعه من غير ما تدلل عليها
عربيه مش منشره بدليل انك بتلاقى منها كتير جدا وانت ماشى
مش معمره بدليل ان اللى معاه عربيه كويسه مش عايز يبعها لانه مش هايلاقى عربيه مريحه زيها وبنفس السعر
عربيه مش حمل سفر بدليل انك وانت مسافر لازم تلاقى منها ماشى على الطريق
من الاخر ولا تسمع لكلام حد وربنا يباركلك فيها ويكفيك شرها
عربيه زي الفل والله العظيم
سواقتها سهله وحلوه وكل قطع غيارها متوفره ورخيصه جدا وتكيف فعلا تلااااجه
العيوب اللي فيها تافهه جدا وعموما ممكن متواجههاش لانك مش مالكها من الزيرو
العيوب الي فيها المقصات وبتجيب الاسباني وانسى بقى عيب المقصات ده خلاااااص
الرشاشات وبيركب لها رشاشات هيونداي او اوبل وانسى بقى موضوع الرشاشات ده تمامااا
الكوع بتاع الميا بلاستيك بيضرب وبيتغير ب واحد نحاس وشكرا على كده انتهى الكلام
دي هي المشاكل الوحيده الى بتواجه المالك الاول من الزيرو لها
تعالى بقى للمميزات
عفشتها كويسه مش وحشه خااااااالص بالعكس مشيها رزين ومتزن على الارض
وااااااسعه طبلوه محترم وشيك وعربيه شكلها حلو كمان
عايز ايه تاني من عربيه ب 44 الف
الف مبروك عليك اللبسه ياباشا وان شاء الله تبقى اسعد لبسه في حياتك
ربنا يباركلك فيها ويكفيك شرها ويديك خيرها
عايز ايه تاني
بالظبط كدا زي ما قلتلك و الاعضاء قالولك
اهم حاجة انت تكون راضي عن العربية و مقتنع بيها
العربية موتورها جامد .. حكاية ترشيح الزيت دا جوان التاكيهات مش حاجة كبيرة يعني
و على فكرة العربية عفشتها محترمة جدا جدا و دا انا مسؤل عنة .. عندنا الطريق فية شغل من حوالي 7 شهور و متكسر .. العفشة عايزة تتربط و ترصييص وتظبيط زوايا
اخدت غرزة ديقة بين ترلتين الاسبوع دا على 140 و العربية فعلا راحت المكان اللي انا عايزة ومعومتش ولا حدفت مني الحمد لله
انا حسيت بنفس احساسك اما اشتريت العربية
كله قلي ليه النوبيرا حرام عليك مش عارف ايه بتاع
بس سبتني من الكلام كله
فعلا العربية مريحة جدا جدا ف السواقة والزحمه
دبرياجها ودركسيونها زي الفل
العربية سحبها جبار
ممكن ابقا ع 80 وف خلال مسافة 2 كيلو بالكتير ابقا ع 150
ثبات رهيب ع السرعات
تكييف تلاجة
قطع غيار عند البقال ورخيصة
انت بس تربط العفشه كل شوية وتجبلك رشاشات هيونداي
والدنيا هتظبط معاك واصبر ع الفرامل عشان كان عندي نفس المشكلة
لو التيل طبع ع الطنبوره واكل فيها وشال العالي والواطي الفرامل هتظبط لوحدها كمان 600 كيلو بالكتير
انما لو مطبعش محتاج تغير او تخرط الطنابير وتجبلك تيل اصلي جي ام وبردة 200 كيلو كدا والفرامل تظبط معاك ان شاء الله