الموضوع: نوارة نجم اللي ما بتحبوهاش - ان الله لا يهدي كيد الخائنين

عزيزي دكتور محمد , حيث ان طلبك الأساسي انك تشوف سرد الاحداث , و حيث اني تبينت ان عينك بتروح لوحدها على الجمل الاعتراضية فمش بتشوف الباقي .... اتفضل

يبدأ الموضوع من الاول خالص، من ساعة مبادرة الوحدة الوطنية بتاعة مرشحي الرئاسة اللي لفينا عليهم انا وتميم البرغوثي - اللي ان شاء الله حيسود عيشتي لاني حكيت بس معلش.. سماح المرة دي - رحنا لعبد المنعم ابو الفتوح - بعدين انضم لنا ابراهيم الهضيبي - وبصراحة الراجل عسل، من قبل ما نكمل كلام وهو موافق ومستعد يعمل اي حاجة عشان يوحد الصف، لو كنا طلبنا منه ينزل يكنس ميدان التحرير عشان يوحد الصف كان نزل والله

الفكرة كلها كانت ان مرشحين الرئاسة من تلات اتجاهات رئيسية: اسلاميين، ليبراليين، يساريين، يطلعوا مع بعض على التلفزيون ويقولوا يا جماعة كفاية خناق، احنا اهو مرشحين للرئاسة، وبينا منافسة، وبنقولكم كلنا ايد واحدة يا بهجت لتحقيق مطالب الاجماع الوطني وهم على تلات محاور:

1- الاستقلال الوطني وهوية الدولة العربية والاسلامية.
2- الحرية المطلقة، حرية العقيدة، والتعبير، وممارسة الحياة السياسية.
3- العدالة الاجتماعية.

كويس كده؟ رحنا قابلنا الدكتور البرادعي، والشهادة لله الراجل ساحر، ولطيف، ومهذب، وحبوب، واي بنت تتمناه. وقالنا انه موافق على المبادرة.

رحنا للمستشار البسطويسي فقال لنا كلام كتبه بعد كده في وثيقة المواد فوق الدستورية، وان اهم حاجة دلوقت فك الارتباط ما بين الجيش والاخوان بإننا ندي الجيش صلاحيات اكبر ونعرض عليه عرض احسن من عرض الاخوان
( يا مراري على الراجل ده)

رحنا لحمدين صباحي طلع فاهم الفولة، قالنا انا موافق بعدين قالنا ما معناه بس شوفوا البرادعي طاه.. قلنا له الدكتور البرادعي تمام موافق

طبعا اللي دفعنا اصلا للف ده كان بعد موضوع "جمعة الوقيعة" والخناق الفظيع اللي حصل، وفوجئنا ان الصف الوطني بيتفتت والنظام القديم بيرجع ويتحد والداخلية داخلة علينا بصدرها

المهم البرادعي سافر ولسبب ما بقى الاتصال بينا وبين اطراف في حملته.

قلنا كده قشطة، يطلع البرادعي وابو الفتوح وحمدين مع يسري فودة يقولوا الكلمتين دولم قبل يوم 8 يوليو والله الموفق و"البوستعان" على رأي عمر سليمان، جم حملة البرادعي قالوا لنا لا.. البرادعي مش حيدعي لمليونية 8 يوليو عشان احنا مبدأنا انه لا يدعو لاي مظاهرة عشان لو طلعت صغيرة ما يبقاش شكله وحش. قلنا لهم قشطة، بلاش يدعي للمليونية، يطلع مع ابو الفتوح وحمدين يقولوا مطالب المليونية من غير ما يقولوا انزلوا المليونية.. قشطة؟
قشطة

بعدين الاخوان قالوا مش نازلين، فرحنا قابلنا الدكتور البلتاجي يوم الاتنين، فوعدنا خيرا.. وبصراحة الراجل ده محترم قوي ومافيش حاجة قالها لنا الا وعملها والتزم بيها، بس انا باتكلم على البلتاجي بس كشخص مش كممثل للجماعة، هو كشخص اي حاجة بيتعهد بيها بيعملها... لحد دلوقت.. والله اعلم برضه ماحدش ضامن عمره

جم بقى حملة البرادعي يوم الثلاثاء فجأتن قالوا لنا البرادعي مش حيطلع البرنامج مع يسري فودة.. ليه بس؟ اصله قافش، وبعدين هو مش معقول يطلع يركب على المليونية.. يا عم يركب ايه؟ ده حيساعدنا، المهم من هنا لهنا من هنا لهنا.. هاه هاه.. طيب حاطلع، قعدنا نرتب مع احمد رجب معد برنامج يسري، على اساس التلاتة حيطلعوا بقى، وابو الفتوح كان وراه سفرية لتونس واجلها، حمدين كان في كفر الشيخ باين وقال حيدخل بمداخلة تليفونية، ثم إذ فجأتن قالوا لنا بعد ما اشتغلنا معدين برامج كلنا انا واحمد رجب وتميم وابراهيم الهضيبي: البرادعي لو حيطلع يبقى يطلع لوحده ما يطلعش مع حد.. وقالوا كده ليسري، ثم اختفوا جميعا من حياتنا، نكلمهم ما يردوش، تميم ضغطه علي، وانا عمالة اطاردهم زي ما اكون باطلب منهم يصلحوا غلطتهم
جم يوم الاربع البلتاجي نفذ وعده والاخوان اعلنوا مشاركتهم يوم 8 يوليو

ثم فجأة ظهر بتوع حملة البرادعي قبل البرنامج بحبة صغيرين، بعد ما بقينا مش عارفين ايه اللي حيحصل، فاضطر عبد المنعم ابو الفتوح يا عيني يسافر، ثم قالوا لنا حيطلع لوحده، قلنا لهم طب بلاش يطلع بقى خالص، هي الفكرة انهم كلهم يطلعوا مع بعض، لو طلع لوحده تبقى المبادرة بتاعة البرادعي وده حيشق الصف مش حيوحده زي ما احنا عايزين

فطنشونا وراحوا مكلمين يسري واحمد، وطبعا يسري واحمد عندهم حلقة، وكانوا عاملين حسابهم على ضيوف، ودول بيكلموهم قبلها بساعة وابو الفتوح خد بعضه ومشي.. فراح البرادعي طالع لوحده، ودعا الناس لمليونية 8 يوليو بعد ما كانوا في الحملة قالوا لنا مش حيدعي للمليونية، وقال الكلام اللي اتفقنا عليه من غير الشكل اللي اتفقنا عليه، والشكل اهم من الكلام، لان الكلام كلنا عارفينه

ومافيش داعي اكمل بقى ايه اللي حصل بعد كده، انا اصلا على الكلمتين اللي قلتهم دول تميم وابراهيم واحمد رجب حيبهدلوني اني اتكلمت عشان كانوا قالوا لي اسكتي بقى مافيش داعي للفضايح
بس انا شايفة بقى ان فيه داعي للفضايح

احنا بعد مليونية 8 يوليو اعتصمنا مع اهالي الشهداء اللي كانوا اصلا معتصمين من يوم 24 يونيو وبعدين انضربوا واتقال عليهم بلطجية يوم 28 يونيو
جه الاخوان انسحبوا.. قشطة خلاص هم احرار
جه الاعلام قال علينا طبل وزمر وعلاقات جنسية كاملة في الخيم
جه ممدوح حمزة عين نفسه المتحدث الرسمي باسم الاعتصام وقعد يشيش ويقول مطالب مالهاش اي تلاتين علاقة بالاعتصام
جه فجأتن الاسلاميين كلهم بربطة المعلم قالوا لنا حنعمل جمعة الشريعة، لا جمعة الارادة الشعبية، لا بصراحة بقى.. احنا جايين نطهر الميدان من الملاحدة والكفرة وولاد الحرام وعلاقات جنسية كاملة في الخيم
جم القوى السياسية اللي متضامنة في الاعتصام اتفزعت طبعا، خصوصا بعد خطبة جامع الفتح الجميلة دي، وقبلها الرويني بيقول 6 ابريل جواسيس، فاللي هو ميتين ميتين يعني
واذا كان على الموت يا ريت.. المشكلة انهم حيخشوا يولعوا في خيم الدعارة بقى ويعملوا لنا هيئة الامر بالمنكر والنهي عن المعروف
جات القوى الموجودة في الاعتصام قعدت تجتمع وتقول: عايزين نفض الاعتصام من غير ما يبان اننا خفنا من السلفيين.. عايزين نفض الاعتصام من غير ما يبان اننا اتهزمنا.. عايزين نفض الاعتصام من غير ما يبان اننا فضينا الاعتصام
انا شخصيا مش عايزة افض الاعتصام.. عشان احنا سألنا اهالي الشهدا وقالوا لنا فضوه انتوا.. احنا قاعدين، فاللي حيمشي يبقى بيسلم اهالي الشهدا تسليم اهالي للسلفيين، وبعد ما بقوا بلطجية، حيبقوا علاقات جنسية كاملة في الخيم وحق اللي ماتوا حيضيع

قعدت اختكوا بقى تلطم وتصوت وعملت هليلة وهيصة وطبيلة، وقلت لهم بتسلمونا تسليم اهالي وويك ويك ويك ويا ولاد كذا ويا ولاد كذا

جه حزب النور السلفي طلع بيان وقال لا لا لا خلاص.. مش حنفض الاعتصام، احنا بس حننزل لمطالب الثورة وضد المبادئ فوق الدستورية
اهي.. ابتدت تندع اهي
جه ابراهيم عيسى قالي حاكلم خيرت الشاطر
جه ابراهيم الهضيبي كلم ابراهيم المعلم وقال له ايه بقى؟ ما تلم الناس.. فلم الناس
جات رباب المهدي كتبت بيان بالتشارك مع واحد من الجماعة الاسلامية
جم حزب النور وبتوع عبد المنعم الشحات قالوا طب زودوا الغاء المطالب الفوق دستورية - والفوق لا مؤاغزة دستورية دي حاجة فاكسة اخر تلات حاجات - فقالوا لهم عداكوا العيب بس ده مطلب مش توافقي واحنا عاملين وثيقة توافقية
قالوا لنا.. طب قشطة، احنا ملتزمين بالوثيقة دي، ومش حنرفع شعارات خلافية، بس احنا نازلين ضد الفوق دستورية.. وبصراحة اكتر، ما تخافوش، لا شريعة ولا اسلامية اسلامية ولا الكلام ده.. قشطات؟ قلنا لهم قشطات.. الراجل بيتمسك من كلمته
الراجل بقى

اساسا ولا جابوا سيرة الفوق دستورية الا مرة او مرتين، وهاتك يا جعير كأنهم داخلين على قريش، وحنثوا بكل تعهداتهم وخالفوا وعودهم، وخانوا الامانة، وفجروا في الخصومة كمان وقالوا ولا نعرفكم ولا عمرنا شفناكم ولا اتفقنا معاكم على حاجة واللي عاجبه ع الكحل يتكحل واللي مش عاجبه يترحل ولو تعرفوا تلموا ناس زينا ابقوا تعالوا جنبنا
يعني الاربع خصال بتاعة النفاق فيهم.. منافقين خالصين ولله الامر من قبل ومن بعد

ابراهيم الهضيبي ضغطه كان 150 على 110 ولو كان حصل له حاجة كنت ولعت في السلفيين كلهم وعليكما على الثورة وعلى البلد..
الناس خافت، وبالذات المسيحيين، وجات لهم حالة هيستيرية، وابتدوا يخبطوا بلا مبرر، يخبطوا في بعض، ويخبطوا فينا، ويخبطوا في اي حد الا اللي خان العهد، والخوف كل الخوف ان بعضهم يروح للمجلس ويتوقع في عرضه ويقول له اقعد بقى حكم عسكري احسن من دول.. وهو المطلوب اثباته، واذا كنا افشلنا خطة فض الاعتصام مش لازم ننجح خطة الحكم العسكري تحت اي ظرف

ناس زي محمد واكد ندموا على ان كان عندهم اخلاق.. بذمة النبي ده اسمه كلام يا ناس؟ فيه حد يندم انه عنده اخلاق وبيلتزم بتعهداته؟

المشاركة الأصلية كتبت بواسطة AmAhmed

مش عايزين نقع في نفس الحفرة اللي بنحزر منها الناس التانين (مش عارف ميين الناس التانين دول . بس المهم) نسعي للتقريب و التوحد .. ازاي ده حيحصل و احنا بنعلق المشانق

و احنا حيلتنا غير المشانق ؟ ده احنا اللي يقول لنا اننا غلطنا يبقى ابن ستيت تيت

نوارة تجيب من الاخر و تقول انها مش عايزة تشوفهم تاني في الميدان ... و ده غلط كبير لانهم فصيل لا يستهان به و قوة انتخابية موجهة ... اذا الافضل الاكابر من التيارات القريبة من بعض تقعد تتفاهم و تشوف السلبيات و تعالجها من اجل تكرار اكثر نجاح للتجربة و يحصل تهدئة في الاعلام الواعي المحسوب علي الثوار و حقوق الناس


محدش حيستفيد من الفُرقة .. ثم ان نوارة ترتكب خطيئة عظيمة في حق نفسها و مجموعتها لما تلعن اغلب التيارات .. حيفضل لها ميين غير اهل الشهداء و المصابين و دول مش قادرين يجبوا حق نفسهم حيجيبوا حق الشعب في الحرية ازاي ؟

على فكرة انا حاسس انك زي اغلب الناس ما قريتش كل حاجة , لأنها في النص (في التويتات) قالت المضمون ده بالظبط

الخلاصة التصعيد الاعلامي و ابراز الاخطاء دون الايجابيات ظلم للنفس قبل ما يكون ظلم للتيارات الاسلامية .. و يكفي انهم كانوا ايجابيين و خرجوا للتعبير عن الرأي و لم يشتبكوا مع احد بالرغم من محاولات الوقيعة

و اذا كان في شخص يستحق النقد فهو رئيس الوزراء .. لان بعد الناس ما نزلت و جت من المحافظات و اتبهدلت في الشمس و قالوا كلمات و بيانات .. كانت الاستجابة هي خليكوا حلوين مع بعض و كل سنة و انتوا طيبين بمناسبة رمضان .. بيان اعتقدت انه خارج من دكان فِراشة و منفصل تماما عن الواقع .. طب اين المجلس العسكري و بياناته .. و لا الاسلاميين كانوا نازلين يشجعوا اللعبة الحلوة

اهو ده سؤال في الجون , و اجابته عندي , بس انا عايزك تفكر و هاتوصل لنفس الاجابة , 27 مايو افتكر كان الرد عليه ايه

المشاركة الأصلية كتبت بواسطة dr-mohamed

متهيالي بعد اكتر من 10 نقط بتقول وبتفتي فيهم بارائها الشخصية التافهة والمحرضة ضد المجلس العسكري وضد السلفيين لدرجة التهديد بحرقهم وضد الاسلاميين بوجه عام من حقي اقول ان اللى بتقوله مظلمة نجم ده عبارة عن هبل ومش من حق حضرتك تقول انها بتسرد الاحداث المجردة زي ما قلت

لا مؤاخذة لا تتجاهل تماما كل السرد اللي هي سردته و تنتقي بعض النقط للحكم على الكل ده يبقى اسمه تسطيح , ده اولا , ثانيا لا مؤاخذة نقطك دي ايه ؟ ا

1- هل اصبحت كلمة التوحيد والتكبير تفجير ؟؟؟؟؟
ام انها محاولة لتاكيد الربط الدائم بين الاسلاميين والتفجيرات والارهاب ؟؟؟؟؟؟؟؟
لماذا لم تقل ذلك وهي وسط الكاتدرائية تهتف مع الالاف نفيدك يا سيدها ؟؟؟؟؟؟
هل هذا سرد للاحداث ام رأي وكلام اهبل ؟؟؟؟؟؟؟

ده اسمه تقويل, و هو للأسف تقويل تأليفي غير موضوعي , ببساطة لو كلفت نفسك تقرا التويترات هاتلاقيها كانت بتقول ان بالتأكيد مافيش علاقة بين السلفيين و اللي حاصل في العريش
لو اضفنا بقى ان دي جملة خارج مضمون الموضوع , يبقى عملت زيي في موضوع تاني و سبت الراس و مسكت الديل

2- وهي مال اهلها تفرض على الناس اللى هي عايزاه
فيه انتخابات قادمة تشريعية ورئاسية ووقتها الشعب يقول رايه مش شوية .... يفرضوا رايهم ويقولوا الشعب يريد
ويا ريت بلاش حكاية دم الشهدا دي اللي بقت فزاعة وحاسس انها قريب هاتبقي زي هولوكست اليهود

تفرض على الناس ايه ؟ هي فرضت عليك ايه ؟
ثم ايه اللي بتقول انها عايزة تفرضه ده ؟ ان العسكر ما يحكموش ؟ لو ده اللي يبقى ده رأيها و من حقها انها تعارض ده, لو ده ما يفرقش معاك يبقى زعلان من ايه .؟ ادي كمان نقطة خلت تماااااااااااما من اي صورة للموضوعية

3- مرة تانية اتهام للعسكريين بانهم يريدون الوثوب للحكم
يا تري لسة سرد للاحداث ولا راي المظلمة نجم ؟؟؟؟؟؟؟

سرد احداث سرد احداث , فين سرد الاحداث ؟ هي حكت حاجة خالص ؟ لا تقريبا انا باتكلم على تدوينة تانية , هو كل السرد اللي في التدوينة ده مش شايفه ؟؟؟؟؟ مش ممكن يعني
اما وجهة نظرها ان العسكر قفزوا على السلطة فكتير بيشاركوها فيها , المشكلة في اللي مش عايز يشوف

4- للمرة التالتة توجيه اتهام للعسكريين بالسعي للحكم دون اي دليل مجرد اراء من المظلمة نجم بدون اي دليل عليها
والاسوا اتهام البعض بانهم يعملون لحساب المجلس العسكري ويرتكبون خيانات
طيب خيانة لمين اصلا؟
ولو تسلم العسكريين او غيرهم الحكم بارادة شعبية هي ايه اللي مزعلها مش هي دي الديمقراطية ان الشعب يقرر ما يريد
ام لابد ان نقرر ما تريده الست مظلمة نجم حتي ترضي على الشعب المصري ؟؟؟؟؟؟؟
يا تري لسة سرد للاحداث ولا المظلمة بتقول ارائها هي شخصيا ؟؟؟؟؟؟؟

انت مصدق الكلام ده ؟؟؟؟؟ بجد انا مستغرب تاني
يعني لما العسكر يتسلموا الحكم بمؤامرة نفرح ؟؟؟؟؟
طب انت عايز حكم عسكري تاني بعد 60 سنة , براحتك , مصادر حق غيرك في انه يرفض كده ليه ؟؟؟؟
سوري يعني , كل واحد رافض ده من حقه يقول لك كلامك عليها ده ...... الا كل ده و لسه ما شفتش سرد الاحداث

5- يا ما شاء الله اصبح السلفيين سواء اتفقنا او اختلفنا معهم متهمين والمفروض يقدموا صكوك البراءة علشان المظلمة ترضي عنهم
طيب ما هما كمان يقدروا يتبعوا نفس مسلك التخوين والاتهامات والكل يتهم الكل واخربي يا بلد
بردو ده سرد من المظلمة ولا راي خاص بها ؟

طب ما هما متبعينه اصلا , امال اللي انت بتعمله ده ايه ؟
استنى شوية سرد الاحداث جاي في الطريق

6- والله ما شفت النهاردة السبت 30-7 في ميدان التحرير من 3 الى 5 ونص اي حد من اهالي الشهداء كل اللي شفته حوالى 300 الي 400 بني ادم نصهم بياعين والباقيين شوية صبيان وبنات قاعدين بيهرجوا في الخيام وبيشربوا شاي وشوية واقفين بيتناقشوا اكتشفت في النهاية ان معظمهم مش من المعتصمين ومعظمهم مش موافق علي الاعتصام اصلا بجانب اكوام الزبالة الموجودة في كل مكان ف الميدان

طبيعي طالما ما شفتش اي سرد احداث يبقى مش هاتشوف اي اهالي شهدا هههههههههههههههههههههه
طب ما فكرتش تسأل عليهم ليه ؟ اديك طلعت بتكذب بلا دليل و بتقدم صكوك غفران

والله ما عارف مين اللى بيجعر بالظبط

ههههههههههههههههههههههههه لا تعليق

8- بسم الله ما شاء الله
من هتفت لشنودة في الكنيسة بالروح بالدم نفديك يا ابوها اصبحت الان تحمل صكوك الغفران لتوزعها على من تشاء وصكوك النفاق تصم بها من تشاء
هل ما زلنا في مجال السرد ام ان المظلمة نجم تقول رايها ؟؟؟؟؟؟؟؟؟

همممممممممممم , عدنا للتقويل و التشويه , بصراحة بصراحة , ايوة حصل , خانوا عهد , و الاخوان اعترفوا عليهم , شاء من شاء , و استكبر من استكبر

7- هل الست مظلمة نجمة معتصمة في الميدان ؟؟؟؟؟
ولا بتروح زيارات زي حالاتنا ؟
ومرة عاشرة والله ما شفت ولا واحد من اهالي الشهداء ولا اي علامة على وجود اي شخص من اهالي الشهداء
وبعدين اهالي الشهداء ياخدوا حقهم بالمحاكمات العادلة للمتهمين وتنفيذ حكم القضاء فيهم مش بالاعتصام يا مظلمة
وبعدين يعني ايه بيسلم اهالي الشهدا تسليم اهالي للسلفيين هل اصبحت الهانم حامية الحمي؟
هل اصبح اهالي الشهداء متهمين واصبح السلفيين هم الشرطة ؟
هل كل ده سرد للاحداث ام راي المظلمة نجم ؟

سؤال غريب ما اجاوبش عليه هههههههههههه , و مرة 11 انا مصدقك و متأكد انك مش هاتشوفهم

9- يا نهار ابيض هو كل ده سرد وقائع ولا اراء للمظلمة نجم ؟؟؟؟؟؟؟؟
وايه كم الانتزاعات دي كلها ؟؟؟؟؟؟
ومين اللى خانوا مين وفين وامتي وليه وازاي
متهيالي الكل بيخون الشعب المصري الحقيقي دلوقت

حصل , قبل التوافق اتقال زي ما قالت بالظبط - خيم دعارة و مخدرات , و بعده قالوا كلام تاني خالص , و كله متسجل في وكالات الانباء و اسأل حزب النور و دكتور محمد عبد المقصود
الشعب المصري الحقيقي ده اللي هو السلفيين مش كده ؟ هههههههههه

10- د بردة سرد للاحداث ولا قلة ادب وسفالة وكره للراي الاخر واستعداد لحرقه ؟؟؟؟؟؟؟
على الاقل المجلس العسكري مقالش انه هيولع في اللى بيولعوا في البلد

ههههههههههههههههههههههههه هههه بصراحة احيي الموهبة دي في اصطياد اي جملة اعتراضية , صباح الخير بجد



و للاخوة اللي بيصقفوا , الله يكرمكم ابقوا شوفوا بتصقفوا على ايه , بجد الواحد بيتقهر