رابطة ملاك سكودا فابيا ( الآسكندرية )

بسم الله الرحمن الرحيم

انا عضو يعتبر جديد هنا ولسة شاري عربية فابيا موديل 2002
فحبيت أعمل الموضوع ده لكل الاعضاء اللي معاهم فابيا وخصوصا الآسكندرنية حتي نتشارك جميعا في حل أي مشكلة او أستفسار

والموضوع سيشمل كل حاجة بأذن الله من ( مراكز صيانة معتمده - اماكن ميكانيكية وكهربائية الخ - قطع الغيار )
فاي حد جرب اي صنايعي كويس او اشتري حاجات للعربية ياريت يفيدنا بهذه امعلومات حتي تعم الفائدة علي الجميع

ومبدئيا انا اللي أعرفه حاليا : سعر فانوس امامي 195 - عدد 2 مراية جانبية 230 - تركيب طقم شمبر بالمصنعية 800 جنيه

بتعامل مع ميكانيكي كويس جدا في المندرة شارع الملاحة أسمه م/ محمد حسن متخصص في البيجو ولكن بيفهم كويس اوي في الالماني والفابيا وأسعارة كويسة اوي اوي

مركز صيانة في شارع ترعة المحمودية ( اسمه كوين موتورز ) 338 شارع ترعة المحمودية ت : 3934304
انا مجربتوش لسه بس حرحله قريب عشان عايز اركب تكييف ولكنه متجرب من ناس كتير وقاله عليه تمام اوي

مركز 3اسمه 3s الكيلو 27 طريق أسكندرية الصحراوي ( مركز صيانة ) ت : 4704948
مجربتوش ولكن يقال انه جيد

سمكري في الحرفيين في المنطقة الصناعية التانية ( بعد الموقف ) صنايعي رائع جدا بصراحه بيطلع العربية كما لو كانت زيرو بدون مبالغة
اسمه جابر وححط تليفونه انشاء الله
انا لسة عامل عنده ياريس 2008 بتاعة اخويا كانت واخدة خبطة من قدام و ورا الاكصدمات كانت ضايعة والشنطة مترحلة هي والفوانيس
في يوم واحد خلصها ورجعت زي الاول بالظبط وجمبه علطول بويجي نمرة واحد اسمه حمدي برده حجيب نمرته واحطها هنا انشاء الله

محمد حسن فعلا ميكانيكى جامد وفاهم وانا جربته كتير وعنده ضمير فى شغله وسعره مناسب

أنا عايز أعمل صيانة الـ 70 لفابيا 2005, يا تري أروح لنور الدين الشريف ولا في حد كويس وحنين

مركز صيانة في شارع ترعة المحمودية ( اسمه كوين موتورز ) 338 شارع ترعة المحمودية ت : 3934304
المركز ده سمعته كويسة اوي سواء في الشغل او السعر
أصدقاء ليا جربوه وهما اللي دلوني عليه وبيقولو عليه كويس جدا

متشكر أوي يا باشا

العفو وتحت امرك في اي حاجة
بس ياريت بعد متروح انشاء الله تبقي تحكيلنا عن تجربتك معاهم وهل المركز كما يقال ام لا

ان شاء الله

انا معايا برضه فايبا 2002
ركبت التكيف ولا لسه

السلام عليكم انا عندى فابيا 2009 - أشتريت كفة المراية من التوكيل - عشان معرفش امشى من غيرها - ب250 جنية و بعدين لقيتها فى اول صلاح الدين امام الجوزات ب 20 جنية - و عنده كل الانواع

ثانيا بخصوص مركز كوين انا جربتو لمل كان عندى فليشيا 97 - خدمة سيئة - بعد ما استلمت العربية و مشيت لقيتها بتقطع بس كنت بعيد عنهم - رجعت اليوم التالى المهندس قالى اسفين حضرتك استلمت العربية يعنى كده هندخلهالك تصليح جديد - طبعا سبتهم و مشيت

ثالثا ---- لو سمحتم عندى خبطة فى الاكصدام الخلفى لو حد يعرف صنيعى فيبر كويس يا ريت الافاده...

شكرا

في كذا واحد بتاع فيبر وانت جاي من العوايد ورايح علي السيوف ناس كتير اوي هناك وكويسين او عليك وعلي الحرفيين اللي بعد الموقف

أنا روحت عملت صيانة الـ 70 في مركز نور الدين الشريف 3s الناس معاملتهم كويسة والحمد لله العربية مكنش فيها حاجة غير تغيير زيت و فلاتر

طيب الحمدلله ربنا يباركلك فيها انشاء الله
والحمدلله ان مركز نور الدين الشريف طلع كويس منتظرين باقي الاراء انشاء الله

شكرا يا عمرو على الرد - انا عملت الفيبر عند واحد اسمه سمير فى الحرفيين - كويس بس مش الى انا كنت عيزه - هل تعرف حد شغال فى قطع غيار فابيا أستيراد؟

العفو يا باشا
في محل أسمه القدس في سيدي بشر رقمه 0124020336 قطع غيار سكودا وفولكس واجن وسيات استيراد الخارج
محل أسمه الراعي موجود في الحرفيين في القاهرة وده الفرع بتاعو هنا في اسكندرية في شارع 45 قطع غيار جديد واستعمال الخارج لسكودا والبروتون والفولكس واجن رقمه 0114438439
وطبعا عندك شارع صلاح الدين مليان

شكرا مرة ثانية يا عمرو - انا اتصلت بالمحلين و ربنا يسهل - اول ماوصل لنتيجة هبلغك

انشاء الله
اهم حاجة بس متستعجلش وتشتري من اول واحد
اسال كذا واحد عشان تجيب احسن سعر

بشكرك اخى على الموضوع
انا عندى فابيا 2004
1200 cc

مشكلتى فى التكيف

التكيف مش تركيب
مرة يشتغل ومرة لا ولما يشتغل المراوح طبعا بتشتغل ولما بيقف بلاقى المراوح مش شغالة يعنى لم ايكون بيسقع وفصل وهو شغال بلاقى المراوح وقفت تسريب مفيش
اتشحنت اكتر من مرة
فى حد كويس يا جماعة توصفهولى

لانى احتارت فى اللى قالى كنترول التكيف واللى قالى الكباس والحقيقة مش عايز حد يلعب فيها وفى اللى قالى البالف
الحقيقة توهونى

انا من القاهرة يا جماعة

وفى انتظار مشاركاتكم
وان شاء الله بعد حل المشكلة هنشر هنا التجربة باذن الله

نورت يا باشا الموضوع
وبالنسبة لمشكلة التكييف دي فأنا مش عارف بصراحة العيب ممكن يكون ايه لآني متعملتش في الموضوع ده قبل كده وكمان حضرتك من القاهرة فمقدرش افيدك بخصوص حد تروحله بس علي العموم انا حسألك في الموضوع ده وانشاء الله نكتشف المشكلة والحل
بالتوفيق

اقتباس:

---

المشاركة الأصلية كتبت بواسطة amr_azab

نورت يا باشا الموضوع
وبالنسبة لمشكلة التكييف دي فأنا مش عارف بصراحة العيب ممكن يكون ايه لآني متعملتش في الموضوع ده قبل كده وكمان حضرتك من القاهرة فمقدرش افيدك بخصوص حد تروحله بس علي العموم انا حسألك في الموضوع ده وانشاء الله نكتشف المشكلة والحل
بالتوفيق

---

بشكرك يا غالى
على فكرة انا كل فترة فى اسكندرية لام اهلى من اسكندرية
فا ممكن لو لاقيت سكة فى اسكندرية بردو اذكرها وممكن اتعامل
وربنا يوفق ان شاء الله

ممكن تروح مركز 3s كذا عضو راحو وشكرو فيه وممكن مركز كوين
الاتنين حلوين ومش حتخسر حاجة لما تروحلهم تكشف علي الاقل تعرف العيب فين
المركزين في اسكندرية وانا كاتب مكانهم وارقامهم في اول مشاركة
اتمني لك التوفيق