سلسلة سلوكيات القيادة - الحلقة الثامنة (الألتزام بالحارة المرورية)

السلام عليكم ورحمة الله وبركاته

اولا كل عام وانتم بخير بمناسبة شهر رمضان المعظم اعاده الله علينا جميعا بالخير والبركات

موضوع الحارة المرورية دة في غاية الأهمية في القيادة علي الطرق سواء كانت السريعة او حتي داخل البلد

احنا هنا في مصر عندنا الدريكسيون شمال وبالتالي حارة السريع هي اقصي الشمال والخدمات والبطئ اقصي اليمين

والحارات الوسطي هي للسرعات الأقل فالأقل تدرجا من اقصي الشمال الي اقصي اليمين

تلاقي حضرتك الناس عندنا ماعندهاش اي ثقافة عن الحارة المرورية ولا حتي تعرف الفرق بين الخط المتصل والخط المتقطع الفاصل بين الحارات المرورية ولا عن السرعات المقررة علي كل حارة

في اسكندرية مثلا كانت محاولة في غاية الأهمية واعجبت بيها جدا لما كتبوا السرعة علي كل حارة لكن للأسف لم تفعل هذه المحاولة ولا اي حد التزم بيها

وعندنا في القاهرة تلاقي الناس ماشية زي الثعبان من حارة لأخري ويا حلاوة الشد وابقي محترف لو مسكت اقصي يمين الطريق وانتقلت لأقصي اليسار في غضون ثواني

ولو في اشارة طويلة شوية والعربيات بتتحرك ببطئ هتلاقي العربيات عمالة تنتقل من حارة لأخري بمنتهي الحرية وطبعا لازم يكسر علي الناس عشان يعرف ينتقل

رجاء يا جماعة وليكن من اول رمضان نحاول نلتزم شوية بالمرور وتعليماته
ماينفعش ابقي صايم وانفذ تعاليم ربنا وانا مخالف لتعاليم المرور وبضايق الناس واحرق دمهم

كل سنة وانتم طيبين ورمضان كريم

والله المستعان
،
،

أقرأ ايضاً

http://www.nilemotors.net/Nile/23553...post3873686975
http://www.nilemotors.net/Nile/23553...post3873686912
http://www.nilemotors.net/Nile/23494...post3873680644
http://www.nilemotors.net/Nile/23432...post3873673040

انت شكلك كتنت راكب معايا في العربيه امبارح

كنت بتكلم في الموضوع ده

لو بصيت علي طريق من فوق قمه عاليه

لو ماشين ملتزمين بالحاره

بتلاقي شكل الطريق كان مياه في نهر

لكن لو ناس بتاكل غرز وكده

تحس انك فاتح بلاعه مجاري

المجاري جايه من كل حته

شكرا على مواضيعك القيمه

اقتباس:

---

المشاركة الأصلية كتبت بواسطة ahmed_mido1889

انت شكلك كتنت راكب معايا في العربيه امبارح

كنت بتكلم في الموضوع ده

لو بصيت علي طريق من فوق قمه عاليه

لو ماشين ملتزمين بالحاره

بتلاقي شكل الطريق كان مياه في نهر

لكن لو ناس بتاكل غرز وكده

تحس انك فاتح بلاعه مجاري

المجاري جايه من كل حته

---

والله انا بقالي فترة عايز اكتب الموضوعات دي بس للأسف بدخل قليل علي النت والمنتدي

بس هو فعلا لو كلنا مشينا ملتزمين بالحارات والسرعات المقررة هيبقي شكلنا منظم اكتر واعتقد يمكن كمان حوادث الطريق تقل شوية

والله المستعان
،
،

اقتباس:

---

المشاركة الأصلية كتبت بواسطة elawany13

شكرا على مواضيعك القيمه

---

شكرا علي مرورك
وكل عام وانتم بخير

والله المستعان
،
،

للاسف يا فندم معظم شوارع القاهره مش متقسمه حارات
حتى الدائري ناحيه الجيزه ممسوح و مبهدل و حاجه تقرف

لكن المشكله مش في كدا
اهم حاجه في الالتزام بالحارات المروريه هو التزام سواقين النقل التقيل و الاوتوبيس بالحاره اليمين و بالسرعه المقرره
لكن مفيش التزام و كله بيجري و خلاص

حضرتك فعلا معاك حق بس انا ممكن امشي وافترض اني ماشي في حارة يعني مفيش داعي كل شوية يمين شمال يمين شمال وكأني راكب مرجيحة مش عربية

والنقل والأتوبيس دة وضع تاني ، ربنا يهديهم ويصلح الحال

والله المستعان
،
،

المشكلة في الإلتزام بالمنظومة يا فندم !! صلاح سالم 4 حارات بيمشي فيه 5 سيارات !! كطلع كبري الفنجري سيارتين بيطلعوه 3 !! الفكرة في الإلتزم

اقتباس:

---

المشاركة الأصلية كتبت بواسطة sayed911

المشكلة في الإلتزام بالمنظومة يا فندم !! صلاح سالم 4 حارات بيمشي فيه 5 سيارات !! كطلع كبري الفنجري سيارتين بيطلعوه 3 !! الفكرة في الإلتزم

---

طب ماهو دة حضرتك الي احنا بنتكلم فيه ، الألتزام

انا معاك ان الزحمة بتسبب اكتر من كدة، وخصوصا لو طريق سريع وفأخره بقي ضيق ودي مشكلة معظم الطرق عندنا، تبقي الطريق سريع وواسع ويجي يضيق بعد كدة والي كانوا ماشيين 4 حارات او 5 يضطروا يمشوا في حارتين او 3 وبالتالي العربيات بتتحشر في بعض وبنضطر نزنق علي بعض والبقاء للأقوي
والمثال علي كدة كتير اوي، زي مثلا المحور يبقي واسع وجميل ومرة واحدة تتزنق في ميدان لبنان او الدائري او صلاح سالم بيوسع ويضيق عليك وعند كوبري السيدة ووصلة صفط وتقريبا كل الطرق السريعة عندنا كدة

بس حتي لو احنا في اشارة ايه المانع افضل في حارتي الا لو كان في عربية عطلانة او حادث لا قدر الله وأضطريت تسيب حارتك

لكن لاحظ حضرتك علي كوبري اكتوبر وهو طبعا دايما بيبقي واقف

هتلاقي العربيات كلها بتتصارع علي الحارة الماشية نوعا ما وبالتالي النتيجة انها بتوقف ويرجعوا تاني يتصارعوا علي الحارة الي مشيت نوعا ما وهكذا صراع دائم لحد نهاية الكوبري

بتمني الي ماشي في حارة يفضل ملتزم بيها لحد نهاية طريقه
وربنا يستر طريقنا جميعا

والله االمستعان
،
،

كلام جميل جدا
وحاجة بنعاني منها كلنا
انا دايما بلتزم بالسرعة القانونية في اغلب الاحيان وباخد الحارة اللي قبل الشمال الاخيرة بحيث اني اخد سرعتي المنتظمة
وباخد اقصى الشمال في التجاوز فقط وارجع للحارة بتاعتي تاني
علشان الشمال يكون مفتوح للي حابب يمشي بسرعة او عنده شيء ما يستدعي انه يكسر سرعة الطريق القصوى
جزاكم الله خيرا

اقتباس:

---

المشاركة الأصلية كتبت بواسطة ashraf_ibrahim

كلام جميل جدا
وحاجة بنعاني منها كلنا
انا دايما بلتزم بالسرعة القانونية في اغلب الاحيان وباخد الحارة اللي قبل الشمال الاخيرة بحيث اني اخد سرعتي المنتظمة
وباخد اقصى الشمال في التجاوز فقط وارجع للحارة بتاعتي تاني
علشان الشمال يكون مفتوح للي حابب يمشي بسرعة او عنده شيء ما يستدعي انه يكسر سرعة الطريق القصوى
جزاكم الله خيرا

---

ياريت الناس كلها تعمل زي حضرتك

والله المستعان
،
،

اصابه خمسه اشخاص في تصادم امام اكادميه الشرطه بينهم ملازم اول

وائل المصري

8/12/2011 11:47 pm

وقعت منذ عده دقائق خلف اكاديميه الشرطه بالقاهره الجديده حادثه تصادم مروعه اثناء قيام ملازم اول بالسير بسيارته

المستوبيشي لانسر عكس الاتجاه حيث فوجئ بسياره نقل بمقطوره قامت بالاصطدام به مما ادي الي اصابته واربعه من اصدقائه بينما لاذ صاحب السياره المقطوره بالفرار .. تم نقل المصابين الي المستشفي ورفع اثار الحادث الي جانب الطريق .. ونحرير محضر بالواقعه وجاري العرض علي النيابه

اصابة رائد شرطة واربعة اشخاص اخرين في حادث تصادم

الفجر

8/12/2011 10:00 AM

http://www.elfagr.org/Portal_News/Bi...9201181291.jpg

لقي شخصان مصرعهما وأصيب آخرين في حادث تصادم سيارتين بالطريق الصحراوي الشرقي أمام قرية "الرفيعة" التابعة لمركز ساحل سليم.

تلقيت مديرية أمن أسيوط إخطارا من مأمور مركز شرطة ساحل سليم يفيد بوقوع حادث تصادم بين السيارة رقم (50606) أجرة أسيوط قيادة محمد حسين محمود أحمد (45 سنة) خفير بمركز شرطة البداري، ومقيم بقرية الكوم الأحمر بمركز البداري، والسيارة رقم (52048) ملاكي أسيوط قيادة معتز حسين إبراهيم (29 سنة) لا يعمل، ومقيم ببندر ساحل سليم، ونتج عن الحادث وفاة قائدى السيارتين، وإصابة مستقلي السيارة الأولي وهما أحمد عبد المنصف يسري (39 سنة) رائد شرطة بمركز البداري، ونجله يوسف أحمد عبدالمنصف (11 سنة) بكسور متفرقة بأنحاء الجسم، وتم نقلهم إلي مستشفي الشرطة وأسيوط الجامعي

ملازم اول وماشى مخالف ايه الحلاوه دى وعايزين مصر تتغير :Copy of majd(4):

اقتباس:

---

المشاركة الأصلية كتبت بواسطة poussi

ملازم اول وماشى مخالف ايه الحلاوه دى وعايزين مصر تتغير :copy of majd(4):

---

تقريبا محدش بيمشي عكسي غيرهم