الموضوع: مقارنة بين الكيا سبورتنج 1.6 والنيسان قشقاى 1.6

المشاركة الأصلية كتبت بواسطة moustafa_saad

معلشى ممكن اعرف طلباتك ايه فى عربيتك واحتياجاتك منها ايه
وايه امكانياتك الماديه فى المبلغ المدفوع ممكن توصله لكام
موضوع اسعار قطع الغيار يفرق معاك
اعادة البيع تفرق ولا حاتحتفظ بيها لمده طويله
بتفضل مدرسه معينه فى صناعة السيارات
ليه دايما بتتجه لاستايل الدفع الرباعى
وهكذا يمكن اقدر افيدك

ياباشا انت كده زنقتنى زنقه صعبه أوى - بص ياسيدى:
-أنا عايز ان شاء الله عربية تكون متوسطة الحجم أو كبيرة وتكون مناسبة لعائلة مكونة من أربع أفراد ويكون تكيفها قوى وتكون شكلها الخارجى والداخلى معقول بما لا ينقص من اعتمادية السيارة وطول عمرها الافتراضى - مش مهم عندى أوى موضوع الأوتو أو المنيوال - وطبعا يفرق جدا موضوع الكماليات بالداخل - ويكون معامل الأمان فيها معقول ومقبول وتكون شنطتها كبيرة وواسعة
-بالنسبة للامكانيات المادية ممكن ان شاء الله لحد 170 ألف والحمد لله
-طبعا أسعار قطع الغيار مهمة جدا تكون معقولة ومتوفرة فى السوق
-ناوى ان شاء الله ماأبعش السيارة قبل خمس أو ست سنين بس برضه يهمنى سعر اعاده البيع
-بصراحة طبعا الألمانى ثم اليابانى والاتنين عن تجربة شخصية
-انت ما شاء الله قارى أفكارى تمام (هههههههه) - أنا أفضل ستايل الدفع الرباعى لأنى مجربه وعارف فوائده الكتيرة برغم انى ولا مرة طلعت بالعربية فى الصحراء - بس بينى وبينك اللى يركب الفور ويل يعشقه وتحس انك مالك الطريق وانت ماشى
وأخيرا شكرا جدا لاهتمامك - وربنا يوفق الجميع للى فيه الخير ان شاء الله

المشاركة الأصلية كتبت بواسطة moustafa_saad

ربنا يهيدك للخير يارب
انا لازم اهتم بيك لانى برده لما جيت اختار لاقيت اللى يهتم بيا

انا حاكلمك من وجهة نظرى ولو انا معايا المبلغ ده ومليش دعوه بالعربيتين اللى انت بتقارن بيه فى موضوعك

اولا انا مدفعشى 170 الف فى عربيه غير الاوروبى عموما وياسلام لو المانى طبعا وهنا معانا (الاوكتافيا والفلوينس) او اليابانى تقفيل بلاده او بلد خبره فى صناعة السيارات زى انجلترا مثلا وهنا بنتكلم عن القشقاى والانجليز من ملوك صناعة السيارات طبعا وتكاد سياراتهم تخلو من عيوب الصناعه

لو حطينا ال3 عربيات فى جدول مقارنه حيكون بالشكل الاتى

الاوكتافيا
تمتاز بالاعتماديه والثبات والفخامه وسعر اعادة البيع الرائع والانتشار والجوده وعربيه من الاخر عامله زى الجنيه الدهب تقريبا بلاعيوب فنيه تذكر
عيوبها سعر قطع الغيار مرتفع نوعا ما وهنا اسال بنفسك فى التوكيل او فى قسم سكودا

الفلوينس
تمتاز بالثبات الفخامه و شكل رائع جوده مقبوله واعتماديه مقبوله وقطع غيار ارخص بكتير من الالمانى واسال فى قسم رينو ولكن لم تختبر بدرجه كافيه للحكم علي اعتمادتها مثل الالمانى واوعى تقارنها بالميجان
عيوبها سعر اعادة بيع واقع تقريبا وعدم انتشار كافى وان كنت باشوفها كتير اليومين دول

القشقاى
تمتاز بالجوده واعتمادية اليابانى المعروفه بمدرستة الرائعه وتقفيل محترم وشكل رائع وجوده لم يحكم عليها بعد ولكن متوقع لها النجاح بسبب التاريخ وكماليات رائعه
عيوبها لسه جديده ومش متجربه ومحدش يعرف السوق حيتقبلها ازاى وقطع غيارها موجوده ولا حيبعتوا يجيبوها بالطياره لانها تقريبا مش موجوده على اسفلت مصر حتى الان على حد علمى ولم يظهر تجاوب المستهلكين معاها حتى الان ومفيش منها اوتوماتيك

التلات عربيات عاليين بدرجه كافيه بس طبعا مش علو القاشقاى

المهم بقى انا لو مكانك اختياراتى حاتكون
1 اوكتافيا اوتوماتيك اول فئه وطبعا لو عرفت ازود ماشى
2 نيسان قاشقاى
3 رينو فلوينس

ده رائى زى ماقولتلك لو معايا المبلغ ده حاشترى اوكتافيا واستمتع بالالمانى ده غير ان حرام ادفه مبلغ زى ده واركب برده مانوال ده اللى معاه 70 الف عاوز يركب اوتوماتيك

الله ينور عليك ياباشا - والله مش عارف أقولك ايه؟ جزاك الله كل خير
الأوكتافيا طبعا مفيش خلاف عليها ودى كانت أحد أختياراتى فى الأول هية والجيتا - بس بعد ما نزلت القشقاى وعشان أنا مجرب النيسان قبل كده واستريحت جدا معاه (مش عايز أقولك ان آخر عربية نيسان جبتها مستعملة استعمال خفيف وفضلت معايا سنتين معملتش فيها أى حاجة غير تغيير زيت الموتور وفلتر الزيت بس) - وعايز أقولك ان من مزايا النيسان برضه انه بيديك الرفاهية اللى انت عايزها من غير تعقيدات ميكانيكية زائده من كمبيوترات أو سينسورز داخل ميكانيكة السيارة - ودى نقطة مهمة عندى جدا عشان أريح دماغى من سينسور ايه باظ ولا كمبيوتر اتحرق الشيب بتاعه وهكذا - أنا كان معايا بي أم قبل كده وعانيت جدا من الموضوع ده - غير انى غيرت الفيبريتور (vibrator) بتاع التكييف كذا مرة وكانت تكلفة الفك والتركيب أكتر من تكلفة الفيبريتور نفسه - عموما عشان كده بحاول أبعد عن الألمانى برغم ان الألمانى وعن تجربة يعتبر ملك الطريق يعنى تمشى بيه على 200 وأكتر وانت مطمن خصوصا لو العربية جديده - أنا بحاول على قد ما أقدر أبعد عن العربية اللى فيها تعقيدات فى الميكانيكا بتاعتها لأن هية دى اللى تكون ان شاء الله أعطالها قليلة وحتى لو حصلت تبقى تكاليف اصلاحها هينة - عشان كده ماسك فالنيسان بايدى وسنانى

المشاركة الأصلية كتبت بواسطة y2y1500

بصراحة ده احساسى وانا راكبها فى التيست درايف
ما كنتش عاوز انزل بصراحة وانا شايف العربيات من فوق كده ومش حاسس بالدفع الثنائى ولا الرباعى ولا مانيوال او اتوماتيك
بصراحة القاشقاى حسمت المعادلة الصعبة
شكل + مضمون + خامات + جودة + كفاءة + اعتمادية + كماليات + توكيل محترم جدااااا + تكييف تلااااااجة + متعة القيادة + مساحات تحميل وشنطة كبيرة
يبقى الواحد عاوز ايه اكتر من كده !!!!!
توكل عالله واحجزها بقى وبطل تشتت نفسك فى كيا وميا وهيا

ما شاء الله يادكتور - انت جبت من الآخر - هوة بس انت عارف الواحد لما بيشوف حاجة جديدة عقله بيزقزق

المشاركة الأصلية كتبت بواسطة m.elwan

ما شاء الله - طبعا شكل السبورتج الجديدة من برا وجوة تحفة - بس كمان عشان منظلمش القاشقاى - اللى فالصور ده مش آخر موديل ليها - والموديل الأخير أحلى فى الشكل بكتير من اللى فالصور