العربيه إتركنت سنه إيه اللى مفروض أعمله ؟؟؟

السلام عليكم و رحمة الله و بركاته
كل عام و انتم بخير يا أحلى شباب فى أحلى منتدى .....
أنا معايا نيسان صنى 2010 أتوتوماتيك EX-Salon .... و هى عامله 11400 كيلو .... من سنه سافرت و ركنت العربيه قدام البيت و كنت عامل صيانة ال 10000 قبل م اسافر فى مودرن موتورز .... المهم رجعت من كام يوم و وديت البطاريه عند واحد جنبى بتاع بطاريات و غيرلها الميه و الحمد لله كله تمام .... بس كنت عايز أعرف إيه اللى مفروض أعمله تانى .... حط كام لتر .... و هل فيه حاجه تانيه المفروض أعملها .... يا ريت تفيدونى يا جماعه .... و بالمناسبه الصنى ما شاء الله عليها عربيه فوق الممتازه .... لإنى ركبت 3 عربيات فى السنه اللى فاتت دى و منهم ماركات محترمه جداً ..... و بدون مبالغه شايف إن الصنى أحسن منهم

اكشف على اى حاجة فيها كاوتش...سيور خراطيم والكاوتش نفسه

بدرى شوية على موضوع أى حاجة كاوتش ده...........العربية لسه موديل 2010

أنت إحتياطى شوف مستوى الزيت و مستوى المياه و يفضل تغيير الزيت لأن عمره الأفتراضى على ما أذكر حوالى 6 شهور فقط و بعد كده خواصه بتتغير حتى لو لم يكن مستخدم.

راجع برضه على شحن الفريون.....و على كاوتش العربية......الكاوتش ممكن تلاقيه نشف شوية بس هيمشيك عادى....على الأقل 10 ألاف كمان.

لو عندك وقت أكشف على العربية فى مركز خدمة أو الوكيل لمجرد الإطمئنان....مش أكتر.

أنا فى 2010 أشتريت نيسان موديل 2009 من الوكيل زيرو......مكنش فيها مشاكل تذكر غير الكاوتشة اللى فى الكابوت كانت عاوزة تتغير علشان كان الكابوت مقفول عليها فترة طويلة بطريقة غلط....و غيروها على حسابهم.
و على 5000 كيلو كنت بشتكى من غربلة مع السرعات و كشفوا فى التوكيل و قالولى الكاوتش و غيروه على حسابهم ( بس بصراحة بعد التغيير الغربلة فضلت موجودة و كانت مشكلة ترصيص و مكنوش عارفين يحلوها فى التوكيل........عملتها برة و الحمد لله أتظبطت )

شكراً جزيلاً لكل من elmkaneeki & Ahmed A.Maksoud و أعتقد إن الفريون كويس لإن التكييف ممتاز

حمد لله على السلامة
مبدئيا كده تغير زيت تانى عشان زيت ال10 الاف صلاحيته سنة حد اقصى حتى لو ما اتحركتش بالعربية
ولو عاوز اطمئنان اكتر روح بيها اى مركز خدمة نيسان يشيك عليها كلها يبقى افضل

يا باشا غير زيت الموتور و شوف مقاس الكاوتش و بس و عيش حياتك و حمدلله علي سلامتك

أولا : حمدا لله على السلامة
ثانيا :
انصحك تروح مركز خدمة الصيانة كانك رايح تعمل اي صيانة دورية وقول لهم ع الوضع وهم هيقوموا بالواجب طالما العربية لسة في الضمان (غالبا هيعملوا اللي مفروض يتعمل في صيانة ال 15000 والتكلفة مش هتكون كتيرة ان شاء الله ) وبكدة تتطمن على العربية وبالك يرتاح بإذن الله ....

مبدئيا يا دكتور .. حتغير طبعا الزيت

وكمان مفروض تشيك على الفريون بتاعت التكييف

وغالبا حتعمل صيانة اللى بالزمن والتوقيت .. بس مش عارف حقيقى حتعمل صيانة ال24 شهر ولا 12 شهر

لان مفروض العربية لما بتتركن سنة .. لازم تشيك علىا لسيور وعلى كل حاجة كاوتش وسوائل عشان الركنة .. فلازم تروح التوكيل

وتحكليهم على اخر صيانة وانك ركنت العربية .. وتشوف ردهم عليك ايه وحتعمل صيانة ايه .. وتطمنا

طالما كنت بتابع مع مودرن ومرتاح معاهم .. روحلهم وهما حيقوموا بالازم

تحياتى

وان شاء الله نشوفك قريب باذن الله

شيك عليها في مودرن أو السبع ياباشا .. وإن شاء الله مش هايطلع فيها حاجة غير تغيير زيت الموتور

شكراً جزيلاً على ردودكم يا جماعه .... Ahmed.tv لك وحشه و ما شاء الله عليك عامل شغل جامد جداً و ربنا يجازيك كل خير ... انت و كل النيساناويه .... بس بصراحه مستتقل المشوار للتوكيل خاصةً فى رمضان لإنه مشوار مش هين .... فكنت بسأل على الحاجات اللى مفروض أعملها هنا على م أروحلهم بعد رمضان - إن شاء الله - يعنى الزيت أحط نوع إيه و الكميه قد إيه (بالفلتر و بدونه) ....