مشكلة في فتيس سيترون c4 (اوتوماتيك)

مساء الفل على أحلى رجالة وكل سنة وأنتم طيبين

أنا العربية بتاعت والد مراتي سيترين C4 موديل 2007 واستخدام العربية بسيط جدا عاملة 37,000 كم . العربية بتتركن كتير فأنا أول ماخدت العربية اليومين دول بعد ماعربيتي اتسرقت امشي حالي المهم يظهر إني مرزق. عشان مطولش عليكو وانا ماشي الأسبوع اللي فات فجأة لقيت العربية كتبت على ال trip computer "Service Gearbox" المهم راكنت العربية وبطلتها راحت لمبة elserviceاتطفت قلت خلاص يا دار مادخلك شر وطنشت. المهم بعدها بكم يوم كده لقت الجيربوكس نتش كده بطريقة غريبة كأنها مانيوال وال trip computer كَتب المرة ده حاجة تانية "Faulty Gearbox " مش service وبعدها علق الفتيس على D3 علما إنه معمول على auto mode مش manual. المهم راكنت العربية وجبت el-N وبعدين D لقيته نط على D3 برده فبطلت العربية ودورتها رجعت طبيعيه فكلمت امير وجوزيف لقيتهم افلين لحد يوم الجمعة اللي جاية فكلمت التوكيل بتاع سيتروين عز العرب فالعجوزة ورحت قلتله على اللي حصل المهم عمل service للعربية كامل (بوجهات , زيت, تيل , سيور عشان بقالها 4 سنين ). وبعد مخلص قال لي إن موضوع الجيربوكس ده لازم أروح ابورواش .

المهم سمعت الكلام ورحت أبورواش وخدت أجازة تاني يوم عشان قلقت على العربية بصراحة وكمان جاية تبوظ معايا أنا يعني مستنيني المهم العربية باتت يومين وامبارح كلمني قوليلي في مشكلة في الضغوط بتاعت الجيربوكس ولزم ناخد عينه من المصفى المهم طلعت العينة فيها رايش وقال لي لازم نفتح الفتيس عشان نعرف العيب قلتله كلام جميل بس قال لي ده حياتكلف 3000 جنيه غير شامل التصليح فقلتلو قفل و إن شاء الله حاستلم العربية النهاردة ومش عارف أعمل إيه


ارجوكم افيدوني في مشكلتي وجزاكم الله كل خير

نصيحه فتيس استيرادجديد وريح نفسك ووفر فلوس التوكيل

ده ممكن يكون حساس فتيس

مش معقوله يعني وداها التوكيل ومعرفوش هناك ان المشكله في حساس استحاله

طب يا جماعة حد يقولي الفتيس الاستيراد ده بكم ومنين ومين يركبه عشان العربية ده الواحد بيخاف أي حد يشتغل فيها عشان كهرابتها صعبة شوية

ياريت لو في حد غير فتيس يقولي جابه منين وعملوا عند مين وإذا كانت المشكلة اتحلت بعدها ولا لأ

كل سنة وأنتم طيبين وربنا يتقبل

اقتباس:

---

المشاركة الأصلية كتبت بواسطة Beeso

طب يا جماعة حد يقولي الفتيس الاستيراد ده بكم ومنين ومين يركبه عشان العربية ده الواحد بيخاف أي حد يشتغل فيها عشان كهرابتها صعبة شوية

ياريت لو في حد غير فتيس يقولي جابه منين وعملوا عند مين وإذا كانت المشكلة اتحلت بعدها ولا لأ

كل سنة وأنتم طيبين وربنا يتقبل

---

اولا انت ليه اقنعت نفسك بأن حل مشكلتك فى تغيير الفتيس و دلوقتى بتدور على حد غير فتيس على الرغم من ان التوكيل نفسه لسه مش متأكد حسب كلامك.
- ثانيا تضمن منين ان الفتيس الاستيراد هيبقى مفيهوش نفس عيب الفتيس بتاعك و حتى لو طلع سليم ان الشغل يتعمل فيه مظبوط و خصوصا انك عارف ان الكهربا بتاعة العربية حساسة جدا .
نصيحتى ليك الاتى :
- اولا ياريت متستسلمش لفكرة معينة لان العيب ممكن يبقى تافه جدا و بسيط .
- من اللى قريته فى المنتدى فعلا انه فى عيب فى فتيس الاوتوماتيك ظهر فى موديلات 2006 و بعض 2007 بس لاحظ ان العيب ده لو موجود فى عربيتك هيكون موجود من أول ما والد مراتك اشتراها يعنى ممكن تسأله اذا كان المشكلة دى حصلت معاه قبل كده أو لاء لان المشكلة دى اكيد مش هتظهر فجأة كده
- بخصوص المشكلة اللى الناس بتتكلم عنها فى فتيس موديلات 2006 و بعض 2007 حلها ان بينزل Software جديد للفتيس و المشكلة عبارة عن نتشة أو هبده فى الفتيس يعنى مش اللى انت بتتكلم عليه خالص
- و كمان فيه حاجة مهمة جدا انت قولت عليها دلوقتى و هى ان العربية كانت مركونة فترة طويلة و ده طبعا ممكن يؤثرعلى حاجات كتير فى العربية بتاعتك بالذات لانها على ما قريت برده فيها 11 جهاز كمبيوتر و اعتمادها على الكهرباء شيء اساسى و وارد جدا ان العيب اللى عندك يكون اساسه حاجة فى كهربة الفتيس مش فى ميكانيكا الفتيس يعنى ممكن تكون حاجة سايبة أو حاجة محتاجة تتنظف يعنى متستهونش بأى حاجة فى كهربة العربية ممكن تكون بسيطة لان الموضوع ده جصل معايا فى فتيس عربيتى و اوقات مش بينقل و اضطر كتير ابطل عربيتى و ادورها تانى عشان المشكلة تروح و اكتشفت فى الاخر ان كابل الارضى فى عربيتى سايب!!
- فيه موضوع غن استفسارات ستروين و الى بيرد عليه مهندس رامى من أمير و جوزيف و من اللى قريته فى المنتدى ان ليهم خبرة كويسة فى الستروين.
- فيه كمان اعضاء هنا عندهم ال C4 شكروا فى مركز صيانة صاحبه اسمه مهندس أحمد غلوش .
و نصيحة اخيرة شيك على كل حاجة فى الكهرباء قبل ما تاخد قرار تغيير الفتيس.
و ربنا يوفقك

طمنا ايه الاخبار يا باشا