معامله التوكيل مع الأجانب في مصر !!

انا هحكي موقف حصل قدامي شخصيا ومكنتش عايز احكي في الأول غير لما اشوف هيخلص علي ايه
الموضوع ان احدي مهندسي الشركة عندنا (فرنساوي الجنسيه)
مستلم عربيه بيجو من الشركة
المهم كانت العربيه عند كل مطب لما بيهدي تبطل والعربيه اوتو علي فكره
طبعا العربيه لسه في الضمان والمهندس اتخنق من كده وطلب انها تروح التوكيل وطلب مني شخصيا اتابعها لأنه عارف ان عندي خلفيه كويسه في السيارات
المهم روحت التوكيل وقالولي العيب من الكنترول وهياخد اسبوع علي التغيير
طبعا وافقت وسبت العربيه ورجعت الشركة
بعدها بساعه رايح انا والمهندس موقع قالي فين العربيه قولتله سبتها وهجيب عربيه من الجراج نتحرك بيها عقبال التانيه ما تيجي
لقيته بيقولي تانيه ايه وجراج ايه!! وهو مستغرب جدا
قالي مش انت سيبت العربيه في التوكيل علشان فيها عيب
قولتله اه قالي فين بقي العربيه اللي مكانها قولتله هجيب واحده من جراجنا قالي لأ فين عربيه التوكيل
قولتله ازاي يعني قالي يعني انت سبت العربيه وماخدتش عربيه مكانها قالتله لأ طبعا
قالي ازااااااااااااااااااااااا اااي!!!!
المهم لقيته عمل تليفون لحد فرنساوي وكان بيتكلم وبيزعق جامد
بعدها قالي احنا مش هنروح مكان وانا طالع بريك وسابني ومشي
مافيش ساعه ولقيت واحد بيكلمني من التوكيل بيقولي اوصل لحضرتك ازاي علشان اسلمك العربيه البديله لحد التانيه ما تيجي
طبعا اخد العنوان وجالي الشركة سلمني عربيه نفس النوع واللون وعليها نمر جمرك القاهره
وطلعت للمهندس قلتله قالي انتو يا مصريين مش عارفين حقكم فين
قالي طول ما العربيه عيب صنع وهتاخد وقت يبقي لازم تاخد بديل مكانها طبعا انا بقيت محرج جدااااااااااا
وبعد ما العربيه اتصلحت اتصلو بيا اروح اخدها واسلم التانيه ولما بلغت المهندس قالي اللي عايز حاجه ييجي ياخدها احنا مش هنروح لحد
وفعلا مافيش ساعه ولقيتهم جيين سلمو العربيه واخدو بتاعتهم وجابوها مفوله كمان :)

تفتكرو لو حد فينا حصل معاه كده يقدر ياخد حقه كده !!!!!

لا طبعا لو مصري ماكنش قدر ياخد حقه

للاسف مصر لسه زي ما هي

طب باشا هو كلم مين :))))))))

اقتباس:

---

المشاركة الأصلية كتبت بواسطة ashouhdy

طب باشا هو كلم مين :))))))))

---

ههههههههههههه نفس الى جة فى بالى
ياباشا احنا بندوى العربية التوكيل ونقول يارب تطلع سليمة
مش ناخد واحدة بدلها
بس اكيد الراجل دة واصل اوووى دة كمان بيزعق للى بيكلمو ؟
ممكن يكون كان بيكلم السفارة ؟

ياااااااااااااااااه
كل ده عشان واحد اجنبي
بصراحة معاه حق ده حقه والمفروض حق اى عميل تانى
اللى اعرفه ان اللى بيجيب من التوكيل بيبقي ليه معامله خاصة
يعنى احترام واى عطل تاخد مكانه عربية تقضي بيها لغاية عربيتك ما تتصلح
بس احنا شعب محترم جداااااا
حتى حقنا مش عارفينه
ثورة ثورة الى الامام
خخخخخخخ

سبحان الله فعلا ياريت رقم الراجل الفرنساوى فى رسالة : ) اظن توكيل رينو بيعمل كدة للمصريين ,,,

يانهار ابيض ....

لسه بدري علينا لحد ما نحترم بعض في المعاملة ونساوي بين الناس

ههههههه تلاقية كلم صاحب التوكيل وهو يعرفة ولا حاجة :)

حصلت لزميل عندى فى الشركة مع توكيل نيسان
اعطوه عربيه بديله (العطل كان سيأخذ شهر الى ان تأتىى القطعه من اليابان)
بس بعد ما كلم طوب الارض و الموزع المعتمد لدى نيسان فى السويس تقريبا هو اللى اتوسط له علشان يعطوه عربة بديله

السلام عليكم و رحمة الله و بركاته

على الرغم من أن :

شوف مصر فيها كام واحد فرنساوى راكب عربية بيجو و شوف فيها كاااااااااااااااااااااااا ام واحد مصرى, راكب عربية بيجو, يعنى هما أصلا أصلا لحم أكتافهم من خير المصريين, مش الفرنسيين !!!!!!!!!!!!!!

انا متوقع انه كلم السفير الفرنسي في مصر وبدوره كلم التوكيل وزعق فيهم

سبحان الله

اصل ده الطبيعى فى اى حته بره مصر طبعا
انك لما تروح التوكيل و تسيب العربيه
بتاخد عربيه تانيه
و لما عربيتك بتتصلح
بيكلموك
يبعتولك عربيتك
مغسوله و متصلحه و متروقه
و ياخدو عربيتهم

انما هنا فى مصر
فعلا بنتحايل عليهم عشان يصلحو العربيه
يبقى هناخد عربيه تانيه

ياللهول ... هههههه

ده انت ادتني شحنة احباط في الصميم ...دا انا كنت فاكرك بتكلم عن توكيل بيجو في فرنسا مش في مصر :8954[1]:...... الحمدلله غبور باشا مش مخلينا محتاجين حاجه... ربنا .... ولا بلاش عشان الايام المفترجه اللي حنا فيها :angry26:

:crying1: ده الواحد بيخش التوكيل بيدعى ربنا انها ترجع سليمة و بيصلى ركعتين شكر لله انها طلعت اصلا من غير م تتقلب مش تقولى اداكو عربية تانية

سؤال محيرنى هو الفرنساوى ده ابن مين ف طرة فرع فرنسا عشان يعملو لية كدة:))))))))))))؟؟

معندهمش طرة في فرنسا اصلا علشان في الاغلب موصلوش للي هما فيه الا لما احترمو نفسهم في المعاملات المادية شفافية بجد

فعلا هناك اسلام بلا مسلمين وهنا مسلمين بلا اسلام ربنا يهدينا جميعا لما فيه الخير و الصلاح والفلاح
وقبر يلم العفش

واحد صاحبي كان اشترى نيو اكسنت زمااااان وكان فيها عيب صناعه وطبعا داخ على ما اثبت انه من عندهم مش عيب منه هو وبعد معاناه وعلشان يتأكدوا جابوا واحد كوري (تقريبا كان جاي يعمل شغل ما فى الشركه خلوه يشوف العربيه بالمره مع اللجنه) المهم الراجل الكوري قعد يعتذر لصاحبي اعتزار التنين لما عرف ان بقاله 6 شهور فى الحوار ده وقاله ان الشركه في كوريا بتاخد العربيات دى وبتغيرها بدون تحميل الوكيل اي تكاليف وطلب من الوكيل انه يديله عربيه تانيه لحد ما يغيروله العربيه دى بواحده زيها تجيله راسا من كوريا مخصوص بس هو كان اتعقد من النيو اكسنت المهم الباشاوات فى التوكيل طلعوله عربيه باسات (ماعرفش ليه مادولوش هيونداي اى حاجه علشان ماحدش يسأل) وقالولوا امضى عليها علشان لو اتخدشت هاندفعك تمنها كامل صاحبي طبعا رفض وقالهم ادونى 28 بس مش هامضى عليها وحصلت خناقه تانيه على اي حال هما قالوله لو تحب تبدلها باي عربيه تانيه وتدفع الفرق باعتبار عربيتك مستعمله وناخدها بسعر المستعمله وخسفوا بتمنها الارض وفى الاخر هو عملها اعلان فى نادى الصيد والي اشتراها راح معاه التوكيل واثبت حقه وخد العربيه البدل مكانها ادي حال التوكيلات في مصر نصب في نصب

مديرى فى الشغل عنده عربية جيتا , العربيا فجأة مش عايزة تدور , المهم كلم الضمان و خدوا العربية و قالوا له ان فى مشكلة فى الفتيس و لازم يتصلوا بالمانيا

المهم كل ما يكلمهم يقولوا له المانيا مردتش علينا , يومين و يكلمهم يقولوا المانيا مردتش

قفش عليهم و زعق و عمل مشكلة , ادوله عربية تانية باسات ستيشن لغاية لما عربيته تتصلح

للاسف عشان تاخد حقك لازم تعمل مشكلة و تزن !!

انا شايف ان المشكلة مش من التوكيل
فى مصرى نظام كويس جدا فى كل المجالات لكن للاسف نظام ورقى هش
يوجد فى مصر حهازاسمه الغش التجارى لكن للاسف غير مفعل وغير معلوم لدى اغلب المصرين
وعلشان كل اصحاب روؤس الاموال بيدفعوا كويس حتى لا يتم التفتيش الدورى ومتابعه مشاكل المصريين لدى اصحاب التوكيلات المختلفه -
علشان كده تجدنا نطالب بحقنا بمزله وليس بقوه لان النظام هش لان الاباطرة هم مراقبى النظام
لاننى صاحب الردود وانا منهم شايفين ان اصلاح السيارة فى التوكيل بدون خسائر هى امنيه وليس حق
اتمنى من الله وفى هذا الشهر الكريم ان تتغير مصر الى الافضل بنسبه 180 درجه للامام

طبيعي أن الشركات أو التوكيلات تعمل فينا أكتر من كدا .

لا عندنا قوانين و لا عندنا سواقين محترمين و بالتالي طبيعي أن التوكيل ما يطلعش عربية تانية
لأن العربية شئ أستهلاكي و أحنا عارفين أستهلاكنا عامل ازاي !!! زي الزفت طبعا
أذا كان فيه ناس أصلا مش بتهتم بعربياتها هي شخصيا . هاتهتم بعربيات الوكيل البديلة .

كل بلد و لها طريقة في المعاملة مع مستهلكيها .
لما نكون زي بتوع أوروبا و بنلتزم بالسرعات و بنلتزم بالاشارة و تمشي في الشارع ما تشوفش عربية مخبوطة
يبقى يعاملونا زي ما بيعاملوهم .

أنا لو وكيل ........ مش هاطلع عربيات بديلة لحد إلا لو الشركة الأم هي اللي هاتوفرها على حسابها .

على فكره مش كل التوكيلات فى مصر كده

:)
طيب انا بقي انهارده هعرف هو كلم مين
لأنه في الأول كلم حد اخد منه ميل وعمل حاجه من الموبايل وجاب رقم وبعدها اتصل وزعق d:
بس انا بأذن الله هعرفلكم ايه اللي حصل بالظبط

اكيد كلم الشركة الام في فرنسا وعشان كدة هما جابوا وري عشان هما المفروض يلتزموا بالقواعد دي لكن مش بيطبقوها
ناس تخاف متختشيش

اقتباس:

---

المشاركة الأصلية كتبت بواسطة tutankhamoun

طبيعي أن الشركات أو التوكيلات تعمل فينا أكتر من كدا .

لا عندنا قوانين و لا عندنا سواقين محترمين و بالتالي طبيعي أن التوكيل ما يطلعش عربية تانية
لأن العربية شئ أستهلاكي و أحنا عارفين أستهلاكنا عامل ازاي !!! زي الزفت طبعا
أذا كان فيه ناس أصلا مش بتهتم بعربياتها هي شخصيا . هاتهتم بعربيات الوكيل البديلة .

كل بلد و لها طريقة في المعاملة مع مستهلكيها .
لما نكون زي بتوع أوروبا و بنلتزم بالسرعات و بنلتزم بالاشارة و تمشي في الشارع ما تشوفش عربية مخبوطة
يبقى يعاملونا زي ما بيعاملوهم .

أنا لو وكيل ........ مش هاطلع عربيات بديلة لحد إلا لو الشركة الأم هي اللي هاتوفرها على حسابها .

---

+1111111

بصراحه كلام منطقي جدااااا

انا كمان منتظر هوة عمل اية و كلم مين

لا تعليق
ربنا يصلح حال مصر

عمااااااااااااااااااااااا ر يا مصر
اللهم انى صائم :8954[1]:

ليه اللى جايلك اجنبى
عارفة عليه تطبطبى

:(

فكرنى بفيلم عسل اسود والباسبور الامريكانى فى المشهد الاخير

اقتباس:

---

المشاركة الأصلية كتبت بواسطة HeMa_LanCeR

:)
طيب انا بقي انهارده هعرف هو كلم مين
لأنه في الأول كلم حد اخد منه ميل وعمل حاجه من الموبايل وجاب رقم وبعدها اتصل وزعق d:
بس انا بأذن الله هعرفلكم ايه اللي حصل بالظبط

---

هوة انت رحت فين .عاوزيين نعرف هوة كلم مين :M_yes[1]:

خلاص يارجالة
الحل بسيط جداااااااااا
..
أي واحد رايح التوكيل , وعنده عيب صناعة
يكلم الشركة الأم من النت الأول ,قبل مايروح
والشركة الأم تدي أوامرها للتوكيل إنها تستقبلك وتعملك كل الي انت عاوزه
أو
تروح التوكيل تتكلم بأدب وتطلب حقك كامل
لقيت قلة أدب أو بهدلة
قولهم النهاردة هيتبعت 1000 إيميل مني ومن أصحابي للشركة الأم , ونقولهم إنكم بتطفشوا الناس بقلة أدبكم
عربيتك تخلص وإنت واقف وهتاخد حقك تالت ومتلت
تجديد عقود التوكيلات بتتم بشكل دوري,,وأي حد واخد توكيل بيمسك فيه بإيده وسنانه
يعني هيشيل جزمتك فوق راااااااااااسه

الموقف ده فكرني بموقف شخصي اتعرضت له من 4 سنين خارج مصر, اسمحولي احكي لكم,,,
كنت في بوخاريست و حاجز تذكرة ذهاب فقط للكويت على الخطوط الجوية الأيطالية"ALITALIA" بوخاريست - روما - الكويت و سبب حجزي لتذكرة ذهاب فقط أني مكنتش عارف تاريخ العودة بالضبط فقلت أبقى أحجز العودة من الكويت لما أخلص المهمة بتاعتي هناك و أكون متأكد من تاريخ العودة.
اقلاع الرحلة من بوخاريست لروما كانت الساعة 11 الصبح و لما ابتديت أعمل Check- in وكان موسم سفر عشان كانت أعياد القيامة المسيحية و كان في زحام و ناس كتير مسافرة, المهم فوجئت بالموظفة بتقولي تذكرتك ذهاب فقط , مش هينفع تسافر لازم تكون ذهاب و عودة لأني داخل الكويت بتأشيرة زيارة مش اقامة, المهم بعد نقاش و محاولة لأقناعها بسفري, مانجحتش أني أنهي اجراءات سفري و قالتلي الحل الوحيد لو عاوز الحق الطيارة أني أشتري تذكرة عودة,سيبتها و مشيتبفكر هعمل ايه! رحت بسرعة مكتب ALITALIA و اضطريت طبعاً أشتري تذكرة جديدة ذهاب و عودة عشان منفعش أني أشتري تذكرة عودة فقط و دفعت مبلغ كبير, و قبل ما أدفع سألت الموظفة ال Check - in لسه مفتوح, قالتلي أيوة لسه مفتوح و تقدر تلحق طيارة روما, جريت أعمل Check - in من جديد, لقيت الموظفة مندهشة و في حالة صمت و بعدين بدأت تبكي و انا واقف أدامها بحاول أفهم الموقف!!!

بعد ما هديت شوية, فهمت منها أن في حاجة حصلت اسمها Overbooking لأنها تخيلت أني هلغي سفري و حجزت مكاني على رحلة روما لشخص آخر!!! و طبعاً كان في خلال الوقت ده كله كان ال Check - in بتاع طيارة روما قفل و الطيارة بتستعد للأقلاع, بصيت على الشاشة لقيت في رحلة تانية في خلال 3 ساعات لميلانو, قلتلها خلاص احجزي لي على رحلة ميلانو, قالت لي للأسف ماينفعش عشان مافيش طيارات من ميلانو للكويت, من روما للكويت فقط! قلتلها خلاص احجزي لي على أي رحلة تانية لأي خطوط تانية بينكم و بينها شراكة أو اتحاد و ده كان الحل الأمثل.
هي طبعاً كانت منهارة و زمايلاها بيهدوها عشان طبعاً ممكن تفقد وظيفتها و الشركة تدفع لي تعويض كبير في حالة لو بدأت اجراءات شكوى رسمية ضد الشركة.

بعد حوالي نصف ساعة, قالتلي حجزت لحضرتك على رحلة KLM الهولندية بكره الساعة 6 الصبح بوخاريست - امستردام - الكويت, جميل جداً بس الساعة دلوقتي تقريباً 1 ظهراً, هل يعقل أني أقعد كل الوقت ده هنا في المطار لغاية 6 الصبح؟! ده أنا اللي بقولها الكلام ده, قالتلي لا, ALITALIA حجزت لحضرتك في فندق REN و ده فندق الماني 4 نجوم يبعد عن المطار 10 دقائق بالسيارة. جميل جداً, طيب هروح أزاي للفندق؟! ALITALIA حجزت لحضرتك ليموزين هيوصل حضرتك حالاً للفندق و هيكون عندك الساعة 4 صباحاً عشان يوصلك المطار.

و لقيتها بتديني بونات مختومة باسم الشركة و شعارها للغذاء و العشاء في أي مطعم أختاره من مطاعم الفندق. رائع جداً.

قبل ما أبتدي أتوجه للخارج عشان أركب الليموزين, لقيت مدير مكتب ALITALIA جاي ليا و طلب أني اتفضل معاه في مكتبه و فوجئت بيه بيديني تذكرة طيران ذهاب و عودة صالحة لمدة سنة لأي مكان في الدنيا أنا أحدده مجاناً, و لما لاقاني مستغرب, قالي ده اعتذار من شركتنا على أي ضرر ألم بيك و قعد يعتذر أكتر من مرة و ماسبنيش أمشي غير لما أتأكد أني راض.

رحت الفندق, خدت دش سخن, عملت مساج, كلت, استرخيت و نمت كويس و قمت الصبح فرش جداً خدت الليموزين و على المطار, و على أمستردام و المفاجأة الجميلة و الأخيرة, الكرسي بتاعي (بيتفرد يبقى سرير بمعنى الكلمة و مزود بزرار يعملك مساج خفيف طول الرحلة) على رحلة بوخاريست أمستردام و كمان على رحلة أمستردام الكويت على الدرجة الأولى و شتان الفرق في المعاملة و نوعية و جودة و كمية المأكولات و المشروبات المقدمة طوال الرحلة الطويلة 10 ساعات بالاضافة لهدايا تذكارية من KLM
الحمد لله كنت سعيد أني خدت حقي و كنت راض خاصةً أن التأخير ده لم يسبب لي أي ضرر أو مشاكل.
آسف على القصة الطويلة بس حبيت أسردها بالتفصيل,

شكراً