الموضوع: سؤال بسيط عن تجارة الجملة ؟؟؟

السلام عليكم ورحمة الله وبركاته

دلوقتى مشروع محل بيع منتجات جملة ( بسكويتات وشيبسيهات وكدة يعنى ) محتاج راس مال كبير ومكان للتخزين

فانا دلوقتى قلت اجيب حاجات من محلات الجملة الكبيرة واوزعها على المحلات القطاعى والاكشاك وكدة.
بس لقيت بتاع الجملة هيديهالى بنفس السعر اللى بيدية لبتاع القطاعى يبقى انا ملييش فيها مكسب
يعنى هاخد من تاجر الجملة الحاجة الفلانية ب 15 جنية مثلا ودوة نفس السعر اللى القطاعى بيشترى بية منه يبقى انا مش هبيع بنفس السعر دوة فهبيع بتمن اكتر فمحدش هيرضى ياخد منى فكدة لازم ابعهالة ب 15 برضة يبقى مكسبتش حاجة ؟؟؟؟

حد عندة فكرة الموضوع دوة بدايتة تبقى ازاى ؟؟ والدخلة بتاعتة منين ؟؟؟

المشروع ده زى اى مشروع فى الدنيا عايز تلات حاجات
1- رأس مال
2- خبره
3- تفرغ (خصوصا فى البداية)

اولا رأس المال : وده اهم حاجه عشان تقدر تجيب كميات كبيرة بسعر كويس
وكمان رأس المال بيكون فى موضوع الشبسيات والكلام ده مهم لان الشركات والموزعين بيكون ليهم مندوبين بيلفو على المحلات والسوبرمركتات ينزللهم الى عايزينه ومطلوب من كل مندوب انه يوزع قدر معين كل يوم فسعات كتير المندوب بيكون زهقان او تعبان فبيروح لتاجر جمله ينزله كل الى فى العربيه بسعر حرق مقابل انه يدفعله كاش

ثانيا الخبرة : لازم يكون عندك خبره فى المجال من فتره لانك بتتعامل فى ناحيتين :
1- الشركات والموزعين : ودول الى بتاخد بنهم البضاعه ولازم تكون عارفهم وبينك وبنهم ثقه عشان لو اتبقى ليهم فلوس او حاجه وكمان تكون عارف مين الافضل فيهم ومين الى هينزلك بسعر ارخص ومين الى هينزلك فى كل الاوقات ومش هيهرب منك وقت العروض
2- اصحاب المحلات : ودول الى هيشتروا منك البضاعه ولازم تكون عارف على الاقل 20 واحد منهم وطبعا لازم يكون ليك نظام معين مبنى على خبرتك فى المجال يعنى هتبيع كاش ومش هتبقى لحد حاجه وده هيبقى شعارك فى المقابل لازم يكون سعرك رخيص اوي
ولا هتبيع بسعر متوسط وممكن تسيب جزء من الفلوس وفى الحاله دى هتدخل في حوارات ووجع قلب وممكن يتاكل عليك فلوس

ثالثا التفرغ : لازم تكون واقف وموجود بطول النهار وشايف الى داخل والى طالع ومتتوقعش ان سعات عملك هتقل عن 15 ساعه يوميا

طبعا الموضوع مش سهل زي زمان لان دلوقتى بقى في موزعين ومندوبين بيلفو على المحلات وبينزللهم البضاعه لحد عندهم وكمان بسعر كويس فلازم تكون دارس المشروع كويس وعارف انت هتعمل ايه بالظبط
خصوصا ان أغلب بتوع الجمله بقو بيبعوا قطاعى دلوقتى بجانب الجمله