الموضوع: عايز اعرف احسن الفنادق فى شرم الشيخ لشهر العسل

المشاركة الأصلية كتبت بواسطة أحمد كمال

المواقف مالهاش اول من اخر

بدءا بتطنيش الطلبات البسيطة الطبيعية جدا لاي نزيل (عايز فوط نضيفة مثلا عشان الفوط اللي في الاوضة مبلولة او متوسخة .......) ...... مرورا بالسؤال بطريقة شكاكة جدا على البوابة (هو حضرتك نزيل هنا؟) و طبعا بيبقى فيه أمم داخلة قدامك و وراك بس عشان عينيهم خضرة و شعرهم اصفر محدش بيقول لهم بم و كان انت اللي شكلك ما يجيبش مثلا ....... مرورا بمرة الباشا عمل لي كارت جديد عشان نسيت كارت الاوضة في العربية و العربية مركونة بعيد و اما وصلت الاوضة لقيته ما بيفتحش و الاوضة بعيدة جدا عن الريسبشن كلمتهم من تليفون السيرفيس اللي في الطرقة ما رضيوش يبعتوا المفتاح مع حد عشان "مش فاضيين" .... مرورا بالباشا بتاع الهاوس كييبينج اللي مرة حاول يفتح عليا الباب انا و مراتي مع اني معلق "برجاء عدم الازعاج" و صحانا من النوم مفزوعين و بيقول لي مش انتوا "هتأووتوا" (يعني هتعملوا تشيك أوت) النهاردة (و الساعة كانت لسه 8 و لا 9 الصبح غير ان العلامة متعلقة !!) ...... مرورا بالاوتيل الغير محترم (خمس نجوم على فكرة) اللي عمل بوفيهين منفصلين في المطعم واحد للمصريين و التاني للاجانب !!! ........ و انتهاءا بالاوتيل الظريف اللي كنت حاجز فيه اوضة دابل بسرير واحد كبير و اوضة plus room مقابل خمسة دولار بس زيادة و دي حاجة خاصة بالفندق ده في التصنيف و الاستاذ كان عايز يدفعني 100 جنيه بدل ال 5 دولار (طبعا قلت له لما تشوف طبلة ودنك) و نزلي في اوضة بسريرين (و ما سبتوش الا اما غيرها و في ساعتها !) ........ و انتهاءا طبعا بكل الفنادق المحترمة اللي بتحاسب المصريين بضعفين و تلات اضعاف سعر الاجانب و تديهم على قفاهم في المعاملة

انا ما سافرتش برة دول كتير الصراحة (هما 4 دول) بس احب اقول ان المصريين افشل ناس في صناعة الضيافة hospitality industry....... بجد انا اما كنت في لبنان قلت هما العرب اللي قدامهم ييجوا هنا و مع ذلك بييجوا مصر بييجوا مصر ليييييييييييييه ؟؟؟؟؟؟ اصغر قهوجي في اقل كافيه متواضع في بيروت بيعرف يضايف الناس و يرحب بيهم و يعاملهم احسن من المتر دوتيل بتاع المطعم الدوار في مصر (اللي كان بيعاملني انا و مراتي بمنتهى القرف من طرطوفة مناخيره ....... مع ان الحساب تجاوز الالف جنيه بشويتين !!! و و الله العظيم ما طلبنا منه حاجة زيادة ان شا لله حتى كلينيكس !!!!!!! ) ...... و بلاش بالمرة نتطرق لمصر للطيران و المعاملة الزبالة عليها بالمقارنة مثلا - بلاش بإيميريتس لاني هابقى باقارن فريق كفر البطيخ بفريق البرازيل - بناس إير (اللي هو خط طيران اقتصادي و كل حاجة عليه حتى كباية المية بفلوس ....... بس و الله محترمين عن مصر للطيران ميت مرة) ....... و بلاش نتطرق للمعاملة في المطارات اللي بتدي اولوية في كل حاجة للاجنبي ....... و لا يمكن المصريين بيكسروا المطارات و بيسرقوا المناديل من الحمام كمان !!


على فكرة كل ده حصل معايا شخصيا مش حكايات و اقوال مرسلة ...... و لو كملت انا ممكن احكي لبكرة ...... بس طرطايف صوابعي وجعتني !!

لا كدة حلو قوي هههههههههههه

Coral Beach Rotana Tiran
ممتاز

لازم بردة نقول الايجابيات
انا بسبب طبيعة شغلى بسافر كتير وبصراحة الخطوط المصرية بقت احسن كتير واحسن مثلا من الخطوط السعوديةفى المعاملة وفى نضافة الطيارة
دة غير مهارة الطيرايين المصريين فى الهبوط اللى مشفتش زيها حتى فى الخطوط الالمانية والتركية وغيرها

وان شاء الله نوصل لنظافة الخطوط الاماريتية

انا لسة راجع من رحلة لماريوت شرم الشيخ فى خليج نعمة ...... ممتاز و الاوضة الدبل ب 600 جنيه فطار و عشاء ..... بس فى الماونتن سايد ... اللى بيفصله عن البيتش سايد الشارع العمومى ..... يعنى لو عايز تروح البيتش لازم تطلع و تعدى الشارع و تدخل البيتش سايد.

المشاركة الأصلية كتبت بواسطة mr_kenawy

انا لسة راجع من رحلة لماريوت شرم الشيخ فى خليج نعمة ...... ممتاز و الاوضة الدبل ب 600 جنيه فطار و عشاء ..... بس فى الماونتن سايد ... اللى بيفصله عن البيتش سايد الشارع العمومى ..... يعنى لو عايز تروح البيتش لازم تطلع و تعدى الشارع و تدخل البيتش سايد.

وانطباعك عنة اية؟

المشاركة الأصلية كتبت بواسطة ashouhdy

سهل حشيش ياباشا وعيييييييييييييييش احلى خدمة واحلى طبيعة

مش دة اللى فى الغردقة
لو هوة انا رحتة من كام سنة وكان فعلا مميز والناس بتوع الانيماشن تيم نشطيين جداااااا

هيلتون شارم دريمز
بجد الفندق تحفه والمعامله والناس زي الفل مشفتش اي حاجه من الكلام ده
مره في المطعم في الفطار او العشاء حد من اللي شغالين في المطعم شايفني انا مراتي بنتحايل علي عمر عشان ياكل اي حاجه و مش راضي قال سيبهولي وتاكل ايه وقعد يهظر معهاه وجابله زبادي فواكه وده مش موجود في البوفيه
وشيف جه سئلني ايه اخبار الاكل لو في حاجه مش عجباك قول ولو عايز حاجه حته لو مش في البوفيه قول وانا هعملهالك كذ مره
انا الفندق بصراحه اتبسطت فيه قوي