عرض للطباعة
السلام عليكم ورحمة الله وبركاته
عاوز اعرف الطريق الدولى الساحلى من اسكندريه لدمياط اخباره ايه لانى مسافر ان شاء الله الاسبوع الجاى
الطريق امن بليل ولا لا
والوصله من دمياط لجمصه اخبارها ايه خصوصا بلليل
فى مطبات مفاجئه ومكسر ولا الطريق نضيف وحلو
ياريت الناس اللى بتسافرعليه كتير تقولى الوضع ايه
المسافه من دمياط لجمصه كام كيلو
السلام عليكم و رحمة الله و بركاته
الوصلة من جمصة الى الاسكندرية, أكتر من راااااااااااااااائعة و ممتازة, بس بالنهار فقط, لا أنصحك بالليل اطلاقا, أنا كنت سافرت فى شهر 3 اللى فات و رحت و رجعت على أذان المغرب و كانت 100 100 .
و طبعا, ده مشوار محترم و طويل, فلازم جدا تشيك على عربيتك كويس أوى و على الاستبن و كل حاجة, قبل ماتمشى.
بالسلامة ان شاء الله و ربنا يسلملك طريقك.
شكرا ليك يعنى انت سمعت عنها خبر وحش بلليل ان فيه قلق او كده
انا ليه واحد صحبي والده و اخته و والدته كانوا مسافرين عليه بالليل من مده و اتضرب علي عربيتهم نار لولا ان والد صاحبي ده كان عميد متقاعد و معاه سلاح كان زمانهم في خبر كان دلوقتي
بلاش السفر عليه بالليل خليه الصبح احسن
بلاش السفر علية بالليل .. الطريق كويس و الوصلة من بعد بلطيم لجمصة زي الصحراوي كدا
بالراحة على الكوبري بتاع رشيد اللي قبل الكمين
بص ياباشا نصيحه خليك زراعي احسن وانت من بروفايلك من دمنهور يعني زراعي حلو بالنسبه ليك
لو عايز دولي بقا ممكن تمشي دولي لغايه المنصوره كدا وتنزل تاخد الطريق الزراعي العادي من المنصوره لغايه دمياط امان وطريق زي الفل ونصيحه بلاش دولي من جمصه لدمياط لانه فيه كذا كوبري كدا لو اخدتهم بسرعتك هاتتبهدل انت والعربيه فانصيحه اخويه خليك زراعي من الاول امان وزي الفل ياما زي مقوتلك دولي لغايه المنصوره وانزل اركب الزراعي لغايه دمياط مسافه مش كبيره يعني من المنصوره لدمياط حوالي 65 كيلو
السلام عليكم
بص يا سيدى
أنا كنت لسه مسافر عليه من اسبوع فات
سافرت من دمياط لإسكندرية والعكس رايح جاى
الطريق حلو جدا
مكنش فيه رادار
خلى بالك من الكوبرى بتاع رشيد عشان زى ما الناس اللى قبلى قالت مكسر حبتين
متخفش على العربية مفيش مطبات وحشة إلا لو كنت ناوى تكلم على دمياط الجديدة ... الوصلة دى هيا اللى كباريها زفت (هيا دى طريقى للأسف)
الطريق حوالى 220 كيلو بالتمام والكمال
توكل على الله
طريق السلامة إن شاء الله
ربنا يستر وشكرا على النصيحهاقتباس:
المشاركة الأصلية كتبت بواسطة mohamed_mohsen
عرفه الكوبرى ده مشيت عليه من زمان بس كان سليم لسه وشكرا ليكاقتباس:
المشاركة الأصلية كتبت بواسطة osama.m
معلشى ياباشا هى منصوره موجوده على الطريق الدولى الساحلىاقتباس:
المشاركة الأصلية كتبت بواسطة modo88
انا اعرف انه عليه رشيد دمياط بورسعيد لكن المنصوره لا
والف شكر على النصيحه
الله يخليك ياباشا وربنا يسهل انا غالبا كده حلخد الدولى بالنهار وانا رايح ولو رجعت بلليل حارجع زراعى ان شاء الله لانه أمناقتباس:
المشاركة الأصلية كتبت بواسطة mido_gen
الطريق الدولى الساحلى هو اقل خطرا من اى طريق اخر بالنسبه لظروف البلد اليومين دول بس ملحوظه بسيطه لا تقف لاحد وخلاص وبعدين الطريق ماشى فى كل الاوقات عادى جدا وتروح وترجع بالسلامه ان شاء الله
الله يسلمك يااستاذ tjp
بس ياجماعه محدش قالى هى المسافه من دمياط لجمصه كام كيلو
بص ياأستاذ مصطفى .
عشان انت محترم ولك تواجد ملحوظ فى المنتدى ومش بتبخل بالرد . اسمع كلام كل اللى نصحوك وابعد عن السفر بالليل .
وارجع بالليل من دمياط لطنطا لدمنهور . طريق منور وزى الفل بالليل مع شوية مطبات زى اى طريق فى مصر .
بالنسبة للمسافة من جمصة لدمياط مش كتير يعنى فى حدود 35 كيلو تقريبا تلت ساعة وانت ماشى لدمياط نفسها .
وربنا يحفظ وترجع بالسلامة .
الله يخليك يا abo_mahmud وشكرا على ذوقك وكلامك الطيباقتباس:
المشاركة الأصلية كتبت بواسطة abo_mahmud
انا ان شاء الله ناوى اعمل كده فعلا وخصوصا انى مسافر علشان اعمل عملية ليزك فى عينى وطبعا مش حابقى شايف كويس بعد العمليه على طول وبيبقى فيه زغلله لدرجة انى ححاول اشوف حد ييجى معايا علشان يسوق العربيه وانا راجع ان شاء الله لانى المشوار صعب ولما سالت الدكتور اذا كان ممكن ارجع سايق بعد العمليه قالى لا طبعا
بس كده طريق الرجوع حيبقى دمياط المنصوره طنطا ومنها لدمنهور
الترتيب ده صح ولا فيه حاجه تانيه علشان واحنا راجعيين مانتهشى بس
تروح وتعمل العملية وتيجى بالسلامة يا رب ..
بس يا ريت بلاش بليل متأخر وبلاش الفجر، لأنى كنت فى الحوار ده قريب وسمعت كلام مش كويس.
ان شاء الله خير بس لازم تاخد حد معاك عشان بعد العملية و بالليل هتبقى الرؤية عندك مش واضحة فا حاول تأكد على حد يروح معاك
صحيح .. التوقيع كدا اشد .. danbo احسن من الصول التاني دا
ياباشا انت مفهمتش اصدي انا كنت اقصد بعد ما نصحتك بالزراعي انك في حاله لو مصر علي الدولي انك تمشي لغايه جمصه وفيه طريق تنزله مسافه تلت ساعه بس لغايه المنصوره وتكمل زراعي عادي لان وصلة جمصه دمياط من علي الدولي مش حلوه اوي وفيها 3 كباري وفواصل الكباري مش حلوه بس دا المقصود
وبالنسبه للرجوع ان شاء الله لو زراعي هاتطلع من دمياط عادي مرورا بكفر سعد وبعدين شربين وبعدين المنصوره والمحله وطنطا وفي حاجه احب انبهك ليها بعد المحله هاتفضل ماشي في طريقك عادي وهتلاقي زي كمين كدا ادخل اول يمين من قدام الكمين لان بتلغبط الدخله دي والدخله دي اللي هاتدخلك طنطا ان شاء الله وتكمل طوالي لغايه كفر الزيات وبعد كدا تدخل دمنهور وتوصل بالف سلامه
وعموما لو احتاجت اي حاجه ياريت تتفضل تقول انا هابقاجنبك في المنصوره وعنيا ليك يعني
الله يخليك يازيزو وشكرا ليكاقتباس:
المشاركة الأصلية كتبت بواسطة egyzizo
انا فعلا قلقت من موضوع الليل ده وربنا يستر
ان اشاء الله مش حرجع عليه بلليل
هههههههههاقتباس:
المشاركة الأصلية كتبت بواسطة osama.m
انا لاقيت الناس تعبت من صورة الراجل قولت اشيلها وخلاص مفيش داعى ازهق الاعضاء
انا فعلا ناوى اخد حد معايا ولو مالقيتش حد احتمال اخد اختى بس هى لسه بقلق منها فى السواقه خصوصا ان الطريق متعب وطويل وهيبقى صعب عليها
يعنى لو قفلت خالص ححاول اروح فى القطر او المواصلات لان السواقه بعد العمليه حتبقى فيها خطوره فعلا
او ابيت هناك يومين ولاحاجه لغاية لما ابقى كويس ان شاء الله
الله يخليك ياباشااقتباس:
المشاركة الأصلية كتبت بواسطة modo88
كده وضحت فعلا وبرده معلومه جديده عليا انا مكنتش متخيل ان المنصوره قريبه جدا من الدولى بالشكل ده
اصل السكه دية ممشيتش فيها نهائى ابدا وجديده عليا
مره بس من حوالى 10 سنين او اقل مش فاكر يعنى سافرت من اسكندريه لغاية راس البر وكان الطريق ده لسه مفتوح جديد وكان فاضى جدا ومقطوع و فعلا يخوف ومش عارف طبعا نظامه ايه دلوقتى
عموما ياجماعه انا محتاج دعواتكم جميعا ان ربنا يكمل المضوع ده على خير والعمليه تنجح والف شكر لكل الاعضاء اللى دخلوا وقالوا نصيحه فى الموضوع ده وحتى اللى ماقالوش
وامانه بجد دعواتكم ليا لانى محتاجها فعلا وربنا يسترها معانا جميعا