استفسار عن اي عطل في سيارة فيات لغاية موديل 2012
الموضوع ده هيكون مخصص لأي استفسار عن اي مشكلة فنية في اي نوع سيارة فيات حديثة والمقصود بالحديثة هي التي تحتوي علي كونترول خاص بالفتيس والماتور والكهرباء اغلب مشاكل هذه السيارات هي مشاكل كهربية وعايز اعملها بنفسي ومبحبش حد يشتغلي فالعربية .
المشكلة هتبقا عبارة عن الاتي:
1- شغلت حاجة معينة ولقيتها فاصلة مش عايزة تشتغل او شغلتها وحصل فيها شورت والفيوز ضرب ومش عارف مكانه.
2- عايز اعرف مكان فلتر البنزين او فلتر الهواء او فلتر التكييف فين.
3- حاجة حصل فيها شورت ومش عارف الدايرة بتاعته ماشية ازاي منين لفين وعايز اعرف.
4- حساس باظ ودخلت علي كمبيوتر تشخيص الاعطال وطلعلي الحساس الفلاني هو اللي بايظ وانا معرفش مكانه عشان اغيره.
5- مش عارف اغير سير الكاتينة علي كام الف كيلو وايضا سير الدينامو او التكييف او سير المجموعة في بعض السيارات.
6- عايز اعرف مواصفات العربية بتاعتي ومش لاقيها علي النت.
7- مش عارف الاطارات بتتظبط علي كام ضغط .
8- عايز اغير المقاس المناسب للجنط والاطار وخايف ابوظ حاجة فالعفشة.
9- عايز اعرف التكييف بيتشحن كام جرام فريون او زيت وايه نوعهم عشان مبوظش الكباس بتاع العربية.
10- العربية مخنوقة وكل حاجة فيها علي ما يرام وعايز اعرف ضغط طرمبة البنزين مفروض يكون كام عشان اعرف اغيرها ولا .
11- عايز اعرف اقيس الحساس ازاي واعرف ازاي انو بايظ ولا شغال.
12- العربية مبرجلة معايا وعايز اعرف الموبينة بايظة ولا لأ واقيسها ازاي .
13- عايز اعرف ايه نوع البوجيه المعتمد من شركة فيات.
14- عايز اعرف قطعة الغيار الاصلية بتكون ماركتها ايه.
او ما شابه هذه المشاكل.
كل اللي عليك انك تعمله انك تكتبلي موديل العربية وسنة الصنع وكام سي سي والمشكلة اللي بتواجهك من المشاكل التي تم ذكرها وانا ان شاء الله هقولك علي الحل بصور توضيحية لحل المشكلة في خلال 24 ساعة وبعد تصليح المشكلة كل اللي انا عاوزه منك انك تدعيلي انا ووالداي بالرحمة والمغفرة وتبلغني بالنتيجة اذا تم حلها او لا.
