الموضوع: أصحاب الخبرة فى مشاريع تربية الأرانب/المناحل يفيدنا أفادكم الله

متابع

السلام عليكم
فيه مشروعه شفته علي الطبيعه وهو مشروع مزرعه فراخ وتكون التربيه علشان بيع البيض
لو حد عنده فكره عن المشروع يتفضل يتكلم عنه وان هتكلم عنه في مداخله تانيه

بص ياسيدى وصلى على الرسول الكريم
المشروع ده اسمه مشروع فراخ بياضى
بتشترى الفرخ وهو عمره 100 يوم وتمنه بيبقى فى حدود 26 جنيه
بيقعد ياكل شهر او اتنين بالكتير على ما يبدأ يبيض
دورة المشروع سنه
الفرخه بتاكل 110 جرام عليقه فى اليوم والمتر المربع بياخد 10 فرخات ودى حسابها مهمه جدا جدا عشان تقدر تحسب تكلفة الاكل والايجار لان الايجار بالراس يعنى مثلا الفرخه ايجارها نص جنيه فى الشهر
طن العليقه بيعمل حوالى 2500 جنيه واقسم بقى على عدد الفراخ كل فرخه 110 جرام هاتقدر تعرف احتياجك من العلف شهريا
حط 300 ل 500 بالكتير قوى ادوية وعنايه طبيه
اما مرتب اللى قاعد ومتابع اللى هو العامل او اتنين عمال فده بيرجعلك
متوسط البيض اللى بتنتجه الفرخه 24 بيضه فى الشهر مش 30 وانا بقول (متوسط) عشان فى فراخ بييجى عليها يوم ماتبيضش وفى كمان بيض معيوب ولازم تحسبها كده عشان حساباتك ماتبقاش بالخساره ساعة تقفيل الشهر وتبقى عامل حسابك على حاجه وتلاقيها اقل فتبقى بالزياده احسن ما تبقى بالنقصان
البيض طبعا مش محتاج تسويق لانه منتج اساسى وداخل فى كتير من الصناعات الغذائيه والتجار هاييجوا ياخدوه من المزرعه ولو ان توزيع البيض اصلا مشروع لوحده ولو اجرتلك عربيه ولا توكتوك هاتحقق مكسب منفصل عن المزرعه حتى وان كان قليل نسبيا
البيض بيتم تسعيره عن طريق بورصة البيض يعنى قبل ما تبيع تصحى الصبح وتتصل بيهم او تدخل على النت وتتابع عشان تعرف سعر البيع النهارده
المشروع مربح جدا بشرط ثبات الاسعار فى السوق وانا اقصد اسعار العليقه والدوا وغيره من مستلزمات الانتاج وكمان بتظهر ربحيته لما عدد الفراخ يبقى كبير
وفى اخر الدوره بتبيع الفراخ وبتكون كبرت طبعا عن يوم شراها بس مش كتير لان شرط الفراخ البياضى انها ما تسمنش والا هاتقطع بيض وسعر الفرخه ممكن يوصل ل 30 او 32 جنيه بس مش هاتلاقى مكسب لان فى نسبة فراخ نافقه وده طبيعى يعنى ممكن اخر الدوره تلاقى مات منك 200 ل 300 فرخه من اصل 1000 فرخه فده بيعوض ده ومش بتحس بيه لو كانت الامور مظبوطه والاسعار ثابته
انا كنت سامع ان الحكومه بتاخد 50 جنيه على كل متر مربع يعنى على كل 10 فرخات يعنى لو عندك الف ولا الفين فرخه هاتلاقى نفسك دافع مبلغ ياثر معاك فى الربح دون اى مبرر وعشان كده تلاقى معظم المزارع بدون تراخيص وكله شغال فى الدرا
اتمنى اكون افدتك
وللعلم مشروع فراخ التسمين البيضا مربح اكتر بكتيييييييييير قوى ودورته 45 يوم فقط
لكن يعبه خطورته لان فى يوم كيلو الفراخ بيعمل 18 جنيه ويوم 13 جنيه والجنيه بس فرق ممكن يخسرك السقط واللضا فما بالك بقى ب 5 جنيه خساره احيانا

صلى الله على سيدنا محمد
شكرا للأخ الكريم وأرجو مواصلة المشاركات النافعة وهل سيادتك عندك فكرة عن تربية الأرانب

الف شكر لردك يا موودي ...انت كبرتها في دماغي

صلى الله على سيدنا محمد
شكرا للأخ الكريم وأرجو مواصلة المشاركات النافعة وهل سيادتك عندك فكرة عن تربية الأرانب

اللهم صلى عليك يا نبى
والله ماعنديش فكره عن الارانب بس اللى اعرفه انها مربحه وفى وقت قليل الا انها يعيبها النظره
يعنى يعنى تبص تلاقيهم فرفروا كلهم فى وقت واحد ومن غير سبب
ما ينفعش معاهم دكتور ولا واحد خبره دول عاوزين شيخ مقيم ما بيعملش حاجه غير انه يقرا المعوذتين كل شويه عشان ما يتنظروش :)

الف شكر لردك يا موودي ...انت كبرتها في دماغي

لو حسبتها بالفلوس ريقك ها يجرى بس الواقع ليه حسابات تانيه واللى بيعمل حاجه عن تجربه او خبره بتبقى توقعاته اقرب وخسايره اقل
جرب بحاجه بسيطه انت واتنين من اصحابك
لو كسبت هايبقى مكسب قليل صحيح بس اديك اتعلمت وده اكبر مكسب والفلوس تيجى ورا
خسرت يبقى خسارتك قليله لان معاك ناس مشاركه والخساره متوزعه ومش هاتزعل كتير