سماع صوت صفارة عند مكان السيور عند التدوير صباحا و يختفي بعد ما العربية تسخن

السلام عليكم ... عربيتي اوبل كورسا 2005 .. العربية من اول الاسبوع وكل يوم الصبح ادور العربية الاقي شوية صوت صفارة غريبة وبفتح الكبوت بسمع الصوت حولين منطقة السيور مع العلم اني مغير سير الكتينة قبل 20 الف كيلو يعني لسه ... ازود بنزين تقوم الصفارة تختفي وبعدين ترجع تاني لحد ما العربية تسخن وتختفي ... النهارده عملت نفس القصة بس مشيت بالعربية شوية وكنت مستني شخص فقمت قفلت الكونتاكت وبعدين دورتها طبعا هيا كانت سخنه ومشيت لقيتها بتصفر وقفت على جنب وقعدت ازود شوية كده لحد ما اختفت تاني ........ ياريت حد يفسري ايه الي بيحصل علشان اعالجه قبل ما القصة تتدهور ... ارجو الرد السريع من فضلكم لمن لديه الخبرة ..

انتو فين يا رجالة ... ؟؟؟

السير المشرشر بتاع الدينامو
1. خد قرصه للدينامو عند الكهربائى
2. غير السير
و لو عايز الصوت يروح على طول اول ما تدور
ادلق شوية مية و السير بيلف

فعلا هو سير الديناموعاوز يتربط شوية عند اي ميكانيكي لو انت لسه مغيروا
ولو انت مغيرتوش قبل كدا هات واحد جديد واربطوا كويس وان شاء الله الصوت هيختفي

متشكر جدا يا طناني باشا واسف على ازعاجك امبارح بتليفوني .. رحت لولاد ... التييت ... بتوع مقار بقوله عملت ايه قالي غيرت السير والشدادة .. قلتله لو سمحت فكهم علشان سعرهم غالي جدا ... قالي لا .. قولتله في المدير .. روحتله قالي حضرتك مضيت .. قلتله مضيت على التصليح والمفروض انك قبل ما تركب تقولي التكلفة كاام وده في التوكيلات المحترمة (زي اتوماستر) .. علشان مطلوش عليك ... فكهم ومخدش غير المصنعية والمهندس الي هناك اسمه هاني زفت كان مولع نااار .. خد مصنعيته ابن ... 90 جنيه ... دفعتهم بس عذبوني عقبال ما تطلعوا العربية .. بجد نااااس زبالة .. روحت على سرور جبت السير 90 جنيه الماني والشداداة تركي بـ 75 جنيه خرجت من عنده بضحك على نفسي وركبتهم والحمد لله الصوت راح والعمليه تمام ... بس اليومين دول شكلها فيها اسطوانه مش عارف اعمل ايه سالت على عند سرور 900 جنيه لطقم الدبرياج .. مش عارف اعمل الحكاية دي فين اصل بخاف حد يبوظ العربية وخصوصا تغير الاسطوانة والدسك ... ارجو النصيحة

زى ما قلتلك
روح شوط فيهم
عالم تخاف و متختششيش
عايزين 900 جنيه ليه
امال لو باعمل عمرة هادفع كام
مليون جنيه

معلش ياريس ... بقولك العربية كده شكلها مقبلة على طقم دبرياج ... ياترى ايه الانواع الكويسة .. (انا سالت عند سرور قالي 900 جنيه بس نسيت اقوله نوعه ايه ) وهل اعمل الكلام ده عند ميكانيكي ولا لازم توكيل ... ارجو الافادة

عند ميكانيكى عادى
ده طقم دبرياج
الأفضل اللوك و الساكس
اى نوع تانى خاصة الفاليو ابعد عنه

حضرتك انا بتعامل مع مقار من زمان ومش بيغيرو حاجة الا لما يسألوني بالتيليفون الاول
وعلى فكرة انا على طول بغير السيور عندهم والحاجة مش غالية قوي كدة
يعني غيرت سير الكاتينة والبلية. السير ب 90 جنيه والمصنعية 80 جنيه
ولو حاجة سعرها معقول وعارفين ان سعرها زي برة ممكن يغيروها من نفسهم
بس المهم ان المهندس اللي انت بتتعامل معاه بيبقى حافظك وعارف عقليتك وانت كمان عارفه كويس
احسن واحد هناك حاليا هو عماد خطاب
كان فيه مهندس هناك اسمه كمال بس سافر قطر. ده ربنا يمسيه بالخير كان استااااااااااااذ وعنده ضمير فوق الوصف
انما وجيه وهاني وتامر وعبد الفتاح ارمي في الزبالة

والله ده الي حصل ... هو انا طبعا اول مرة .. والي قابلني هاني ... بس كون يقولي ان الشداداة والسير دينامو بـ 900 جنيه ده تخلف وللاسف الي يثبت كلامي .. المهندس مصطفى المدير بتاعهم رحتله وماعترضش على السعر المبالغ فيه بالعكس بيتكلم على اني مضيت على التصليح على الرغم ان قولت لهاني انه قبل كا يركب يقولي التكلفة علشان اعمل حسابي ... عموما ربنا ستر وصعبان عليا بصراحة 80 جنيه المصنعيه وعذبوني 3 ساعات عقبال ما طلعوا العربية ... حار ونار في جتتهم..

فداك
مش احسن ما تدفع 900 جنيه

الحمد لله غيرت الاسطوانة والديسك امبارح الخميس .. بعد عنااء مع السحب البطئ ... واليكم الاسعار للافادة ... رحت عند سرور وجبت طقم دبرياج الماني (ساكس) بـ 900 جنيه اسطوانة وديسك ولما سالت على البليه الماستر لقيتها لوحدها بـ 900 جنيه ( مش عارف رقم 900 جنيه ده ماسك قوي في الموضوع ده ..هههه) المهم وجبت قاعدة فتيس شمال كانت عندي مشروخة الجلدة بتاعتها بـ 250 جنيه ( صناعة اتحاد اروبي ؟؟) وكمان جبت القاعدة الامامية بتاعته كانت الجلدة مقطوعة وسايبة خالص بـ 180 جنيه ( صناعة اتحاد اروبي ؟؟) .. المهم وغيرتهم كلهم والعميلة الحمد لله .. صحيح في مفاجاة الاسطوانة والديسك الي متركبين بتوعها الاصلين وماشية 103 كيلو ... بس سؤال الدبرياج خفيف قوووي .. ولازم ادووس للاخر ولو شيلت رجلي سنة خفيفة قوي بلاقي العربية بتتحرك عالطول ... حتى لدرجة بطلت مني اول مركبتها علشان واخد على تقل الدبرياج .. هل ده صح مع العلم ان الميكانيكي قالي انا لا واطيت الدبرياج ولا عاليته سيبته على ضبتطته .. هل ده طبيعي ولا في حاجه كده؟؟؟

طبيعى الدبرياج يبقى خفيف قوى
و فصله واطى
لأن ده الطبيعى
و اساساً هو ملوش ظبط
هيبتدى يعلى لوحده
عندك على باكم

معلشى
الف مبروك
عملته عند مين و كلفك كام

عملته عند واحد ميكانيكي عندي كويس .. اصلي ساكن في القناطر الخيرية ... ركب الديسك والاسطوانة وكشفنا على البليه لقينها سليمة وركب قواعد الفتيس .. قعدنا بتاع 5 ساعات ... وخد 150 جنيه ... ربنا يسترها حتى كان فيه الكوعة بتاعت التبريد للدورة المياه الي داخله للتكيييف عند صدر العربية كده كانت بتنقط نتيجة كسر فيها .. رحت سالت عند سرور مالقتهاش في وسط البلد بس لقيتها عند سرور الي في جسر السويس .. برازيلي بـ 280 جنيه ... هو انا صرفت كتير بس مابحبش اركب حاجة في العربية اي كلام علشان ربنا يسترها معايا وتفضل حالة العربية كويسة

ربنا يسترها علينا و عليك