سؤال هام عن الفيات جزاكم الله خيراً

**المواطن مصرى** · 08-06-2007 06:15 AM

الساده خبراء السيارات فى قسم الفيات

انا افكر فى شراء سيارة فيات مستعملة تعيننى على المشاوير و الذهاب و العوده من الشغل (ساكن فى فيصل و شغلى فى مدينه نصر) و معى مبلغ حوالى 30 الف جنيه

نصحنى بعض الأصدقاء بشراء سياره 128 لكننى و بعد دراسه و سؤال وجدت ان اعطالها كثيره نوعاً ما و امكانياتها محدودة و أنا خبرتى فى السيارات صفر و الحمد لله (يادوب اعرف اسوق و بالعافية !) فبالتالى استبعدتها و تبقى امامى موديلين من الفيات : ريجاتا و 131

فبرجاء الإفاده : أيهما أشترى ؟!

و ما هو احسن موديل فى الفيات 131 : الالمانى ام الايطالى ام الميرافيورى ام السوبر ميرافيورى ام اللى مش مكتوب عليه حاجه ؟!

و ما الفارق بين الفيات 131 : 1300 – 1400 – 1600 ؟!

و ما معدل استهلاكها للبنزين خصوصاً و انى من طبقة الموظفين محدودى الدخل ؟!

و هل قطع غيارها رخيصة زى الـ 128 و اللادا ؟!

و هل لها أعطال او مشاكل شهيره يمكن تلافيها ؟!

و هل ممكن اجد سيارة 131 فيها باور و تكييف ؟!
و هل ممكن ان اركب لها باور و تكييف لو لم يوجد فيها ؟!

و بالمثل الريجاتا : ما هو احسن موديل لها هل الـ 85S أم الـ 100

و ما الفارق بين الريجاتا و النوفا ريجاتا ؟!

و اسمع ان الريجاتا فيها باور و تكييف و امكانيات عاليه فهل هذا صحيح ؟!

و اهم سؤال عندى : قرأت كثيراً فى الوسيط و الاهرام عن السعر التقريبى للـ 131 او الريجاتا المعروضين للبيع فوجدتهم فى حدود 30 الف جنيه فهل هذا السعر ممكن يزيد كمان شهر او اثنين بصفتكم من متابعى سوق السيارات ؟!

أنا عارف ان اسئلتى كثيرة و ممكن تكون غبية نوعاً ما بالنسبه للخبراء فى السيارات لكن بالنسبه لواحد مبتدىء زييى هذه الأسئلة تشكل أهمية قصوى

فى انتظار الرد و شكراً مقدماً ...

**hazem_khidr** · 08-06-2007 02:08 PM

و ما هو احسن موديل فى الفيات 131 : الالمانى ام الايطالى ام الميرافيورى ام السوبر ميرافيورى ام اللى مش مكتوب عليه حاجه ؟!

و ما الفارق بين الفيات 131 : 1300 – 1400 – 1600 ؟

الالماني و الايطالي هو اللي كان ميرافيوري و سوبر ميرافيوري و الفرق بينهم ان الميرافيوري كانت كامه واحده بس و موديلات قديمه من 1975 الي 1977 بعد كده بقي فيه سوبر ميرافيوري اتنين كامه و ميرافيوري cl و دي كانت كامه واحده و الفروقات بخلاف الموتور بسيطه و اللي مش مكتوب عليها حاجه خالص و تلاقي الفانوي الخلفي علي ششكل حرف T و فانوسها الامامي مربع و صغير ف دي تركي و ما تتركبش الصراحه.
الفرق بين المواتير دي انها ال1300 بتستهلك اقل في البنزين من ال 1400 و اقل من ال1600 و للعلم ال1600 فيها منها كامه و اتنين كامه لكن ال 1300 و ال1400 مش متاكد اذا كان في منها اتنين كامه و لا لاء و عموما ال 1300 و ال 1400 موفره للبنزين اوي (بس انا بفضل ال 1600 استهلاك اعلي شويه بس عزمها حلو و قويه).

و هل قطع غيارها رخيصة زى الـ 128 و اللادا ؟!

و هل لها أعطال او مشاكل شهيره يمكن تلافيها ؟!

و هل ممكن اجد سيارة 131 فيها باور و تكييف ؟!
و هل ممكن ان اركب لها باور و تكييف لو لم يوجد فيها ؟

قطع غيارها رخيصه جدا و يمكن ارخص من ال128 كمان و اللادا طبعا.
مافيهاش مشاكل جامده او اعطال شهيره بس محتاجه عنايه بالعفشه تربيط و تشحيم و الصيانات العاديه اللي تتعمل لاي عربيه.
بس طبعا لازم تكون عربيه نضيفه مش اي 131 و السلام يعني اهم حاجه تكون مش راشه دواخل (العربيه اللي راشه دواخل مالهاش امان)و ممكن يتركب ليها باور و تكييف بس م حيبقي مضبوط الاحسن لو حتجيب تجبت عربيه فيها الكلام دا و العربيات دي قليله اوي في مصر علي فكره .

و بالمثل الريجاتا : ما هو احسن موديل لها هل الـ 85S أم الـ 100

و ما الفارق بين الريجاتا و النوفا ريجاتا ؟!

و اسمع ان الريجاتا فيها باور و تكييف و امكانيات عاليه فهل هذا صحيح

موديلات الريجاتا كلها حلوه بس ال 85 S طبعا اقول و فيها جميع الكماليات(باور سنتر زجاج كهربا و تكييف و شاشه تعطال ) و ال 100 ما اتصنعتش في مصر و موتورها 1600 2 كامه و دي حتلاقيها لو موجوده حتبقي ايطالي بس و موديل كويس طبعا و اعتقد هو نفس موتور ال 1600 بتاع ال 132 يعني صيانته سهله.
و الريجاتا فعلا ال S فيها تكييف و باور.
.

و اهم سؤال عندى : قرأت كثيراً فى الوسيط و الاهرام عن السعر التقريبى للـ 131 او الريجاتا المعروضين للبيع فوجدتهم فى حدود 30 الف جنيه فهل هذا السعر ممكن يزيد كمان شهر او اثنين بصفتكم من متابعى سوق السيارات ؟!

دي حاجه في علم الغيب ممكن في اي لحظه الجمارك تتغير او يحصل اي تعديل في السوق محدش يقدر يفسره بس هيا ممكن تزيد شويه علشان دخول الصيف و الاجازات و كده ف الاحسن تشتري دلوقتي

**sab3aawy** · 09-06-2007 06:41 PM

شوف يا أخى المواطن

انا كنت فى نفس حالتك بدور على عربية لزوجتى بدلا من السيات 133 التى تقدمت بطلب للإحالة للمعاش، وكنت برضه زيك بدور على ال128 اللى ليها معايا ذكريات عزيزة جدا

ولقيت بالصدفة عربية ريجاتا اغلى شوية من الميزانية اللى كنت حاططها، بيبيعها زبون بيتعامل مع نفس الميكانيكى بتاعى وكان عارضها عند المبكانيكى، قاللى بس اتفرج عليها وسوقها

ركبتها، بصراحة هى تحفة بالمقارنة بال128 ، صالون واسع جدا، تابلوه انيق، محركها 85 حصان اشد بكتير من ال128(55 حصان) واشد برضه من ال131 (71 حصان)، وسحبها زى الطلقة الى جانب ثبات ممتاز على الأرض وتحكم ممتاز، بصراحة عجبتنى جدا واستلفت انا وزوجتى علشا نكمل وناخدها،
انا انصحك بيها، بشرط انك تلاقى واحدة سليمة لانك هتاخد منها الآتى:

1- صالون واسع جدا
2-شنطة واسعة جدا اكبر من ال131 والشاهين
3-انيقة جدا من الداخل
4-موتور قوى جدا وسحب ممتاز الى جانب ان الموتور مالوش صوت
5-تصل الى 140 كيلومتر فى الساعة ودى لو ضربت ال131 على قلبها مش هتجيبهم
6-ثابتة جدا على الأرض بالمقارنة بال131
7-الفتيس 5 نقلات فى حين ان ال131 اربع نقلات فقط (ما عدا ال 131 ال1600 هى اللى خمس نقلات بس دى مش منتشرة)
8-ممكن تجيبها مكيفة، انا اشتريتها مكيفة والتكييف كان عطلان بس صلحته ومتكلفش كتير

بس اهم حاجة الحاااااااااااااااااااااا لة، لازم تكون السيارة سليمة، حوض وقوائم سليمة بدون حوادث ولا بارومة، وتكون الحالة الميكانيكية معقولة

لو محتاج ايه معلومات اخرى عن الريجاتا انا تحت امرك

**المواطن مصرى** · 10-06-2007 01:07 AM

الأستاذ حازم خضر

كل الشكر على اهتمامك و ردك و ان كان رد الأستاذ سبعاوى قربنى اكثر من الريجاتا و احب اسمع رأيك فى الريجاتا لو أمكن

مع خالص شكرى و تقديرى

**المواطن مصرى** · 10-06-2007 01:13 AM

الأستاذ سبعاوى

لا أعرف كيف أشكرك على الرد الجميل و النصيحة الصادقة منكم
ردك قربنى اكثر لفكرة شراء الريجاتا بدلا من 131 و بعد اذن حضرتك لى بعض الإستفسارات عنها

1- ما الفارق بين الموديليين : 85S و 100

2- ما هو احسن موديل فى سنه اقدر اجيبه (مثلا فى البيجو يقال ان موديل 1979 هو احسن موديل)

3- هل قطع غيارها متوفره بسهوله و هل اسعارها معقوله ام غاليه (بالنسبة لانسان وضعه المادى ضعيف)

4- ما معدل استهلاكها للبنزين ؟! بما انك تمتلك واحده كما قلت بتعمل فى المتوسط كم كيلو فى الصفيحه 20 لتر ؟

5- هل يوجد منها موديل فيه باور و تكييف (انا عندى عقده نفسيه من الباور و التكييف لانى تعلمت السواقه على عربيه لادا ) و ان لم يوجد فيها هل ممكن تركيبهم و كم يتكلف ذلك ؟!

6- ما هى الحاجات اللى لازم اتأكد منها عند شراء سياره ريجاتا بصفة خاصة ؟

عارف انى هاتعبك معايا لكن الحمد لله واضح ان حضرتك انسان عندك علم و تحب تعطيه لغيرك فجازاك الله عنا خيراًَ

و أخيراً: شكراًَ مقدماً

**hazem_khidr** · 10-06-2007 07:24 AM

الأستاذ حازم خضر

كل الشكر على اهتمامك و ردك و ان كان رد الأستاذ سبعاوى قربنى اكثر من الريجاتا و احب اسمع رأيك فى الريجاتا لو أمكن

مع خالص شكرى و تقديرى

ا شكر علي واجب بصراحه الباشمهندس سبعاوي بيجيب من الاخر الريجاتا طبعا مافيش كلمه عليها انها عربيه تمام بس زي ما قالك كده عربيه نضيييييييييييييفه يعني لو بتتفرج علي واحده خد سمكري معاك يكشف علي الحوض و القوايم و تلاح فروقات الابواب مضبوطه ول لاء فروقات الشنطه قفله البرابيز مع السقف مخدمين علي بعض ولا لاء؟؟؟يا تري وش العربيه و فوانيسها مضبوطه ولا معوجه و الشبكه مش علي بعضها؟؟ دا يعتبر اهم حاجه في العربيه ان يبقي شكلها كده مريح للعين مش تحس انها متركبه علي الايد و خلي بالك و انت بتشتري من الحاجات دي اهم حاجه و لا قدر الله لو الموتور او الفتيس فيهم مشاكل مش مشكله ممكن تتحل بس اساسيات العربيه دي اللي ملهاشش حل ابدا.
و الفارق بين ال 85 اس و ال 100 انا كاتبه فوق و معظم الاسئله اللي طالبها من الباشمهندس سبعاوي.

**sab3aawy** · 10-06-2007 01:08 PM

- ما الفارق بين الموديليين : 85S و 100

الفرق بين الموديل 85 والموديل 100 كما هو واضح فى الإسم هو القدرة الحصانية
ال85 قدرتها 85 حصان، وال موديل 100 قدرته 100 حصان،
ال85 محركها احادى الكامة ذو كامة علوية 1500 سى سى (هو نفس موتور ال128 والشاهين بعد 1997 والتيمبرا واللنشيا ديدرا)، وال100 فيها محرك ثنائى الكامة ذو 2 كامة علوية 1600 سى سى، (هو نفس محرك ال132 ال1600) والمحركين قطع غيارهم موجودة وبالهبل وإن كان محرك ال85 قطع غياره اكثر
ال85 تقفيل محلى وال 100 مستوردة ومش هتلاقى منها كتير
ال85 استهلاكها فى البنزين احسن لكن ال 100 متورها اقوى طبعا(علما بأنى معايا ال 85 وسحبها زى الطلقة)

2- ما هو احسن موديل فى سنه اقدر اجيبه (مثلا فى البيجو يقال ان موديل 1979 هو احسن موديل)

موديل 90 هو افضل موديلات الريجاتا بس ده هتلاقيه غالى (ممكن يوصل 35 لو العربية نظيفة)، لو لقيت واحدة بسعر حنين بيقى رائع، ملقيتش دور على موديل اقل، انا اللى معايا موديل 85 ومع ذلك انا مبسوط منها جدا

- هل قطع غيارها متوفره بسهوله و هل اسعارها معقوله ام غاليه (بالنسبة لانسان وضعه المادى ضعيف)

قطع غيارها اكثر من الهم على القلب وبنفس اسعار ال128 ، يعنى مثلا انا جبتلها جوز مقصات ب120 بالكاوتش بتاعهم،مساعدين فيه من اول 300 جنيه للجوز،وش فانوس خلفى ب10 جنيه، علبة ديريكسون استيراد ب 250 جنيه، كابراتير كامل ويبر استيراد ب 450 جنيه، سألت على تابلوه كامل استيراد كان ب600 جنيه، وسألت على عمرة كاملة للمحرك من باب العلم بالشئ ، تاجر قطع الغيار قاللى تتكلف من 1800 الى 2000
برضة ميزة رهيبة لها عن ال131 ان الفتيس بتاعها كامل بالكورونا ارخص من كورونا ال131 لوحدها، فتيس الريجاتا اقل من 1000 جنيه استيراد، فى حين ان كورونا ال131 بتعمل 2000 جنيه، دا غير ان فتيس ال131 ممكن يخشله فى 1000 لوحده

4- ما معدل استهلاكها للبنزين ؟! بما انك تمتلك واحده كما قلت بتعمل فى المتوسط كم كيلو فى الصفيحه 20 لتر ؟

ممتازة فى البنزين، بتعمل جوة البلد اكتر من 200 فى الصفيحة وفى الطوالى حوالى 280، بس انا غيرتلها كاربراتير، حالة الكاربراتير مهمة جدا هنا

5- هل يوجد منها موديل فيه باور و تكييف (انا عندى عقده نفسيه من الباور و التكييف لانى تعلمت السواقه على عربيه لادا ) و ان لم يوجد فيها هل ممكن تركيبهم و كم يتكلف ذلك ؟!

اللى اعرفه ان مافيش منها بارو بس مش متأكد أوى، بس عموما حتى من غير بارو ديريكسيونها خفيف جدا، انا مش بحس بأى فرق وان سايقها عن لما بكون سايق النيسان مع ان النيسان باور، غير طبعا بتفرق شوية فى الركنة، لكن طبعا مالهاش علاقة خالص باللادا، لو انت متعود على اللادا هتسوق الريجاتا بصباع واحد

6- ما هى الحاجات اللى لازم اتأكد منها عند شراء سياره ريجاتا بصفة خاصة ؟

الباروووووووووووووووووووو مة، يكون مافيهاش بارومة فى الحوض او القوائم او الشنطة، وطبعا تكون سليمة مافيهاش حوادث، بعد كدة الحالة الميكانيكية العامة، الموتور وألات الجر زى اى عربية

عارف انى هاتعبك معايا لكن الحمد لله واضح ان حضرتك انسان عندك علم و تحب تعطيه لغيرك فجازاك الله عنا خيراًَ

و أخيراً: شكراًَ مقدماً

يا باشا تعبك راحة، بس ابقى افتكرنا بدعوة صالحة كدة لما ربنا يكرمك وتلاقى عربية ريجاتا كويسة

**hassn** · 24-12-2009 10:24 PM

ربنا يشفيك بنتك ويبارك لك فيها استاذ سبعاوى
جزاك الله كل خير
اخيك مهندس زراعى/حسن على

**amrbakly** · 25-12-2009 12:47 AM

و لية الغلب دة يا صديقي و تركب قديم تمانينات، ضخم و استهلاك بنزين أعلي و كل مشاكل القديم

متفكر في أونو و بتلاتين حتجيب حالة فوق الممتازة دلوقتي يعني مش حتبقي عاملة اكتر من 80 الف كيلو و ممكن فابريكة جوة و برة كمان، توفير علي كل المستويات بما فيها البنزين و الصيانة و أسعار قطع الغيار لأن أغلب قطع غيارها ما بين شاهين و 127 و أعطال أقل بكتير، دركسيون ناعم جدا، العربية مش كبيرة و مش صغيرة بس لو انت لوحدك أو عائلة صغيرة تنجز معاك أخر حاجة

بالنسبة للتكيف ممكن تركب لها تكييف و في منها متركب لة تكييف بس متتوقعش منة كتير قوي، يمكن دية الميزة الوحيدة اللي تتفوق فيها الريجاتا عنها بالأضافة طبعا لحجم الشنطة، بس صدقني اشتري عربية حالتها كويسة و تكون موديل قريب أحسن 100 مرة من عربية قديمة فيها كماليات و تقرفك قرف الدنيا كل شهر عند الميكانيكي

هو طبعا اي عربية مستعملة بتروح عند الميكانيكي كل شهرين تقريبا، بس في فرق لما تروح بنفسك متطوع زي ما أنا بعمل علشان تفضل حالتها كويسة و أحافظ علي العربية، أو إنك تروح مضطرا علشان عملت معاك حركة نقص

أنا أرشحلك الأونو بقوة.لأن مصاريف صيانتها لو شلت علي جنب 100 جنية كل شهر للصيانة شاملة قطع غيار و مصنعية حتبقي الدنيا معاك متغطية عن تجربة