الوضع القانوني للسيارات بمحركات الجاز او الغاز

**chihab18** · 08-05-2008 03:18 PM

في سؤال خطر علي بالي وانا بقرأ جدول الزيادات في رسوم الترخيص بالنسبه للسيارات بمحركات الجاز او الغاز علي حد سواء
هل رسومها حتكون زي محركات البنزين ؟
يعني محركات الجاز غالبا بتكون اعلي من حد 2030 سي سي فهل دي برضه حتدفع رسوم حد ادني 1000 جنيه في السنه ولا محركات الجاز او الغاز حيكون لها وضع خاص ؟
وخاصه ان الجدول لم يفرق بين محركات الجاز او الغاز او البنزين
وطبقا لنص القاعده القانونيه " يظل العام علي عمومه ما لم يردما يخصصه "

**chihab18** · 14-06-2008 10:44 PM

رأيكم ايه ياجماعه مفيش ردود

**Xpert** · 15-06-2008 12:47 AM

اللي اعرف ان مواتير الجاز ليها شرايح خاصه بيها ... انا بالنسبه للغاز فبتعامل معامله البنزين ...
سؤال جانبي .. انا ملاحظ ان انت عندك اسئله كتيره كده و لما باحطها مع بعض حاسس انت انت فيه حاجه معينه في دماغك عاوز توصلها ... شكلك كده عاوز عربيه مرسيدس خنزيره و تعدلها معدل من بره و تحطلها موتور غاز او جاز ؟؟ ولا انا اللي بركب المواضيع في بعض غلط ؟ :d :d

**chihab18** · 17-06-2008 02:50 PM

بصراحه ان المنتدي ده بيفتح اسئله كتيرة وخصوصا انه منتدي حيوي وفيه ناس محترمه زيك بترد رد كويس ؛ بلاقي واحد مثلا يسأل سؤال غيرة يرد عليه علي طول ؛ منتدي متعاون جدا والواحد بتعلم منه كتير فعلا
اما سؤالي ده كان من اول ماغلو البنزين وليقت انهم مجابوش سيرة الجاز ولا الغاز ؛ وانت سيد من يعرف ان القانون مفيهوش قياس وانما قاعده تطبق علي حالات محدده وطالما ماجبش القانون سيره الجاز ولا الغاز فاسعار الضرائب المفروضه بالقانون لاتشملهم ولو حاول حد يحط لهم رسوم في المرور من نفسه حتكون باطله قانونا لانه يفرض ضرائب من غير قانون .
اما عن نفسي فبفضل البنزين مهما غلا ثمنه لان الغاز حامي علي الماتور من جوة وبيقصر عمر الماتور والجاز مشاكله كتير وصوته عالي ؛ اما حكايه التعديلات دي شارحتها لك قبل كده؛ وشكرا لك ياخبير

**Xpert** · 17-06-2008 10:49 PM

يا باشا المرور مالوش دعوه بوزاره البترول و مافيش علاقه بينهم ... الجاز يغلي يرخص مافيش مشكله بالنسبه للمرور انه يحط ضرايب جديده ...
انا برضه من النوع اللي احب البنزين ... لانه احسن من كل ناحيه و عملي اكتر من الاتنين الباقيين ... اما السبب الحقيقي وراء غلو البلد هوه تطبيق اتفاقيه الجات علي البنود اللي ماكانتش اتبطقت عليها قريباُ (ده ان كانت اتبقط اصلاُ) .. و بالتالي هايشيلوا الدعم تدريجياً و تتوقع ان البنزين و الجاز هايغلوا تاني و كتير بعد كده ...

**semsem67** · 18-06-2008 12:26 PM

الذي أعلمه هو أن الجاز ضريبتة ضعف البنزين يعني احسب السعة اللترية واحسب الضريبة عليها واضربها في 2 ده بالنسبة للسولار أما الغاز الطبيعي فالضريبة مثل البنزين بالضبط مع ان المفروض لمصلحة البلد أن يتم تخفيض الضريبة أو حتى إلغائها على هذه المحركات . هذا إذا كانت الحكومة تريد مصلحة البلد وليس جمع الأموال وخلاص