-
عاوز أأجر بلطجية
تعبت جداااااااااااااا
انا كل اللي عاوزه اني اعيش في نظام
اعيش بدون فوضي
وسفالة
وقلة ادب
طول عمري بحرص علي مشاعر جيراني
وبقول لو انا مكان فلان كنت هعمل ايه
كنت هزعل ولا لأ
الشارع بقي ماشي بلطجة في بلطجة
مش عارف اركن عربيتي
1- كل صاحب محل حتي لو واخد خن متر في متر
حط بيردورات وحواجر وقوالب ادام محله
وقال صراااااااااحة اللي هيركن هنا هدبحه
2- السريحة والباااااااااااااعة الجائلين
احتلوا الشارع والرصيف - محدش عارف يمشي في الشارع
الاطفال لم يبق لهم رصيف يمشوا عليه
بقوا يضطروا ينزلوا وسط الشارع والعربيات عشان يمشوا
والنتيجة : عيل تخبطه عربية
3- ده غير سفالة وقلة ادب الاشكال دي
مبقتش واحدة ست او بنت عارفة تمشي من جنبهم
معاكسات وقلة ادب ووقاحة
وكل وااااااااااااحد محمي في بلطجية جايبهم
ده ان مكنش هو بلطجي ودول ولاد عمه
طب لما تبقي في بيتك
ومش عارف تعيش
امك او اختك مبقتش تقدر تنزل الشارع مطمنة
مش عارف تركن عربيتك
يا راجل ده واحد غلبان بيشتري منهم حاجة من كام يوم وتقريبا فاصل مع البياع
اتلموا عليه البياعين وهروووووووووووووووه ضرب
مش عارف
بس بيتهيألي من اللي اتحكالي
انه مات
حد هيقولي بعد الثورة لازم نحترم القانون
احترمته
وفي الفترة الاخيرة قدمت كم من المذكرات والشكاوي الي النيابة والقسم
احيانا بصورة ودية والاغلب بصورة رسمية
والنتيجة
لا حياة لمن تنادي
كله بيسدد خانات
اه تصرف النيابة كان افضل من القسم لان البهوات في القسم مش فاضيين ينزلوا خاصة لواحد تاااااااااااااااااااااااا اااااااااافه زيي
جي يشتكي في ركنة عربية ولا شغل طريق ولا حتي معاكسة انثي
لكن برضه محدش فاضي ياجدعان
ولا عاوز يشتغل
ما هو برضه معذووووور
يسيب جيم البلاي ستيشن ويقوم
ده بيلعب بمانشستر
وفايز 2 - صفر
وحتي لو جه وعمل محضر وازال المخالفة - وده محصلش
اول ما بيمشي الحواجز والبردورات والسريحة بيرجعوا تاني
والبيه الظابط مش فاضيلك
مش مربوط علي شارعكو عشان كل شوية الحق بلاغ
ااااااااااااااااااااااااا ااه
كل اللي عاوزه ان القانون يطبق
علي فكرة يا جماعة
احنا عندنا مجموعة من اكثر القوانين صرامة في العالم
لكن مين يسمع
وماتلاقيش من حد غير كلمة " معلش .. كل سنة وانت طيب "
ففكرت في حاجة
ليه مأجرش بلطجية
انا بتكلم جد
مش هي دي بقت مصر
مش هي ماشية دراع
طب ليه لأ
انا مش بفتري علي حد وربنا يعلم اني عمري ما ظلمت حد او تعديت علي حقوق جار
لكن لما يعجز القانون
وصوت العقل
ويبقي الكلام للغوغاء والاوباش والبلطجية
يبقي البادي اظلم
هم شوية بلطجية ومفيش اكتر منهم دلوقتي
انا مش عاوز غير اني اعيش في سلام
والقانون اللي مش عاوزين يطبقوه اللي بيشتغلوه
اطبقه انا بطريقتي
ايه رأيكو
-
سنين من الكبت والقمع
لازم مع أول نفس للحرية .. تلاقي فيه غلط كتيرررررررر وعك كتير
إصبر وإحتسب
-
خدني معاك وحياتك ده أنا مظلوم هنا
على فكرة بقى من قول ماتولدت مش من بعد الثورة الكلام ده
-
حسبي الله ونعم الوكيل
انا اساسا بقيت بلطجي خلاص وماشي باسلحة
-
انهاردا الصبح لقيت عيال بتلعب كورة وسط الشارع العمومى !!! هيا وصلت لكدا
-
جميل .....
يعني انتو مش معارضني
الحمد لله
اصل معرضتش الموضوع علي حد الا وسمعني من المنقي يا خيار
انا بتكلم جد علي فكرة
اما موضوع بقيت بلطجي فكلنا مضطرين مهما بلغ مستوي ثقافتك وتحضرتك وعلمك واحترامك لذاتك
انك تبقي بلطجي
لان اللي بيدفعك لكده
واحد بيلعب علي غريزة اساسية في الانسان وهي غريزة حب البقاء
هتعمل ايه لما تلاقي واحد بيهدد راحتك وراحة اسرتك وحياتك احيانا
بس عشان نكون واقعيين
لما تكون بطولك
او انت واخواتك مثلا قصاد مجموعة من البلطجية المتمرسين
وكلهم محملين بالسلاح
والسلاح انهارده بقي ايييييييييييييه
شراءه اسهل من شراء الايس كريم في الصيف
ياريت بقي حد يقولنا اسعار البلطجية لاني اسمع انهم فئات
وازاي اضمن انه ميضرنيش انا شخصيا
-
ومين سمعك الواحد محتاج بلطجية يمشوا معاه عشان لما تحصل مشكله تلاقى الى يسد معاك
امبارح واحد بعد الفطار ماسك الى وقاعد يضرب ويهوش واحد وهو اه صوت بس رعب الشارع كله اطفال وستات وبعدها بشوى اتنين اخوات بيتشاكلوا مع بعض بالسكاكين
حسبى الله ونعم الوكيل
-
عايز اقولك كمان اني بقيت افتعل الخناقات وبستفز القدامي وبتلكك على اي حاجة علشان اتخانق خصوصا لو سواق ميكروباص او توك توك وزي ماتيجي تيجي مبقتش فارقة معايا اي حاجة خلاص
بلطجي بلطجي يعني مش هزار
-
حته ما يضرنيش انا شخصيا دى مهمه جداا لانه هيبقى قريب من اهل بيتك ومستحيل تثق فيه لانه جايبه عشان ما فيش قانون ولا رادع و هو شغال على كده فانت كمان مش هتفرق معاه
-
ومحدش يقولي ثورة وتبعاتها واول نفس حرية والكلام الحمصي ده
مادام المسألة بقت بالهمجية والغوغائية والحيوانية دي
يبقي انا شايف ان مفيش حل غير كده
Content Relevant URLs by
vBSEO 3.6.0 PL2