فعلا ياجماعه حتى النور الواطى (العادى ) بتاع العربيات المقابله بقى مؤذى يعنى مش العالى وبس ,, نفسى السلوكيات تتغير بقى وصاحب العربيه مايلعبش فى نور العربيه اللى المصنع منزلها بيه لان النور العادى مش مؤذى للمقابل.......
فعلا ياجماعه حتى النور الواطى (العادى ) بتاع العربيات المقابله بقى مؤذى يعنى مش العالى وبس ,, نفسى السلوكيات تتغير بقى وصاحب العربيه مايلعبش فى نور العربيه اللى المصنع منزلها بيه لان النور العادى مش مؤذى للمقابل.......
الفكره كمان ان المفروض لو فيه واحد جاي في المقابل
ومفيش بلوكات في نص الطريق تفصل بين الاتجاهين
المفروض النور يبقي بالتبادل
بتنور نورك تكشف الطريق
وتطفيه وهو ينور نوره يكشف الطريق ويطفيه
مش افضل منور النور وكاشف لنفسي واعميه واخليه يلبس بلاعات او مطبات
ببقي هتشل لما ابقي منور النور الواطي وماشي عشان الطريق منيل بستين نيله والاقي البشر اللي في وشي كله عمال يرعشلي ومره واحد قام كاسر عليا في طريق رايح جاي ولم نفسه تاني وبعد ماعدي بيزعق ويقول اطف يالنور كان ساعتها هاين عليا انزل اولع فيه
ده غير اللي فاكر نفسه اذكي خواته ويبقي طافي نور العربيه كله وماشي كل شويه يشغل النور العالي او مشغل النور الصغير وعمال يرعش بالعالي عشان يشوف قدامه وكنت راكب مع سواق تاكسي بقوله شغل النور وسيبه بيقولي لاازاي كده تعمي اللي قدامك قلتله يعني انتي لما كل شويه بتشغل العالي مش بتعمي اللي قدامك يقولي لاعادي مانا بشغله واطفيه تاني
ده غير النقل اللي بيحطو كشاف ورا من تحت العربيه وفي اللي شغال علي طول واللي بيشغل مع الفرامل
حاجه تقهر
في طريق بمشي عليه عند اهلي رايح جاي كذا مره ابقي مروح بالليل والاقي العربيه نزلت من علي االأسفتل لاني لاشايف قدامي من اللي جاي في وشي ولا شايف ورايا من اللي ورايا وكله مصدر النور العالي
هو الصراحة اي نور فعلا بيتعب العين ويؤذي المقابل سواء الواطي او العالي، وعلي فكرة مش شرط ان صاحب العربية يلعب في الفبريكة بمزاجه يعني احيانا لو خبط بوش العربية بيبقي صعب اوي يرجع تاني ظبطة الفبريكة وبالتالي تلاقي النور قلب وبقي بيعمي المقابل وتشتيت الأضاءة هتلاقيه مش مظبوط وهكذا
واحيانا لو لمبة اتحرقت وحب يغيرها تلاقي بتاع الأكسسوارات بيشور عليه بطقم (لمبتين مع بعض في غلاف) بيبقي اقوي ونوره مبهر، فتلاقي صاحب العربية فرح وعلي طوول يقوم مغير
ربنا يهدي الحال
والله المستعان
،
،
انا من فترة في فكرة بتزقزق في نافوخي بس متهيألي صعبة اوي في تنفيذها وهي انهم لما يجيوا يعملوا طريق سريع اتجاهين بدل ما يفصلوا بفواصل خرسانيه يعملوا اتجاه منسوبه اقل من الأتجاه المقابل وليكن بفرق متر في المنسوبين ويتعدل الطريق بس عند الملفات (U-Turn) ويرجع تاني يبقي منسوب الرايح اعلي او أوطي من الأتجاه الأخر
او الحل الأسهل انهم يعملوا الفواصل شجر كثيف وينسوا خالص موضوع الفواصل الخرسانية دي لأنها في منتهي الفشل ومش بتحجب النور المقابل نهائياً
والله المستعان
،
،
ازي حضرتك عامل ايه ؟؟ وازي العريس الصغير والكبير ؟
انا كمان ببقي هتشل لما يتعمل فيا الحركة دي، كأن الناس بتستكتر عليك انك تشوف، او بيعتبر نفسه بس الوحيد الي من حقه يشوف والباقيين طز فيهم مش لازم يشوفوا وكفايه انا شايف، انا والله مرّات كتير بكبر دماغي وبمشي علي نور التابلوه (النور الصغير) وبشوف علي نور سيارة المقابل واحيانا تانية بلف وشي وبشوف الطريق بطرف عيني واحيانا اخري (ولكن قلما) بعمل نفسي عماشة وبدخل فيه وعلي الله يلمسني او يفكر يلومني (مش انت الي عميتني، خلاص استحملني وماتشتكيش)
كل عام وانت والأسرة جميعا بخير
والله المستعان
،
،
النقل التقيل حوار تاني خالص
حسبي الله ونعم الوكيل، اعتقد لو عملوا احصائيات ونسب وكلام من دة هيلاقوا ان اكبر شريحة مخالفات بتيجي من سيارات النقل التقيل من مشي عكسي لمخالفة السرعة لقلة الأدب لكلاكسات مفزعة لأنوار مبهرة
أعوذ بالله منهم ومن كل من حامل رخصة مهنية ولا يعمل بالأصول والقوانين
انا والله مرة كنت ماشي في طريق عندنا اسمه طريق المنشية ودة احيانا بنلجأله لما بيكون فيصل زحمة (اقصد زحمة بزيادة عن اللزوم) ولقيت ورايا عربية نقل منورلي النور (طبعا مش هتفرق عالي ولا واطي) وضارب النور بالظبط في مراية الصالون وبالتالي ضاربة فعيني ومنورالي العربية من جوة ظهر وماشي ورايا لازق فيا ومنور النور ، مشكلة الطريق دة للي عارفينه انه مليان مطبات صناعية عشان طريق سكني ومليان مدارس ابتدائي واعدادي وكمان ثانوي
المهم خلاني لبست كل المطبات وكل ما اجي اهدي يديني كلاكسات والنور وكفاية طبعا صوت الموتور
والله وقفت علي جنب وشربت سيجارة وبطلت العربية وقولت خلاص كدة زمانه غار في داهية، ولما رجعت مشيت لقيته طبعا بقي قدامي والله مارضي يعديني وكل لما اجي اعدي منه يقفل عليا
انا في البداية افتكرته متسلط عليا
بس طبعا ايماني بأنهم بهايم واغبيا وحمير (أسف لكل هذه الألفاظ، بس هذه اوصاف مطابقة) بيخليني اهدي واصبر عليهم وأقول معلش عديهم دوول غلابة
والله المستعان
،
،
فعلا حاجة قمة في الاستفزاز لما تبقى ماشي في شارع منور وزي الفل وتلاقي واحد من ورا ضارب العالي ببقى نفسي افهم هو بيعمل كدة ليه ! !
لسه امبارح راجع من كوبري فيصل والاقي عربية من قوة نورها انا مش عارف نوعها ايه قلت اعديه واعمل فيه زي مابيعمل
عديته وطلع تاكسي اسبيرانزا ورحت مديله العالي ! !
اللى عايز اعرفه هو بيبقى مش واخد باله انه مشغل العالي؟ ولا واخد باله وعامل عبيط ولا ايه بالظبط ؟ لان الطريق منور ومش محتاج
ولا لما عربية تيجي تعديك مثلا تروح كاسر عليه او ماتخليهوش يعدي يقوم مشغلك العالي اكنه بيضايقك مثلا !
لسه حاصل موقف قدام عيني امبارح في شارع فيصل
اليو تيرن اللى عند المساحة بعد كلية التربية
واقف ومستني العربيات بتاخد الملف فجاءة العربيات تقف وعربية هوندا سيفك قديمة عمالة ترجع ومش فاهم هو بيعمل ايه يرجع ويطلع لقدام حبة ويرجع تاني وموقف في الشارع كله وكله مش فاهم هو بيعمل ايه
فجاءة الاقيه رجع جامد وهيخبط في جمب عربية فيرنا بتاخد الملف معاه بتاع الفيرنا راح فارك وفي ثانية فلت منه وطلع من وسط العربيات ماتسألنيش ازاي وبقى ماشي عكس اتجاه في وشي !
رحت معدي من جمبه بقوله هو اللى بيحصل ! قالي اصله عايز يخبطني عشان حكتله الاكصدام ! ! معقولة احنا وصلة للدرجة دي ! ! يوقف الشارع وعمال يعدل ضهر عربيته عشان يخبط للتاني جمب عربيته ! ! لا حول ولا قوة الا بالله
وبصراحة انا مش مع الناس اللى بتقول انها بتشمي على نور التبلوه بس لان كتير لما بتيجي تتجاوز عربية نورك بينبه العربية التانية ودي نقطة مهمة بالذات في الطرق اللى الاضاءة فيها مش كويسة
اما النقل والترلات فحسبي الله ونعم الوكيل فيهم كنت على الدايري مرة ومن غير قصد كسرت على ترلا
من قوة الاضاءة بتاعتة نوره والله العظيم ماكنت عارف هي موقعها فين بالظبط ولا كنت شايف قدامي اساسا
يعني خلاص رعش نور وانا عرفت انك جاي لكن بالطريقة دي ! خلاني رحت كاسر عكس وطلعت فوق الرصيف عشان اتفاداه مانا مش شايف حاجة
وفي النهاية طلع بعيد عني ببتاع حارتين !
الموضوع في النهاية كله زي عنوان موضوع حضرتك ! سلوكيات ! وهي دي سلوكيات الشعب المصري ! ربنا يهدينا ويسترها معانا