اولا : السلام عليكم ورحمة الله وبركاته
بما اني جديد معاكم ف المنتدى
احب ارحب بكل الاعضاء
واحب اقولكم اني عايز رأيكم ف العربيات التلاته
و طبعا بعد القرارات الاخيرة اللي حطت علينا جميعا من اهل فعل الخير ( اهل عائلة نظيف )
لازم تخلوا بالكم من البنزين
بس انا عايز أسأل سؤال :
هو عشان الصني تقفيل مصري بتفرق ف الجمارك مثلا و السيتي لو كانت ياباني خالص مش تقفيل تايلاندي كانت تبقى اغلى من كده ولا السعر بيتوقف فقط على الماركه - حد يفهمني والله ؟
ايه يا جماعة ده الترحيب بالاعضاء الجديده
اهلا بيك انا صوت للسيتى ...اسم هوندا وكماليات السيتى اكبر من الياريس ومن الصنى فى رأى الشخصى
اهلا بيك معانا ........ مش معنى ان حد اتأخر فى الرد عليك ان محدش عاوز يساعدك ...... ممكن يكون محدش عارف ينصحك نصيحه .
الفرق مابين اول مشاركة وتانى مشاركة 3 ساعات بس ...اكيد مش كل الناس شافت موضوع حضرتك .
عماتا اهلا وسهلا بيك
انا حقولك رأيى المتواضع:-
هوندا ستى افضل من حيث السعر . الكماليات . الصالون . ... بالاضافة انها اقتصاديه جدا فى استهلاك البنزين
اليارس كويسه بس سعرها المرتفع ... انا شايف انة غير مبرر .
النيسان صنى تقفيلها سيئ بالمقارنة بسعرها .... غير ان صالونها ضيق .... غير ان فئة ال1300 اكثر عمليه فى الفتره الحاليه
بالرغم من عدم حبى لتصميم الهوندا سيتى .... لكن الصراحه انا برشحها وبقوه لاى حد عاوز يشترى عربية اعتماديه , مريحه , اقتصادية جدا فى استهلاك البنزين , سعرها مناسب .
انا شايف ان فيها مميزات كتير ... على حساب التصميم والشكل . لكن فى الزمن دة والوقت الى احنا فى ... اهم حاجة انها تكون اقتصاديه ومريحه ... ومن حيث الشكل ... فهي مش سيئه للدرجه يعنى مش ميكروباص .
* ارشح وبقوه الهوندا سيتى *
و تحت امرك لو عند حضرتك استفسار
و انا لاول مره اختلف مع الباشمهندس مهاب:)
السيتي عربيه جميله و كل حاجه لكن اكيد قطع غيارها اغلي من الياريس.
معك ان الياريس سعرها مبالغ فيه يعني 5000 جنيه او حاجه
لكن خد بالك انك بتشتري عربيه 100% تقفيل ياباني
موتور الكورلا اللي الكل بيشهد له بالاعتماديه و التحمل و قله استهلاك الوقود.
تمشي ببنزين 90 او 92 عادي مش فارقه.
شكل تحفه بصراحه و احسن من السيتي بكتير.
ممكن اي ميكانيكي نضيف يصلحها و مش محتاج التوكيل نهائي.
عيوبها:
1.الكابود بتاعها ضيق جدا بحيث ان لو حبيت تصلح حاجه لازم تفك حااجتين تلاته لضيق المساحه.
2.قعدتها بالنسبالي انا مش مريحه اوي لان وضعيه القياده مرتفعه و انا بحب الوضعيه المنخفضه.
3.عفشتها مش بقوه الكورولا مثلا و دا حال كل العربيات في الفئه دي.
اما الصاني ف لا انصحك بيها نهائي لغلو ترخيصها حاليا و لغلو البنزين .
غير كده انت شكلك مش محتاج عربيه كبير.
و كمان بتستهلك بنزين كتير عن تجربه لمده سنه لنيسان صاني خاصه بي في الامارات
ows212 - MohabSaeed - hazem_khidr
الف شكر
بشمهندس مهاب انا عايز اوضح لسيادتك حاجة الفرق بين اول مشاركه وتاني مشاركه مش 3 ساعات بس
لأ ده 24 ساعة + 3 ساعات :):rolleyes:
اما بالنسبه لمقتراحاتكم فهي فعلا ممتازة ونقاش هايل الصراحة
وانا عايز اشترك فيه بالسؤال اللي سألته فأول مشاركة
هو عشان الصني تقفيل مصري بتفرق ف الجمارك مثلا و السيتي لو كانت ياباني خالص مش تقفيل تايلاندي كانت تبقى اغلى من كده ولا السعر بيتوقف فقط على الماركه - حد يفهمني والله ؟
لان انا اققصد من السؤال ده ان لو السيتي مثلا اقل ف الجمرك من الياريس يبقى فعلا هي اغلى بره مصر لان هما الاتنين بنفس السعر هنا
يعني السؤال هو بلد المنشاء او البلد اللي بيتم فيها تجميع العربية بتأثر على الجمرك
بص يا سيدي الفاضل
بلد المنشأ بتفرق في تمن العربيه
لزياده اجور الايد العامله
مثال الايد العامله في اليابان اغلي من الموجود في تايلاند و مصر
و دا سبب من الاسباب اللي بتؤدي الي نخفاض تمن السياره باختلاف بلد المنشأ.
اما بالنسبه لمصر ف الصاني لا تدخل علي اساس انها قطع غيار مش سياره
و بكده بيقل الجمارك عليها جدا و بيبقي في نسبه تصنيع محلي لا تقل عن 40%
بتلاقيها بقي عباره عن لكراسي و هياكل الكراسي و السماعات و بعض الاجزاء غير الضروريه لكن موتور و عفشه ياباني100%
ارجو ان اكون وضحت لك الصوره:)
يا مان مافيش صني مانيوال كامله!!!!!!!!!!!!!!!!!!!!!!!!!!!!!!!!!!
ومعلش لو حتى كانت موجوده تكـــــــــــــــــــــــ ـــــــــــــــــــــــــ ســــــــــــــــــــــــ ــــــــــــــــــب .. في كل حاجه مع احترامي للسيتي و الياريس...
الاستاذ حازم خضر شكرا
وكده افهم من كلام حضرتك ان التجميع فمصر رخص تمن العربيه من حيث اليد العاملة ومن حيث الجمرك
طيب والتجميع في تايلاند وفر في السعر من حيث اليد العاملة في تايلان لكن لو كانت جاية من اليابان كان حيتدفع عليها نفس الجمرك ؟؟
يعني السيتي والياريس بيتدفع عليهم نفس الجمرك ؟
وشكرا
loai-omar
مش فاهم ازاي مفيش كامله مانيوال
اللي اعرفه ان فيه صني مانيوال بزجاج كهرباء وتكيف وكاسيت وباور و واحد ايرباج يعني كامله مانوال
:) حازم باشا ... ازيك :)...........اقتباس:
المشاركة الأصلية كتبت بواسطة hazem_khidr
انا بتكلم من حيث ان الستى بجميع الكماليات ب 85 الف جنيه .... والياريس التكيف بور دلوقتى وصلت 88 الف جنيه ... اليارس عربية محترمه بس التوكيل كل يوم بيغلى فيها ..... انا بصراحه اتخنقت من الجشع .........انا فاكر الياريس اول مانزلت مصر كانت ب 80 الف جنيه ..... ليه تغلى 8 الاف جنيه ؟؟؟؟؟؟؟؟
معاك انها اعتماديه وموتورها ممتاز لكن 88 الف جنيه رقم كبير على عربية تكيف وبور بس .....
الستى بالرغم من انى " بكره " تصميمها بس الحقيقه كل الناس شكرت فى نعومتها وانها اقتصاديه .... يعنى الراحه و الكماليات و السعر و الاعتماديه على حساب التصميم والاناقه ... طلاما حركب عربية حتريحنى مش مشكله لو اتنازلت عن الشكل "" بالرغم من ان فى بعض اصحابى موهومين بشكلها وبيقولى عليها تحفه "....... ازواق !!!!!!!!!!! :rolleyes: بس انا لسه مُصر ان تصميها غريب ومش مفهوم ؟؟
بالنسبه للاعتماديه ... هوندا ماركه اعتماديه جدا جدا زى تويوتا .
معاك انها تقفيل تايلاندى ... بس برده اسمها هوندا ومواتير هوندا معروفه جدا فى اعتماديتها واستهلاك البنزين المتدنى
بالنسبة لقطع الغيار فاحتمال فعلا انها تكون اغلى من اليارس ... والله اعلم .. انا مش عارف النقطه ديه
يا اخى الفاضل ... ارفع التكليف .........ليه سيادتك ديه ؟؟ :):)....... كلنا هنا اخوه .اقتباس:
المشاركة الأصلية كتبت بواسطة AboMaro
انا اسف مخدتش بالى من ان الفرق مابين المشاركتين يوم و 3 سعات . :)
انا ححاول ارد على استفسارك بخصوص موضوع بلد المنشأ .......... بلد المنشأ مابتفرقش فى نسبه الجمارك ........... نسبه الجمارك واحده على كل السيارات المستورده وبنسب متفاوته على حسب السعة اللتريه .
لكن ممكن الستى يكون جماركها اقل من اليارس لان سعر الستى ارخص ..... ممكن لانها متجمعه فى تايلاند ... والايدى العامله فى تايلاند ارخص من اليابان ...... فبالتالى دة حيعود على سعرها وبالتالى جمركها الى بيتحدد من تمنها الاصلى .
بالنسبة للسيارات المجمه فى مصر فهى مش بيبقى عليها جمارك زى السيارات المستوردة " كسياره " لانها مجمعه محليا .... لكن بيبقى عليها جمارك " كمكونات " يعنى المكونات الى بتيجى من بره هى الى بتتجمرك ودية بتكون بنسب ضئيله .
اتمنى اكون عرفت اوضحلك الصوره شويه
وياريت لو تدخل فى قسم الهوندا.... و تشوف تقيم الناس هناك ليها ايه ....
وتدخل برده قسم تويوتا وتشوف التقيمات .... ونفس الموضوع بالنسبه للصنى .
بس نصيحة اخويه سيبك من الصنى واى عربيه عموما 1600 .........خليك فى حاجة 1300 احسن ..... لان اسعار البنزين مش حتقف وحتزيد .......... مواتير ال1300 الحديثه ادائها معقول جدا ومتوازن .... وطبعا اقتصاديه جدا جدا فى استهلاك البنزين .
وتحت امرك فى اى استفسار .
ياريس مانيوال بس فل اوبشن حاول تجيبها علشان حكاية البنزين دية و الصنى مش موفرة اوى فى البنزين
مين قال صنى مش فول اوبشن .. الموجودة صنى فول اوبشن ب 87000 وتكسب طبعا .. عربية يابانى تعيش معاك العمر التقفيل مش ضايع ذى الناس ما بتقول
بس الناس حافظه تقفيل مصرى يبقى العربية مش حلوة
بالعكس لما تجيب التقفيل مصرى فانت كده وفرت يجى 15000 جنيه لو كان تقفيل يابانى
انا رأى صنى صنى
وموضوع البنزين مش هايفرق المبلغ كبيره يعنى لو فى الشهر 50 جنيه زياده بس راكب عربية جامدة ومن الاخر
لا مين قال 50 جنيه فرق.اقتباس:
وموضوع البنزين مش هايفرق المبلغ كبيره يعنى لو فى الشهر 50 جنيه زياده بس راكب عربية جامدة ومن الاخر
الصني بتاكل بنزين كتير و عن تجربه
الصني عربية حلوة و ماسكة نفسها و تقفيلها جيد جد و مصنع نيسان في مصر من أحسن المصانع للسيارات الموجودة في مصر
و لكن لا أرشحها بالمرة لسببين
الأول ..... بتستهلك بنزين كتير في نفس فئة سيارات 1600
الثاني ..... بالمقارنة كه الياريس و السيتي ..... متكسبش في توفير البنزين
الياريس ... عربية حلوة و من ماركة مشهور و مفيهاش عيوب جوهرية و بتوفر في البنزين
و لكن ثمنها مُبالغ فيه جدا ............ شكلها مش حلو قوي
السيتي .... عربية من ماركة مشهورة و مفيهاش عيوب جوهرية و بتوفر في البنزين قوي .........
ثمنها معقول جدا و بها كماليات كثرة .......... شكلها مش حلو قوي
و انا أتفق تماما مع الأستاذ مُهاب و الأستاذ حازم
السيتي أفضل من الياريس في الكماليات و السعر النهائي و توفير البنزين ( الأستاذ مُهاب )
الياريس قطع غيارها أرخص من السيتي ( الأستاذ حازم )
و أنا عن نفسي أنصح بالسيتي و بعدين الياريس علشان توفير البنزين
البنزين لن يقف عند هذا الحد ........... ثمنه في إرتفاع مُستمر عالميا و هو ينضب محليا مع زيادة عدد الشعب
لذلك يجب النظر نظرة مستقبلية عند شراء سيارة
و السيتي و الياريس موفرين في البنزين
أتكل على الله و هات واحدة منهم و أنا أرشح السيتي بقوة علشان السعر المعقول و الإعتمادية الهوندية
كلام جميل و كلام معقولاقتباس:
المشاركة الأصلية كتبت بواسطة tutankhamoun
و انا اضم صوتى لأخى الحبيب توت
و على فكرة انا ايضا لو عندى المقدرة و بالذات بعد ما حدث فى موضوع البنزين و ما قد يحدث لكنت اشتريت هوندا سيتى ففيها الكثير من المزايا و خاصة الشياكة و الفخامة التى يتميز بها الصالون و الإتساع ايضا بالصالون و الشنطة و حوض السيارة ناهيك عن الكماليات و استهلاك البنزين و موضوع الشكل دة نسبى فأنا بالعكس اراها شيك جدا و لا تقل عن الياريس ابدا
المشكلة فقط فى قطع غيارها اسعارها تزيد عن الياريس لكنى لا اراها زيدة مزعجة جدا فقطع الغيار اليابانى عموما معمرة و يكفى اسم هوندا عالميا فهو الأول فى اليابانى
استخير الله و توكل علية و هات الهوندا
سيتي
و بصراحه حرام ادفع 90 الف في عربيه هاف اوبشن
شكرا جزيلا ولو انه شكر متأخر للاستاذ مهاب والاستاذ حازم خضر على ارائهم الرائعة
وطبعا لكل من شارك بالرأي
وفعلا ان شاء الله انا مستني توكيل هوندا يفتح باب الحجز لانه حسب ما هو مكتوب ف منتدى هوندا ان باب الحجز للسيتي مقفول الى نهايه شهر 6
بالظبط كدا هوندا دى برة زى تويوتا عندنا بس للأسف مش واخدين حقهم اوى فى مصر :arghh:اقتباس:
المشاركة الأصلية كتبت بواسطة ows212
انا ارشح لك الصنى منيوال لاسباب كتيره جدا
1- عربيه موتور وجر وعفشه يابانى بالكامل وتقفيل جيد بدون عيوب و روح شوفها بنفسك وما تسمعش كلام ناس ما ركبوش العربيه
2- اعتماديه هايله واعطال نادره
3- قطع غيار رخيصه بالمقارنه باى يابانى فى نفس السعه االتريه
4- سعر العربيه اقل بحوالى 15000 جنيه من اللى فى نفس الفئه وده كفيل بانك تعوض فرق البنزين على مدى 10 سنوات
5- عريه لما تركبها حاجه تانيه غير السيتى واليارس مع كامل احترامى لكن الموتور الاقوى والعربيه راسيه وتحس انك راكب عربيه بجد
6- المتانه وقوه التحمل سواء فى الصاج او الخبطات فى صالح الصنى بدون منازع - شوف اى يارس اتخبطت من قدام تلاقيها انتهت
وطبعا لازم تركب العربيات وتجربهم قبل ما تشترى
وربنا يوفقك
من الاخر تويوتا ياريس
اية يا جماعة الصنى مع والدى مش بتاكل بنزين ولا حاجة وكويسة جدا فى البنزين وعلى فكرة ال 1600 بتاع الصنى موفر عن ال 1600 بتاع الجيين 2 والاوبترا بمراحل ودة بجد (الصنى مع التكييف داخل البلد معقولة فى البنزين بس مقدرش اقول بتسحب كتير)
اولا نا لا ارشح الصنى اطلاقا مش تقليلا منها بس فعلا موضوع البنزين زى ما الاخوه الاعضاء قالوا هيفرق كتير ومدلوقتى بس لا قدام ..الياريس والسيتى اساسا الاتنين شكلهم مش حلو بس انا ارشح السيتى بقوه لانى شايف ان الهوندا لا تقل فى اى شىء عن التويوتا موتور محترم جيربوكس جامد جدا وهوندا مشهوره بمحركاتها القويه والجير عالى الاداء والعربيه كامله يعنى ايه ادفع 88000 وفى الاخر تكيف وباور مع احترامى للياريس والهوندا من جوه رووووعه التابلوه شيك جدا والعدادات والطاره
بالنسبه لاستهلاك البنزين الاتنين موفرين بس اعتقد الهوندا تكسب لانمن كلام الاعضاء اللى عندهم سيتى استهلاكها خرافى كنت قرأت فى قسم الهوندا ان التنك بتاعها بيعمل 800 كم وهو 42 لتر طبعا مع القياده المتزنه...استهلاك مفيش بعد كده والوكيل محترم جدا ......من الاخر السيتى..ومتنساش الاستخاره
..mokhtar..
السلام عليكم
كل سنة وانتم طيبين
طبعا مفيش كلام ممكن يقال بعد التحليل العظيم من الأخوة لكن احب اضيف رأي ممكن يكون ليه دور بسيط
السيارة الصني
انا لي واحد زميل اشترى العربية الصنى
معنى تقفيل مصري ياجماعة ياعنى تقفيل مصري سئ فوق ما تتخيلوا البطاريات بتتغير والكاسيت وحاجات زي كده لأن الوكيل طبعا ناصح ولازم يكسب
العربية الصني لا يوجد بها فرامل abs او اي حاجة من ديه لكن كل اللي موجود فيها اير باج للسائق فقط
الصالون من الداخل ضيق فوق ما حضرتكم تتخيلوا
بالإضافة إلى استهلاك البنزين
السيارة الهوندا
تقفيل تايلاندي ولا تعليق (طبعا اللي اشترى العربية الاخوة في المنتديات مستحيل يقولوا عليها وحشة لأنه اشترها وخلاص
العربية الياريس
معنى كلمة هاف اوبشن تفرق عن العربيات التانية
العربية الهاف اوبشن اطلقوا عليها هاف علشان
لا يوجد بها سنتر لوك
الزجاج رفع يدوي
الكنبة الخلفية لاتتحرك
لكن يوجد بها
2 ايرباج
يوجد بها abs & ebd
السيارة بور
الكاسيت الأصلي من الداخل
كل شئ موجود بالسيارة عدا ما ذكر اعلاه
وفي النهاية
MADE IN JAPAN
في حاجة اخيرة نسيت اضافها ياجماعة
انا لي اصدقاء يابانين
واشاعة ان هوندا في اليابان هي الافضل ديه معلومة غلط
تويوتا افضل من الهوندا والصني بمراحل
اشكركم على سعة صدركم