الموضوع: حكم المضاربة فى البورصة فى الشريعة الإسلامية

بارك الله فيك وفي مالك طالما ابتغيت الحلال الصافي
سؤال واحد بس: ليه خرجت؟
طبعا أتوقع إجابة مستفيضة في الشرح :)

والله أخي الكريم أنا مش مقتنع بالمضاربة نهائي وحاسس إن نتائجها زي نتائج القمار

انا مش هأتكلم عن الحرام والحلال لأني لست أهلا للفتوى

لكن حتى لو المضاربة حلال بس ممكن تضيع راس مالك كله أو تخليك مليونير
ودي نفس نتائج القمار
لأن القمار ممكن يحول واحد من غني ومحنرم إلى شخص مديون وشحات
وممكن يخليه يكسب ويبقى من الأغنياء

وكمان المضاربة في الغالب بتكون نتائجها من الفئة الأولى
يعني لو حسبنا اللي فلسوا واللي اغتنوا من المضاربة هنلاقي الأغلبية فلست
وده تشابه تاني بين المضاربة والقمار

والشبه الثالث في رأيي إن صاحب برتيتة أو تربيزة القمار بيبقى زي المنشار طالع واكل نازل واكل
يعني بياخد عمولته من كل الأطراف بغض النظر عن الشخص كسب ولا خسر
وده نفس الشئ بيحصل في المضاربة

وأخيرا
قيمة المبالغ الموضوعة في البورصة بتقل مع الوقت نظرا لتحصيل هيئة البورصة وشركات السمسرة نسبة معتبرة عن كل معاملة
وده يعني إن كل تقريبا مائة وخمسين مرة تعامل على سهم معين فإنه بيفقد قيمته الإبتدائية بالكامل لصالح شركات السمسرة وهيئة البورصة




أنا دخلت البورصة لأول مرة رغم إن إخوتي تقريبا كلهم فقدوا كل أملاكهم وفلوسهم فيها

بعد الثورة لقيت الأسهم انهارت وأخي قاللي دي فرصة تدخل فيها

قولتله هأدخل بس بشروط

1- انا مش بأحب المضاربة
أنا عاوز أشتري اسهم تكون قيمتها العادلة منخفضة جدا وتكون غالبا بتوزع أرباح وأشتري فيها كمستثمر وأسيب أسهمي براحتها
لو نزلت آخد ارباحي السنوية كما لو أني داخل مشارك في شركة عادية
ولو طلعت بعد فترة ووصلت لسعرها العادل ممكن ساعتها أبيع

2- أوزع أسهمي على كذا فئة - عقارات على أغذية على مطاحن على أدوية
بحيث لا قدر الله لو طلع قرار شل نشاط من الانشطة في مصر يبقى أنا حر في باقي الاسهم التانية أقدر أبيعها لو حبيت

3- ما اشتريش في أي سهم شركته فيها شبهة حرمة أو ليها علاقة بأي من حبايبنا بتوع بورتو طرة واللي بره اللي هيحصلوهم بأمر الله تعالى




المهم مرت الأيام وطبعا مع الأحداث والأخبار المتوالية
في الأول ربحنا شوية صغيرين وبعدين لقيته حطلي كل أسهمي في أجواء
وبعنا وخسرنا وبعدين اشترينا تاني

دلوقتي أنا حاطط كل فلوسي في أجواء وخسران تقريبا أربعين في المائة من قيمة فلوسي اللي دخلت بيها وهي مبلغ مش هين

وأنا قررت إني لا أبيع ولا أشتري وأنتظر لما قضية اجواء تحكملنا بعد شهر بعد شنة بعد عشر سنين



انتوا إيه رأيكم هل لو استمريت في السهم ده كده كمساهم في الشركة لحين ما المحكمة تحكم على رئيسها اللي سرقنا وأسترجع حقي - هل ده حرام ولا غلط والأفضل أبيع بخسارة وأبعد عنها تماما ولا إيه ؟؟؟؟؟؟؟؟؟؟

منتظر رأيكم بس يكون عن خبرة مش كلام وخلاص

المشاركة الأصلية كتبت بواسطة alrabeh

نقطة هامة أؤكد عليها وهى ايمانى الكامل أن الشيوخ أكرمهم الله يفتون بما تيسر لهم من أمر هذه البورصات ولذلك فإننى أؤكد ان اى شيخ لم يطلع على كافة التفاصيل الدقيقة وعلى التعاملات اليومية فى التداولات وخلافه لن يستطيع اطلاقا اصدار فتوى صحيحة وأسأل الله لهم السداد

والله تعالى الموفق

أخي الكريم

مع كامل إحترامي وتقديري للشيخ أبو اسحق الحويني والباقين سواء سلفيين أو إخوان أو مستقلين،

فأنا ملتزم بالتخصص ولا أسمح لنفسي أن أتقبل الفتوى الفاصلة في أمر من الأمور الكبيرة من غير المتخصصين في الفتوى مثل الشيخ القرضاوي ولجان الفتوى بالمجمعات الإسلامية المشهود لها بالعلم والتخصص.


كما أني لا أعتبر مثلا الشيخ القرضاوي مرجعا في الحديث أو التفسير ولا ألتزم برأيه في المسائل الفاصلة وأحترمه عندما يكون رأيه هو فقط نقلا عن عالم من علماء التفسير أو الحديث - رغم أنه أكيد درس التفسير والحديث وربما باستفاضة أكثر من الكثير من محدثي اليوم لكنه غير مجاز وغير متخصص في هذا المجال.


زي ما حضرتك لا قدر الله لو عينك تعبتك مش هتروح تكشف عليها عند دكتور عظام حتى وإن كان هذا الدكتور صديقك أو قريبك وحبيبك وتثق فى نشاطه وأمانته ثقة عمياء.

وخصوصا إن إحنا بنتكلم في أمور فقهية ليست من فروع الدين ولكنها أمور عظيمة تترتب عليها نتائج ضخمة تؤثر على حياتنا ومستقبلنا................................ .....

تقبل تحياتي