الموضوع: نفسي اعمل مشروع ومش عارف ابدا منين

عندى فكرة ليك
انت ناوى مثلا ع محل اكسسوارات يبقى تطلع ع محل و تشتغل فية فترة حتكون شربت الصنعة و اما تيجى تفتح محلك بعد كدة يبقى عندك خبرة
و بالنسبة لاخوك حينفعك جاامد لان اللى ف استقبال بيبقى لسانو حلو و ده بيبقى حلو ف التعامل مع الزباين

بص انا عندى فكرة احسنلك
تعمل محل بيع اكسسوارات فقط يعنى يبقى زى السوبر ماركت فى اقسام اضائه و ساوند سيستم ... الخ
اية رايك؟

المشاركة الأصلية كتبت بواسطة waelbaha

سلام عليكم يا جماعه
طبعا العنوان واضح انا محتاجكم في ايه
المشكله يا اخواني اني عاوز من فترة اعمل مشروع له صله بعالم السيارات لكن مش عارف احدد ايه هو بالظبط وكمان مش عارف ابدا منين واسال مين لحد ما ربنا هداني لطرح سؤالي عليكم ويارب الاقي الفكرة اللي بادور عليها من فترة
فكرت في حاجات كتير زي مثلا
مغسلة عربيات
ورشه صيانه
قطع غيار
اكسسوارات
لكن في كل مرة باقابل مشكلتين
المشكله الاولى هي ايجاد المكان المناسب لكل نشاط يكون فين وشروطه ايه
وخصوصا اني من سكان القاهرة وعايش في منطقة العبور
المشكله التانيه هي المعرفه بالمجال نفسه لاني ماعنديش سابق خبرة في مجال البيع او الصيانه طبعا وكنت فاكر اني اجيب صنايعي يساعد في الشغل (المغسله-الصيانه) او اي بياع خبرة يساعد في حالة قطع الغيار بس لقيت ناس كتيرة بتقوللي ماتسلمش نفسك لصنايعي ولازم تكون عارف في الشغل وتقدر تعمله بايدك علشان ماياكلش منك المشروع وفي الاخر تتبهدل
فلقيت اي حاجه بافكر فيها باصطدم بنفس المشكله وهي الاعتماد على الصنايعيه او البائعين لاني زي ما قلتلكم راجل بتاع حسابات وعمري ما عملت حاجه غيرها فمش عارف اعمل ايه في المشكله دي كمان
الميزة الوحيده اللي عندي هي ان اخويا مهندس سيارات وبيشتغل حاليا في مركز صيانه وممكن اعتمد عليه فيما بعد بس خبرته العمليه برده لسه قليله ولم يعمل في الصيانه لانه بيشتغل في الاستقبال وطبعا تعرفوا ان اللي بيشتغل في الاستقبال مابيعرفش يمارس بايده الشغلانه وبيكون مجرد مبيعات وشغل بهوات من الاخر
افيدوني اعمل ايه وابدا ازاي وادخل المجال ده ولا لا ولو من رايكم اني ابعد عن المجال ده لو مش مناسب ليا طيب ياترى افكاركم ايه في اي مشروع تاني لاني قربت يجيلي حاجه في دماغي من كتر التفكير وفي نفس الوقت القرشين بيخلصوا على الفاضي ونفسي الحق نفسي وابدا مشروعي باسرع وقت ممكن
يارب الاقي عندكم ضالتي وانا متاكد انكم مش حتخذلوني بافكاركم الطيبه ونصيحتكم الامينه

ان شاء الله تعمل مشروع ناجح وربنا وفقك بس انا اخدت باللى من حاجة يمكن كانت مشتركة ما بينا انا كنت زيك كده فى سنة من السنين بفكر فى نفس المشروع بس فى مدينة 6 اكتوبر عايز اقولك ان اول خطوة لنجاح مشروعك باذن الله هوة المكان مهم جدا انك تتواجد فى مكان خالى من الخدمات بص ياسيدى انا هاقولك ساعة ما فكرت وصلت لايه اولا المكان او المحل اللى هاتفتحه اهم حاجة يكون موقعه قريب من باقى الخدمات ، ثانيا انت ممكن تعمل ايه مثلا انا كنت بفكر فى زيوت وخدمات كاوتش وشوية اكسسوارات خفيفة مش محتاجة خبرة ومع الوقت هاتعرف المكان محتاج ايه كل مرة هاتتسال على حاجة جديدة وانت طبعا متقولش انك مش شغال فيها تقول ان شاء الله هاتكون موجودة بعد يومين مثلا وتسعى جاهدا انك توجد الحاجة دى واعتقد مفيش مشكلة لو جبيت صنايعى يقف جنبك حتى لو انت هاتدفعله من جيبك الاول بس ده لهدف ان انت اللى تتعلم وممكن تعمل حاجة ظريفة جدا انك تعمل فلايرز او اعلانات صغيرة عن نشاطك والخدمات اللى بتوفرها والعنوان طبعا وتمشى فى المدينة كلها تحت كل زجاج عربية تحط الورقة وان شاء الله ربنا يوفقك وتقدر تعمل اللى غيرك مقدرش يعمله وفى حاجة كمان مش صعبة خالص هاتقول هاتجيب منين الحاجات بالجملة ممكن تسال من اقرب حد ليك هوة بيجيب منين او تاخد عناوين الشركات من على العبوات وتبتدى تسال هاتوصل وبالتوفيق